«Azad Demokratlar Partiyası liberal-demokratik xətt tutacaq»
ACP-nin keçmiş sədri Sülhəddin Əkbərin rəhbəri olduğu yeni partiyanın adı açıqlanıb. Iki gün əvvəl partiyanın Təşkilat Komitəsinin 2-ci toplantısı keçirilib. Iclasda yeni təsis olunacaq partiyanın adının Azad Demokratlar Partiyası olması haqda qərar qəbul edilib.
Yeni partiya ACP-dən nə ilə fərqlənəcək və gələcək planları nədən ibarətdir?
“Azadlıq”a açıqlamasında Sülhəddin Əkbər ötən ilin dekabrın 22-də hazırlıq işləri üçün Təşkilat komitəsinə 3 aya qədər vaxt verildiyini bildirdi. Bu müddət martın 22-də başa çatır. Təşkilat Komitəsi məhz bu tarixdə yaranmış vəziyyəti bir daha dəyərləndirib artıq qurultayın vaxtı və yeri haqqında qərar verəcək.
Siyasi-ideoloji xəttə gəldikdə, S.Əkbər Azad Demokratlar Partiyasının liberal-demokratik xətt tutacağını və adına uyğun olaraq müxalifət partiyası olacağını deyir. Yəni strateji baxımdan siyasi-ideoloji xətdə dəyişikliyin olması nəzərdə tutulmayıb. Taktiki məsələlərdə müəyyən dəyişikliklər ola bilər: “Liberal-demokratik partiya olacaq. Ekstermizmdən, radikalizmdən kənar mötədil xətt yürütməyi nəzərdə tuturuq. Milli Şura ilə partiya əvvəlki mövqedə qalacaq”.
ACP-nin lideri Rəsul Quliyevlə münasibətlərə gəldikdə, partiya sədri hələlik Rəsul Quliyevin partiyasının olmadığını bildirdi: “Nə vaxt belə bir partiya olar, o zaman münasibətləri dəyərləndirərik”.
Fizzə
