Seymur Həzi: «Türkiyənin gələcəyi Ərdoğanla bağlı görünmür, Ərdoğan erası artıq başa çatıb»
Türkiyədə son baş verən olaylarla bağlı Fətullah Gülənin prezident Abdullah Gülə məktub göndərdiyi məlum olub. Türkiyə mətbuatında gedən xəbərlərə görə, Gülən göndərdiyi məktubu Ərdoğanın da görməsini istəyib. Gülən məktubda tədris müəssisələrinin bağlanmasından qorxduğunu bildirib.
Gülən eyni zamanda 17 dekabr əməliyyatında hökumətə dəstək verən mediadan çəkindiyini də qeyd edib. Mətbuatda yer alan yazıları “qara piar” kimi qiymətləndirən Gülən məktubda yazıb: “Bir qrup media orqanının apardığı qara piar dayansa, mənim dostlarım və tərəfdaşlarımın da susacağından əminəm. Daima çirkin şeylər tirajlayan bəzi medianı dayandırmaq üçün sizin müəyyən addımlar atacağınıza inanıram. Bunu sizdən səmimiyyətlə xahiş edirəm”. Gülən məktubda dövlət məmurlarına əmr vermə mövqeyindən uzaq olduğunu bildirib. O, hökuməti hədəf alan “rüşvət” əməliyyatından sonrakı polis və prokurorluqda təyin və yerdəyişmələrdən narahat olduğunu ifadə edib. Gülən narahatlığını belə bildirib: “Bu mövzuda yalnız vəzifə borcunu yerinə yetirən kəslər haqqında heç bir ittiham olmadan əməliyyatlar edilir. Vəzifələrini qanun çərçivəsində yerinə yetirən dövlət məmurlarının üstünə gedib, onları işlərindən azad etməyin. Bu mövzuda biz sussaq belə vicdanımız susmaz.” Gülən məktubda eyni zamanda “Dostluğumuzu açıq-aşkar pozmağa çalışırlar” cümləsindən istifadə edib.
Ekspertlər bu məktubu əslində Gülənin bir atəşkəs təklifi kimi təqdim edirlər. Eyni zamanda Türkiyədə son baş verən olayların fonunda baş nazir Ərdoğan tez-tez hədəfə alınır. Yayılan bəzi informasiyalara görə, Ərdoğanın iş adamı Rza Zərraba qarşı hazırlanan əməliyyatdan xəbəri var imiş. Eyni zamanda Ərdoğanın Almaniyadakı bank hesablarının nəzarətə götürüldüyü barədə xəbərlər də diqqətdən yayınmır. Ekspertlər hesab edir ki, hazırda baş verənlər adları korrupsiyada hallanan nazirlərdən sonra hədəfin məhz Ərdoğan olacağının işartısıdır.
AXCP Rəyasət Heyətinin üzvü Seymur Həzi bildirdi ki, Türkiyədə Konstitusiya Məhkəməsi, hüquq-mühafizə orqanları dövlətin bir instansiyası kimi özlərini müstəqil apara bilirlər. Məhz bu müstəqilliyin nəticəsi olaraq da Türkiyədə “dərin dövlət anlayışı” meydana gəlib. S.Həzinin fikrincə, son hadisələr nəticəsində aydın oldu ki, Türkiyədəki siyasi aparatın bu orqanlar üzərində nəzarəti heç də göründüyü kimi güclü deyilmiş: “Bu əslində Türkiyədə şəffaflığa xidmət edən prosesdir. Baş verənlər şəffaflığa xidmət etdiyi üçün burada tərəf axtarmaq düzgün deyil. Fətullah Gülənin yazdığı məktubdan da aydın görünür, o da istəmir ki, proses dərinləşsin. Çünki onun haqqında da müəyyən fikirlər səslənir. Baş verənlərdə hamı siyasi tərəfdir. Onlar siyasi tərəf olduqları üçün də baş verənlər ümumilikdə proseslərə ziyan vurur. Çünki onlar ayrı-ayrı qruplaşmalar şəklində bir-birlərinə qarşı olsalar da, Türkiyədəki hökumətə bir konsensus hökuməti demək olar. Ona görə bunlar istəmirlər bu ifşa davam etsin”.
S.Həzinin fikrincə, Türkiyədə baş verənlər onu göstərir ki, hazırkı şəffaflaşma istiqamətində bir qətiyyət var. Və bu növbəti dəfə Türkiyə dövlətinin gücünü artıracaq: “Amma aydın məsələdir ki, Türkiyədə artıq bir era bitmək üzrədir. Bu eranı Gülənçilər və ya Ərdoğan erası adlandıranlar var. Başlanan yeni era Türkiyə dövlətinin nəzdindəki bir prosesdir. Türk xalqı baş verənlərdən yalnız qazanc əldə edəcək”.
Baş verən proseslərin gedişinin növbəti mərhələsində Ərdoğanı hədəf alacağı ilə bağlı söylənilənlərə gəlincə isə, S.Həzi bildirdi ki, Türkiyə hökuməti ciddi suallarla üz-üzədir: “Türkiyədə siyasi proseslər xalqın iradəsi ilə həll olunur. Türkiyə hökuməti hazırda gündəmdə olan suallara cavab vermədikcə, hədəf olaraq qalacaq. Əslində hazırda baş verənlərdə təkcə Türkiyə hökuməti deyil, proseslərə təsir edə bilən bütün qüvvələr hədəfə çevrilib. Ərdoğan xarakter etibarı ilə istefaya, təzyiq qarşısında geri çəkilməyə meyilli bir şəxs deyil. Ona görə ola bilsin ki, Ərdoğan müəyyən müqavimət göstərərək, növbədənkənar seçki təyin olunsun. Amma bir sözü əminliklə demək olar ki, Türkiyənin gələcəyi Ərdoğanla bağlı görünmür”.
Hikmət
