«Müharibə gedən şəraitdə iş adamları daha çox gəlir əldə etmək üçün bütün yollara baş vururlar»
Suriyada mücahidlər Azərbaycan Respublikası Dövlət Neft Şirkətinin (ARDNŞ) – “SOCAR”ın avtomobilini ələ keçirdikləri barədə məlumat yayıblar.
APA-nın məlumatına görə, Bəşər Əsəd qüvvələrinə qarşı Azad Suriya Ordusunun tərkibində vuruşan mücahidlər fotosunu da yaydıqları, üzərində “SOCAR”ın loqotipi əks olunan yanacaqdaşıyan avtomobilin ARDNŞ-ə məxsus olduğunu iddia edirlər.
ARDNŞ-in mətbuat xidmətinin rəhbəri Nizaməddin Quliyev isə APA-ya açıqlamasında həmin avtomobilin üzərindəki “SOCAR” loqotipinin saxta olduğunu bildirib: “Bizim Suriyada heç bir biznesimiz yoxdur və təbii ki, bu maşın da bizə aid ola bilməz. Digər tərəfdən, fotonu böyüdüb, ”O” hərfinə diqqət yetirdikdə, bu loqotipin saxta olduğu aşkar görünür. Başqa ölkələrdə də “SOCAR”ın loqotipinin saxtalaşdırılması hallarına rast gəlinib və bunun qarşısı alınıb. Belə hallar bir daha onu göstərir ki, “SOCAR”-ın işgüzar imici yüksəkdir, onun loqotipindən saxtalaşdırıb istifadə edirlər”.
Hər bir halda yayılan məlumat araşdırma tələb edir.
ARDNŞ-nin Türkiyədə böyük biznesinin olduğunu deyən təhlükəsizlik məsələləri üzrə ekspert Sülhəddin Əkbər nəzəri cəhətdən Suriyada Azərbaycan Neft Şirkətinə məxsus maşının görünməsini mümkün sayır. Ancaq Suriyada indi vəziyyət çox mürəkkəb və qarışıqdır. Orda nə baş verdiyini xüsusi araşdırma aparmadan dəqiqliklə söyləmək çox çətindir.
Ekspertin sözlərinə görə, rəsmi Ankara ilə Bakının münasibətlərini nəzərə alsaq ARDNŞ-in Azad Suriya Ordusuna yardım etməsi daha məqsədəuyğun görünür. Amma biznes maraqları nəzərə alınsa, xüsusilə də müharibə gedən şəraitdə iş adamları daha çox gəlir əldə etmək üçün bütün yollara baş vururlar. Bu baxımdan istənilən halda məsələnin aydınlaşdırılmasına ehtiyac var: “Suriyada Türkiyənin xüsusi maraqları var və Türkiyə xüsusi xidmət orqanları bu ölkədə ciddi çalışırlar. Hər halda Türkyiə xüsusi xidmət orqanları bu məsələni araşdıracaq. Hələlik xüsusi araşdırma aparmadan konkret fikir söyləmək çətindir”.
Fizzə
