Səttar Mehbalıyev günahı məhkəmələrin üstünə atır, Ədliyyə Nazirliyi isə susur
Aslan Ismayılov: «Zaur Həsənovun ölümündə Səttar Mehbalıyev qədər hüquq mühafizə orqanları da günahkardır»
Qarabağ qazisi Zaur Həsənovun özünü yandırararq, faciəli şəkildə dünyasını dəyişməsi cəmiyyətdə böyük ajiotaja səbəb oldu. Zaur Həsənovun intihar etməsinə səbəb Azərbaycan Həmkarlar Ittifaqları Konfederasiyasının sədrinin onun mülkünü dağıtdırması olub. Belə ki, Konfederasiyanın iddiası əsasında “Şıx” sanatoriyasının yaxınlığında Z.Həsənovun çayxana kimi işlətdiyi, sonradan balıqxana etdiyi obyekt zəbt olunub.
Qarabağ qazisi uzun müddət bu obyektin qaytarılması üçün mübarizə aparıb, lakin onun şikayətlərinə məhəl qoyulmayıb. Digər tərəfdən, məhkəmələr də bu məsələ ilə bağlı sifarişli qərar çıxarıb. Baş verənlərlə bağlı Zaur Həsənov bütün aidiyyəti orqanlara, Prezident Administrasiyasına müraciət ünvanlasa da heç bir nəticə olmayıb. Nəticədə bir vətəndaş, Qarabağ qazisi intihar həddinə çatdırıldı.
Bu hadisədən sonra hüquqşünaslar bildirdilər ki, dərhal araşdırılma aparılmalı, intihar həddinə çatdırma maddəsi ilə cinayət işi başlanmalıdır. Ancaq bugünə kimi hadisənin günahkarları məhkəmə qarşısına çıxarılmayıb. Ancaq qazinin ölümünə etiraz edən, onun haqqını istəyən gənclər isə həbs olundu.
Baş prokuroluq açıqlamasında bildirmişdi ki, məhkəmə-tibbi ekspertizası təyin edilib və nəticə barədə ictimaiyyətə məlumat veriləcək. Daha sonra qeyri-iş günləri bəhanə edildi.
Digər tərəfdən, Zaur Həsənovu intihar həddinə çatdırmış Səttar Mehbalıyev günahsız olduğunu, məhkəmələrin qərarına əsasən hərəkət etdiyini bildirdi.
Deməli, Zaur Həsənovun faciəli ölümünə görə məhkəmələr də cavabdehdir və Ədliyyə Nazirliyi bu faktlarla bağlı araşdırma aparmalıdır.
Tanınımış vəkil Aslan Ismayılov bildirdi ki, Azərbaycanda məhkəmə, prokurorluq sistemi iflic vəziyyətdədir və yuxarıdan gələn tapşırıqla hərəkət edirlər: “Prokurorluq özünə hörmət etsəydi, Zaur Həsənovun özünü yandırdığı görüntülər yayılandan dərhal sonra cinayət işi açardı. Qeyri-iş günlərinin cinayət işi qaldırılmasına heç bir aidiyyəti yoxdur. Sadəcə olaraq prokurorluqda cəsarət yoxdur ki, qanunu əsas tutub araşdırma aparsın. 100 adam da öldürülsə, göstəriş olmadan heç kimi həbs etməyəcəklər, araşdırma aparılmayacaq. Prokurorun Gülər Əhmədovaya 4 il iş istəməsi, məhkəmənin 3 il verməsi də bu qurumların oyuncağa çevrilməsinin göstəricisidir və bu məqamdan sonra ədalətdən danışmaq artıqdır. Çünki 1 milyon dələduzluğa görə yox, 10 min dələduzluğa görə 10 ilə qədər azadlıqdan məhrumetmə cəzası alan onlarla qadın bu gün də məhbəsdədirlər. Zaur Həsənovun intihar etməsində Səttar Mehbalıyev nə qədər günahkardırsa, məhkəmə və hüquq mühafizə orqanları da o qədər günahkardır. Prokurorluq, məhkəmə, DIN ona görə günahkardır ki, Zaur Həsənov ona qarşı olan qanunsuzluqlar barədə bu qurumların hamısına müraciət etmişdi və heç bir nəticəyə nail olmamışdı. Ən azı Bibiheybətlə bağlı Səttar Mehbalıyevin xeyrinə çıxarılmış bütün məhkəmə qərarları sifarişli olub və bu sifarişləri Ali Məhkəmənin sədri Ramiz Rzayev şəxsən verib. Zaur Həsənovun intiharı ilə bağlı da əgər hansısa göstəriş olacaqsa, bu işlə bağlı kimlərisə həbs edəcəklər. Əks halda hər şey olduğu kimi qalacaq”.
Bir ölkədə müstəqil, ədalətli məhkəmə sisteminin olmaması böyük faciədir və bu fakt bütün vətəndaşlar üçün təhlükə vəd edir. Zaur Həsənovun başına gələnlər də göstərdi ki, ədalətsiz məhkəmə qərarları insan faciəsinə qədər gətirib çıxarır.
Bəs Ədliyyə Nazirliyi həmin məhkəmə qərarlarını araşdırıb, hakimlər haqqında tədbir görəcəkmi?
Səslənən fikirlərə münasibət öyrənmək üçün Ədliyyə Nazirliyinin mətbuat xidməti ilə əlaqə saxlamağa çalışsaq da, gün ərzində bu cəhdimiz baş tutmadı.
