Telman Zeynalov: «Yaşıllıqların məhv edilməsi və zərərli bitkilərin ölkəyə gətirilməsində BŞIH günahkardır»
Azərbaycanda xəstəliklərin çoxalmasına səbəb kimi yaşıllıqların məhv edilməsi, ağacların kütləvi kəsilməsi və ölkəyə gətirilən ağacların insan sağlamlığı üçün təhlükəli olması göstərilir. Mütəxəssislər bildirir ki, xaricdən çox bahalı qiymətə alınan kol bitkiləri dekorativ xarakter daşıyır və havaya zəhərli maddələr buraxır.
Son illər paytaxtda və mərkəzdən kənarda yaşllıq zolağının azalması iqlimə təsirsiz ötüşməyib. Yaşıllıqların məhv edilməsi iqlimin səhralaşmasına səbəb olub. Iqlimin bu cür natarazlaşması səhərlər həddindən artıq isti, gecələr isə soyuqla müşayiət olunur. Təbii ki, havanın belə çirklənməsi insanlar arasında ölümcül xəstəliklərin də sayını artırıb. Həkimlərin həyəcan təbilinə isə hələ ki, heç bir reaksiya verilmir.
“Alimlər hesablayıblar ki, ağcaqayın, yabanı armud və digər bir sıra ağacların yaşıl yarpağının hər kiloqramı 15 nəfər adamı öldürə biləcək benzolu tutub saxlayır. Indi bütün yerli ağaclar qırıldığından havada çirklənmənin səviyyəsi artıb. Havanı təmizləməyin yeganə yolu Bakı meri Hacıabala Abutalıbovu işdən azad etməkdir.
Çünki o fizikdir. Fizika hara, yaşıllıq hara? Onun üçün heç bir fərqi yoxdur, ancaq pul qazansın. Palma ağaclarını gətirib doldurur Bakıya. Onun nə vecinə ki, burda xərçəng xəstəliyi yayılır, əhalinin yarısı qırılır. Odur ki, yeganə çıxış yolu bu sahəni yaxşı bilən insanın vəzifə başına gətirilməsidir”. Bu sözləri modern.az saytına açıqlamasında Milli Ekoloji Proqnozlaşdırma Mərkəzinin rəhbəri, ekoloq Telman Zeynalov bildirib.
“Azadlıq”a açıqlamasında da Telman Zeynalov bu fikirləri təkrar etdi və BŞIH-nin bu məsləyə son qoymalı olduğunu bildirdi: “Azərbaycanın gözəl iqlimi var və bu iqlimə uyğun olan, insan sağlamlığına xidmət edən ağaclar ölkədə çox əkilməlidir. Eldar şamı, akasiya, adi şam ağacları, zeytun və s. əkilməlidir. Ancaq bəzi adamlar sırf kommersiya maraqları, çox pul qazanmaq səbəbindən ölkəyə dekorativ bitkilər gətirirlər. Bu bitkilərin yalnız ziyanı var. Yeni parklar salıblar, bəzəkli ağaclar əkiblər və təbii yaşıllıqları məhv edərək bunu yaradıblar. Koroğlu parkı salıblar. Ola bilər ki, estetik baxımdan gözəldir, ancaq burda əkilən ağaclar lazımsızdır. Bunun birbaşa məsuliyyəti BŞIH-nin üzərin düşür. Yaşıllıqları satırlar və yerində şadlıq sarayları, müxtəlif obyektlər tikilir. Bu haqda dəfələrlə yazılıb, ancaq səmərəsi yoxdur. Ekologiya Nazirliyi hansısa ağacın kəsilməsinə, yaşıllığın məhv edilməsinə münasibət bildirə bilər, müəyyən cəza tətbiq edə bilər. Ancaq BŞIH hansı ərazini kimlərə satması haqda nazirlikdən icazə almır və nazirliyin də bu prosesə müdaxilə etmək imkanı yoxdur. Xaricdən yararsız bitkiləri gətirməklə həm ölkə təbiətini korlayırlar, həm də insanların sağlamlığına ciddi zərbə vururlar”.
Səslənən fikirlərə münasibət öyrənmək üçün BŞIH-nin mətbuat xidməti ilə əlaqə saxladıq. Mətbuat xidmətindən bildirdilər ki, dəqiqləşdirmə aparıb, bayram günlərindən sonra mövqe bildirəcəklər.
