Nazir oğlanlarının həbsinə sanksiya verən prokuror da işdən uzaqlaşdırıldı
Prokurordan sensassion açıqlama: «Baş nazir adamlarını göndərərək hökumət əleyhinə araşdırmanı dərhal dayandırmağı, ondan üzr istəməyimi tələb etdi»
Ərdoğanın məsləhətçisindən Fətullah Gülənə sərt sözlər: «Yalan, iftira və qarayaxmaya əl atan insan xeyir işə xidmət edə bilməz»
Fətullah Gülənin Ankaraya göndərdiyi «sülh məktubu»ndan sonra baş nazir Ərdoğanla Gülən arasındakı «soyuq savaşa» bir qədər ara verildiyi düşünüldü. Türkiyə prezidenti Abdulla Gülə göndərilən həmin məktubda Ərdoğana ünvanlanan mesaclar da var idi. Gülən yaranmış vəziyyətlə bağlı sülh, sakitlik tərəfdarı olduğunu dilə gətirmiş, heç kimi dövlətə qarşı qaldırıb səfərbər etmədiyini bildirmişdi. Üstəlik Ərdoğana iki imzalı kitabını da göndərmişdi. Lakin hadisələrin gedişi göstərir ki, tərəflər arasında sülhün yaranması o qədər də asan məsələ deyil. Türkiyə polisində nurçulara yaxın kadrların bir-bir vəzifədən uzaqlaşdırılması, bir-birinin ardınca həyata keçirilən rüşvət əməliyyatları, Ərdoğanın qarşı cəbhəyə yönəlik ittihamları gərginliyin hələ uzun müddət səngiməyəcəyini göstərir.
«Yalanları ilə yalançı peyğəmbərdən fərqlənmirlər»
Ərdoğanın məsləhətçisi Yalçın Akdoğanın bu gün yerli mediada yayılan və «Gülən camaatına» sərt sözlərin ünvanlandığı məqaləsi də təsdiq edir ki, tərəflər sülhə hələ çox uzaqdırlar. Yalçın Akdoğan əqrəblə qurbağanın məşhur hekayəsindən bəhs edərək «Gülən camaatını» əqrəbə bənzədib: «Sancmağa adət edənlər bu xüsusiyyətlərindən əl çəkə bilmirlər». Akdoğan yalançılığın simvolu olan Müseylemeyi Kəzzapı (yalançı peyğəmbər) xatırladaraq «Gülən camaatı»nın da yalan və iftiralara əl atdığına, yalanları ilə yalançı peyğəmbərdən fərqlənmədiklərinə işarə edib: «Müseylemeyi Kəzzap yalançı peyğəmbərlərdən biri idi. Peyğəmbərimizin sağlığında ortaya çıxıb peyğəmbərlik iddiasına düşmüşdü. Əvvəlcə Mədinəyə gələrək müsəlman olmuşdu. Sonra peyğəmbərlik iddiasına düşərək dindən çıxmışdı. İdarəetmə üsulu yalan, iftira, qarayaxma, çirkab atma olan insanın xeyir işə xidmət etməyəcəyi məlumdur. Ürəyində iman olan insan yalana və iftiraya əl atmaz. Çünki yalan küfrün qardaşıdır. Küfr də həqiqətləri danmaqdır».
Zəkəriyyə Öz də belə getdi…
«Böyük rüşvət əməliyyatı»nın istintaqını aparan daha bir prokuror işin araşdırılmasından kənarlaşdarıldı. Prokuror Müəmmər Akkaşı istintaq sirrini yaymaqda ittiham edərək işin araşdırılmasından uzaqlaşdıran Ərdoğan hökuməti bu dəfə də Zəkəriyyə Özlə bağlı oxşar qərar verdi. M.Akkaş hökumətin qəzəbinə «böyük rüşvət əməliyyatı» ilə bağlı ikinci həbs dalğasını başlatmaq qərarına və baş nazir Ərdoğanın oğlu Bilal Ərdoğanı istintaqa çağırdığına görə gəlmişdi. Zəkəriyyə Öz isə nazir oğlanlarının həbsinə sanksiya vermiş prokurorlardan biri idi və işin araşdırılmasında prinsipiallığı ilə seçilirdi. Lakin məlum əməliyyat zamanı həbs edilən və sonradan sərbəst buraxılan iş adamı Ali Ağaoğlunun son günlər ortaya atdığı iddia Özün işini «bitirmiş» oldu. Ağaoğlu bildirdi ki, ötən ilin oktyabr ayında prokuror Özün ailəsi ilə birgə Dubay səfərini rəhbərlik etdiyi tikinti şirkətlərindən biri maliyyələşdirib və səyahət xərclərinə ümumilikdə 77 min lirə sərf olunub. Lakin prokuror bu iddiaları inkar edərək səfər xərclərinin 4200 dollar tutduğunu və pulu özünün ödədiyini bildirdi. Və ittihamın sübut olunacağı təqdirdə istefa verməyə hazır olduğunu dedi. Lakin hakim və prokurorlarla bğalı şikayətləri araşdıran qurum – Hakimlər və Prokurorlar Yüksək Qurumunun 3-cü Dairəsi bu rüşvət iddiaları ilə bağlı prokurordan addım gözləmədən qərarını verdi və Zəkəriyyə Öz İstanbul baş prokurorunun birinci müavini vəzifəsindən kənarlaşdırılaraq Bakırköy prokurorluğuna təyinat aldı. Qərarda bildirilir ki, İstanbulda həyata keçirilən əməliyyatla bağlı istintaq işinin sona çatmasına baxmayaraq, iş üzrə materiallar məhkəməyə verilməyib. Qərarda həmçinin Zəkəriyyə Özün Dubayda bir tikinti şirkətinin dəvəti ilə tətildə olması iddiası da əksini tapıb.
Gülənin qəzeti rüşvət ittihamını araşdırdı
Z.Özə yönəlik rüşvət ittihamı yerli media arasında əsl savaşa yol açıb. Hökumətin nəzarətində olan media qurumları rüşvət ittihamlarını tiraclayarkən «Gülən camaatının» nəzarətində olan qəzetlər bunu yalanlamağa çalışır. Fətullah Gülənə aid olduğu bildirilən nəşrlərdən biri – «Zaman» qəzeti prokuror Özün Dubayda qaldığı otelin rəhbərliyi ilə danışıb və məlum olub ki, səfərlə bağlı səsləndirilən rəqəmlər heç də deyildiyi kimi deyil. Özün ailəsi ilə birgə istirahət etdiyi Dubaydakı 5 ulduzlu «Cumeirah Zabeel Saray» otelinin səlahiyyətlisi Məhəmməd Əli qəzetə açıqlamasında bildirib ki, otelin ən lüks otağında belə, 4 nəfərin 4 gün qalması üçün ən çoxu 4 min dollar lazımdır. Onun sözlərinə görə bu rəqəmin iddia olunduğu kimi, 77 min lirə (37 min dollar) olması mümkün deyil. Z.Öz və otellə bağlı çıxan xəbərlərdən xəbərsiz olduğunu deyən M.Əli yalan məlumatlara görə məhkəməyə müraciət edə biləcəklərini bildirib.
Z.Öz isə vəzifəsinin dəyişdirilməsi ilə bağlı qərarı təsdiqləsə də, bu dəyişikliyin müvəqqəti olduğunu düşündüyünü və bu səbəbdən köhnə iş yerindən əşyalarını toplamayacağını bildirib.
Polislər mətbuat konfransına niyə gəldi?
Bu gün axşam Z.Öz 20-yə yaxın media mənsubunu açıqlama vermək üçün iş otağında qəbul edib. Lakin toplantı başlayandan bir neçə dəqiqə sonra prokurorun telefonuna zəng gəlib. Öz telefonda danışdığı adama təəccüblə «Otağımdamı?» sualını verib. Sonra isə içəridəkilərə müraciət edərək «polislər bayıra çıxsınlar» deyib. Bir neçə nəfər otağı tərk edib. Prokuror «Otaqda yenə polis varsa, əlini qaldırsın» deyib və bu zaman üç nəfər əlini qaldırıb. «Bura niyə gəlmisiniz? Yaxşı, gəlmisinizsə, polis olduğunuzu niyə deməməmisiniz? Ən azı, əlinizə kağız-qələm alardınız» deyə Öz etiraz edib. Buna cavab olaraq polislər Şişli Təhlükəsizlik Bürosundan gəldiklərini, media açıqlamasını eşitmək istədiklərini bildiriblər. Prokuror gələn polislərin ad və soyadını dəftərçəsinə qeyd edərək sözünə davam edib. Bildirib ki, barəsində irəli sürülən ittihamlarla bağlı bəzi şəxslərə qarşı iddia qaldıracaq. Şikayətin konkret kimlərə qarşı olacağını açıqlamayan prokuror «Bu işləri kimlərin təşkil etdiyini yaxşı bilirəm» deməklə kifayətlənib. Ayın 21-də işə çıxdığım halda iddia edirlər ki, həmin gün səhayətdə olmuşam».
Prokuror Ərdoğanı ifşa etdi
Zəkəriyyə Özün baş nazir Ərdoğanla bağlı açıqlaması isə gündəmə bomba kimi düşüb. Öz bildirib ki, son olaylar zamanı Ərdoğan onun yanına iki nəfər göndərərək xəbərdarlıq edib: «Bursadakı otellərin birində görüşdüyüm bu şəxslər mənə dedilər ki, hörmətli baş nazir sənə çox qəzəblənib, haqqında ağır sözlər deyir, bir məktub yazaraq ondan üzr istəməyimi, hökumətə qarşı araşdırmaları dərhal dayandırmağımı, əks təqdirdə zərər görəcəyimi, vəzifəmdən kənarlaşdırılacağımı deyib».
Öz bildirib ki, gələnlər ona İstanbul Polis İdarəsinə niyə getdiyini və bunun hər kəsi qəzəbləndirdiyini də deyiblər: «Bildirdim ki, rüşvət əməliyyatı çərçivəsində saxlanılan şəxslərin İstanbul Polis İdarəsində ifadələrinin və onlara veriləcək sualların dəyişdirildiyi barədə xəbər aldım. Mən də bunu araşdırmaq üçün idarəyə getdim və sualları möhürlü zərfdə təslim aldım. Baş nazirin göndərdiyi adamlara dedim ki, ən pis halda ölə bilərəm, bu halda da peşəmin şəhidi olaram. Bu cavabımdan sonra mənə çox zərər görəcəyimi dedilər».
Qeyd edək ki, Hakimlər və Prokurorlar Yüksək Qurumunun barəsində araşdırma başlatdığı təkcə Zəkəriyyə Öz deyil. Yanvarın 7-də qurum daha 4 prokuror – Cəlal Qara, Müəmmər Akkaş, Turan Çolakkadı, Oqtay Ərdoğan, həmçinin İstanbulun yeni polis rəisi Selami Altınok haqqında təhqiqat başladılması qərarını verib. Üstəlik qurumun başqanı Əhməd Hamsici bütün üzv hakimlərə mətbuata heç bir açıqlama verməməyi tapşırıb, açıqlama verənlərin məsuliyyət daşıyacağını bildirib.
Nazirdən şok açıqlama
Türkiyənin Ədalət naziri Bəkir Bozdağdan Hakimlər və Prokurorlar Yüksək Qurumunun bu qərarı ilə bağlı şok açıqlama gəlib. Bozdağ bildirib ki, təhqiqata cəlb olunan 9 nəfərdən 3-ü barədə araşdırma aparılmasına icazə verməyəcək. Bunlar İstanbul Cümhuriyyət Prokuroruluğunun Baş prokuroru Turan Çolakkadı, vəkil Oqtay Ərdoğan və İstanbulun polis rəisi Selami Altınokdur. Məlumat üçün deyək ki, S.Ok İstanbul Polis İdarəsinə yeni təyin olunub və onun təyinatında məqsəd Türkiyə polisini nurçu və nurçulara yaxın şəxslərdən təmizləməkdir. Yəni Ok birbaşa Ərdoğan hökumətinin himayə etdiyi kadrlardandır. Baş prokuror Turan Çolakkadı isə Ərdoğan hökumətinin qəzəbinə tuş gələn prokuror Müəmmər Akkaşı ittiham edənlərdən biri idi. Oqtay Ərdoğana gəlincə, görünür, mövqeyi hökumətin mövqeyi ilə üst-üstə düşdyüü üçün nazir onun da müdafiəsinə qalxıb.
Daha 15 polis rəisi işdən çıxarıldı
Türkiyə polisində «təmizləmə əməliyyatı» bu gün də davam etdirilib. Hökumətin qərarı ilə daha 15 şəhərin – Ankara, Diyarbakır, İzmir, Adana, Antalya, Bursa, Kocaeli, Qaziantep, Hatay, Mersin, Trabzon, Samsun, Sakarya, Ərzurum və Malatyanın polis rəisi işdən azad edilib. Qeyd edək ki, Diyarbakırın polis rəisi Rəcəb Güvən «Ergenekon» işinin başladılmasını tövsiyə edən, Sakaryanın polis rəisi Mustafa Aktaş isə «Ergenekon» əməliyyatını idarə edən şəxs kimi tanınır. İşdən çıxarılanlar Ankara polisinə təyin olunublar. Ankaranın polis rəisi postuna isə Kırıkkalenin keçmiş polis rəisi Kadri Kartal gətirilib.
Avropa Birliyndən hökumətə sərt təpki
Bu arada, Avropa Birliyi Türkiyədə polislərin işdən çıxarılmasından narahat olduğunu bildirib və hakimiyyətdən bütün korrupsiya faktlarını araşdırmağı tələb edib. Bu barədə Avropa Komissiyasının rəsmi nümayəndəsi Olivye Bayi məlumat verib: “Çox sayda polisin vəzifəsindən azad edilməsi bizi narahat edir. Biz Türkiyədən namizəd ölkə olaraq Avropa Birliyinə daxil olmaq üçün tələb olunan meyarların yerinə yetirilməsini, o cümlədən hüquqi dövlət prinsiplərinə riayət edilməsi üçün üzərinə öhdəliklər götürməyi tələb edirik. Həmçinin tələb edirik ki, korrupsiya iddiaları ayrı-seçkilik qoyulmadan qərəzsiz şəkildə araşdırılsın, bunun üçün zəruri olan bütün addımlar atılsın».
Gültəkin
