Cəmil Həsənli dünən mühüm görüşlər keçirib
Milli Şura sədri Cəmil Həsənli dünən keçirdiyi görüşlərlə bağlı məlumat verib. Onun sözlərinə görə, quruma daxil olan partiya və hərəkatlar, vətəndaş cəmiyyəti nümayəndələri ilə görüşdə qurumun qorunmasının, fəaliyyətinin daha da genişləndirilməsinin, strukturlaşmasının vacibliyi vurğulanıb. Bütün bu məsələlər isə Milli Şuranın qarşıda keçiriləcək sessiyasında müzakirə olunacaq.
“Bu gün mən Milli Şuraya daxil olan partiya və hərəkatların rəhbərləriylə görüşlər keçirdim, telefon danışıqlarımız oldu. Vətəndaş cəmiyyəti hərəkatından olan Milli Şura nümayəndələri ilə də görüşlərimiz oldu. Əsas müzakirələr Milli Şuranın taleyi, onun sonrakı fəaliyyəti ilə bağlı oldu və yaranmış stuasiya, ondan çıxış yolları müzakirə olundu. Hər halda indiyədək olan müzakirələrin ilkin nəticəsi olaraq deyərdim ki, hamı Milli Şuranın qorunub saxlanması, daha da inkişaf etdirilməsi, daha da gücləndirilməsi, Azərbaycan müxalifətinin əsas birlik modelinə çevirilməsi istiqamətində davam etdirilməsində tərədardılar. Qərarlıdılar ki, Milli Şuranın strukturlaşması məsələsi başa çatdırılsın. Milli Şuranın qarşıdakı sessiyasında onun fəaliyyət proqramı, təşkilat mexanizmi, bütövlükdə iş prinsipləri müəyyənləşdirilsin və fəaliyyət davam etdirilsin. Bütün bu məsələlər Milli Şuranın növbəti sessiyasında daha geniş müzakirə olunacaq və təşkilatlarının formalaşması istiqamətində ciddi addımlar gözlənilir. Sessiya hansı istiqamətdə qərar versə, o istiqamətdə getməyə davam edəcəyik”- deyə Milli Şura sədri bildirib.
Natiq Güləhmədoğlu
