Firudin Məmmədov: “Onlar haqq üçün gedib o aksiyalarda iştirak ediblər. Mən onlara yenə də öz təşəkkürümü bildirirəm”
Vətən Müharibəsi Əlilləri Cəmiyyətinin sədri Firudin Məmmədov yanvarın 8-də “Azadlıq” radiosunun “İşdən sonra” proqramında Qarabağ veteranlarının hökumətə hazırladıqları sənəd barədə məlumat verib. Firudin Məmmədov həmçinin Qarabağ veteranı Zaur Həsənovun özünü yandırmasına görə hökumətə etiraz edən gənclərin həbs olunmasına da münasibət bildirib. Verilişdən həmin hissəni oxucuların diqqətinə çatdırırıq.
– Firudin bəy, ötən gün Zaur Həsənovun özünü ödürməsinə görə hökumətə etiraz edən gənclərin məhkəməsi keçirildi. Və həmin gənclər məhkəməyə əli qandallı gətirildi. Etiraz edənlər arasında Qarabağ veteranları da var idi. Onlardan bəziləri həbs olunub, bəziləri isə cərimələnib. Amma siz onların yanında deyildiniz…
– Camaatı Fəvvarələr Meydanına dəvət etdikləri günlərdə biz xəstəxanada Zaurun yanındaydıq. Həmin günlərdə Zaur çox ağır vəziyyətdə idi. Biz onun müalicəsi ilə bağlı işlərlə və həm də bütün günü mətbuatda Azərbaycan ictimaiyyətinin hadisə ilə bağlı məlumatlandırılması ilə məşğul idik. Aksiyadan bir gün öncə mən burda sizin studiyanızdaydım. Mən həmin verilişdə dinindən, irqindən, milliyyətrindən, kimliyindən, yaşından, vəzifəsindən asılı olmayaraq Zaur Həsənovun özünü yandırmasından sonra Qarabağ veteranlarını dəstəkləyən, istənilən formada aksiya keçirən bütün insanlara öz təşəkkürümü bildirmişdim. Və onları dəstəklədiyimi də bildirmişdim…
– Amma başqa mesajlar da var – “Biz bunun arxasında yoxuq”, “Bunun bizə aidiyyatı yoxdur”.
– Mən təəssüflər edirəm. O insanlar Azərbaycanın ən fədakar insanlarıdır. O gənclər Azərbaycanın ən qəhrəman, ən vətənpərvər gəncləridir. Və mən əminəm ki, müharibə başladığı təqdirdə susqun, qorxaq, cəsarətsiz gənclər deyil, məhz həmin gənclər müharibəyə gedəcəkdilər. Azərbaycanın yükünü öz çiynində daşıyacaq həmin gənclərdir. Mən çox təəssüf edirəm ki, onlar həbs olunub, onlara sutkalıqlar verilib və ya cərimələr kəsilib. Ancaq mən inanıram ki, həmin gənclər peşman deyil. Onlar haqq üçün gedib o aksiyalarda iştirak ediblər. Mən onlara yenə də öz təşəkkürümü bildirirəm. Dövlət rəhbərindən və aidiyyatı orqanlardan onların dərhal azadlığa buraxılmasını həm xahiş, həm də tələb edirəm. Məhz belə gənclər vətənin yükünü çiynində daşıyan gənclərdir. Qorxaqların üzərinə heç də yüklənmək olmaz.
