İradə Cavadova: «Sakinlərin əsəblərini artıq tarıma çəkib, onların evsiz qalması ciddi sosial gərginliyə səbəb ola bilər»
Xətai rayonu, Babək prospekti, Ilham Məmmədov küçəsində (NZS) yaşayan 168 ailə yaşadığı mənzillərinin kütləvi şəkildə kompensasiya ödənilmədən söküldüyünü bildirir. Onlar bununla bağlı Insan Hüquqları üzrə Maarifləndirmə Ictimai Birliyinə müraciət edib.
Bu barədə “Azadlıq”a birliyin rəhbəri, hüquq müdafiəçisi Iradə Cavadova məlumat verib. Hüquq müdafiəçisi bildirib ki, məsələ ilə əlaqədar müvafiq dövlət qurumlarına müraciət edilsə də, heç bir nəticəsi yoxdur: “Bu baxımdan da sakinlər məhkəməyə üz tutub. Kompensasiyanın verilməsi tələbi ilə bağlı məhkəmə tikinti-texniki ekspertizası təyin edib, lakin ekspertiza qərəzli aparılıb. Təsəvvür edin ki, ekspertizanın rəyi səkkiz aydan sonra açıqlanıb. Ekspertiza rəyinə əsasən, mənzilin hər kv. metri üçün 150 AZN, əla təmirli mənzil üçün isə 300 AZN məbləğində kompensasiyanın ödənilməsi müəyyən edilib, ekspertiza rəyində mənzillərin sahəsi bilərəkdən az göstərilib.
Bundan başqa, indiyədək də Bakı şəhəri, Xətai rayonu, Babək prospekti, Ilham Məmmədov küçəsində binaların yerləşdiyi torpaq sahəsinin “Azərneftyağ” Neft Emalı Zavodunun ərazisinə daxil olub-olmaması müəyyən edilməyib.
Bir ildən artıqdır davam edən məhkəmə çəkişmələri, işin obyektiv və tam araşdırılmaması sakinlərin əsəblərini artıq tarıma çəkib. 500-dən çox vətəndaşın evsiz qalması ciddi sosial gərginliyə səbəb ola bilər”.
Iradə Cavadova ölkə başçısı Ilham Əliyevin 2011-ci il 9 mart tarixli müşavirəsini xatırladıb: “Prezident həmin müşavirədə Bakı və Bakıətrafı ərazilərdə sənədsiz evlərin sənədləşdirilməsinə dair mexanizmin hazırlanması barədə Bakı Şəhər Icra Hakimiyyətinin başçısına tapşırıq verib. Ilham Əliyevin çıxışını bu işdə məsuliyyət daşıyan məmurların yadına salıram: ”O evlər qeydiyyata alınmalıdır. Amma sirr deyil ki, qeydiyyata alınma zamanı əsassız tələblər də irəli sürülə bilər. Rüşvət, əsassız maraqlar da ola bilər. Bu, reallıqdır. Ona görə də, göstəriş vermişəm ki, bu məsələnin həlli üçün şəffaf mexanizm işlənsin. Biz burada korrupsiyanı, rüşvətxorluğu tamamilə aradan götürəcəyik. Yoxsa, xoşniyyətli təşəbbüs bəzi adamların tamahkarlığı ucbatından bizə problem gətirər. Ona görə, bu mexanizm işlənilməlidir. Çox ciddi təftiş aparılmalıdır ki, hansı evlər qeydiyyata alınsın”.
Bundan əlavə, 2012-ci il iyunun 27-də “Magistral boru kəmərlərinin, yüksək gərginlikli elektrik şəbəkələrinin, nəqliyyat infrastrukturu obyektlərinin və suların mühafizə zonalarında, neft-qaz yataqlarının işlənməsi üçün təsərrüfat subyektlərinin istifadəsində olan torpaq sahələrində inşa edilmiş yaşayış evləri və digər tikililərlə bağlı məsələlərin tənzimlənməsi üçün komissiya yaradılması” haqqında sərəncam da imzalanıb.
Və Prezident Administrasiyası rəhbərinin sədrliyilə xüsusi komissiya yaradılıb. Baş nazirin müavini, daxili işlər, nəqliyyat, ədliyyə nazirləri, iqtisadi məsələlər üzrə prezident köməkçisi, ictimai-siyasi məsələlər, qanunvericilik və hüquq ekspertizası məsələləri, hüquq-mühafizə orqanları ilə iş şöbələrinin müdirləri, əmlak məsələləri üzrə dövlət komitəsinin sədri, Dövlət Torpaq və Xəritəçəkmə Komitəsinin sədri, Bakı şəhər Icra Hakimiyyətinin başçısı, Dövlət Neft Şirkəti prezidenti həmin komissiyanın üzvüdür.
ARDNŞ prezidenti də bu barədə deyib: “Hökumətdə komissiya yaradılıb, bu məsələlərə baxılır. Hansı qərar qəbul olunsa, biz onu yerinə yetirəcəyik. Hökumətin qərarını gözləyirik”.
Komissiya sərəncamda göstərilən torpaq sahələrində inşa edilmiş yaşayış evləri və digər tikililərlə bağlı məsələləri araşdırıb təklifləri üç ay ərzində prezidentə təqdim etməli olduğu halda, təkliflər hələ də təqdim edilməyib. Bundan istifadə edərək insanların evlərinin sökülməsi davam edir”.
