Həsən Ruhani: “Partiyalarsız ictimai fikri formalaşdıra bilmərik”
Həsən Ruhani İran prezidenti seçiləndən sonra ölkənin əyalət rəhbərləri ilə ilk toplantısını keçirib.
“Media forum” saytının məlumatına görə, yanvarın 7-də Tehranda keçirilən toplantıda Həsən Ruhani ölkənin durumundan, xalqların hüququndan və qurumaqda olan Urmiya gölündən danışıb.
İran prezidenti ölkədə müxtəlif partiyaların fəaliyyətinin zəruri olduğunu deyib: “Biz 70 milyon nəfərdən çox əhalisi olan bir cəmiyyətdə partiyalarsız ictimai fikri formalaşdıra, insanları siyasi baxımdan inkişaf etdirə bilmərik. Biz insanları siyasi cəhətdən hazırlamalı, onları yönləndirməyi bacarmalıyıq. Bu isə yalnız siyasi qurum və partiyaların fəaliyyətindən asılıdır. İnsanlar zorakılıq və ifratçılıqdan yorulublar. Vəzifə tutan şəxsin hakimiyyətin hansı qanadına bağlı olması onları maraqlandırmır. Onlar vəzifə tutanların xalqa xidmət göstərməsini, problemlərinin həll olunmasını istəyirlər”.
Həsən Ruhani xalqların, etnik qrupların hüququna da toxunub: “İrançılıqla bu və ya digər xalq arasında heç bir fərq yoxdur. Belə ki, ölkədə fars, kürd, türk (azərbaycanlı), lor, bəluc, ərəb və digər etnik qruplar arasında heç bir fərq yoxdur. Onların hamısı iranlı olaraq İran İslam Respublikasının himayəsində yaşayır. Onların hamısının hüququ qorunmalı, bu xalqların nümayəndələrinin fəaliyyət göstərməsinə şərait yaradılmalıdır. Bütün iranlılar isə iranlı olduqları ilə fəxr etməlidir”.
Ruhani qurumaqda olan Urmiya gölündən söz açarkən deyib: “Ətraf mühitin qorunmasına fikir vermədən davamlı inkişaf mümkün deyil. Biz ölkədə bir sıra sədlər tikib suyun təbii axarının qarşısını aldıq və elə bildik ki, bu, inkişafımız üçün zəruridir. Lakin bu əməl Urmiya gölünün qurumağa başlaması ilə nəticələndi. Əgər Urmiya gölünün quruması problemini həll edə bilməsək, milyonlarla insan evlərini tərk etməli olacaq”.
