Vəkillər jurnalistin ev dustaqlığına buraxılması üçün müraciət etməyi də planlaşdırırlar
Həbsdə olan jurnalist Pərviz Həşimlinin vəkilləri yeni ilin ilk iş həftəsində onun həbsinin ev dustaqlığı ilə əvəzlənməsi barədə müraciət verə bilərlər. Bu barədə “Yeni Müsavat”a onun vəkillərindən olan Bəhruz Bayramov bildirib.
Vəkilin sözlərinə görə, yanvarın 7-də məhbus jurnalistlə görüşəcək: “Biz məsləhətləşib dəqiqləşdirəcəyik, ev dustaqlığı ilə bağlı məhkəməyə müraciət etmək fikrimiz var. Həmçinin, istintaq uzanacaqsa, bundan da şikayət veriləcək”. Yeni il ərəfəsində P.Həşimli ilə görüşdüyünü bildirən vəkil onun ürək ağrılarından şikayətləndiyini də vurğulayıb.
P.Həşimli deputatlara, həmçinin ombudsmana müraciət edərək onun yanına getmələrini istəmişdi. Ancaq onun müraciətindən xeyli müddət keçsə də, heç bir deputat, o cümlədən ombudsman müraciətə cavab verməyib.
P.Həşimlinin həyat yoldaşı Ilahə Həşimovanın sözlərinə görə, məhbus jurnalistin müraciətini heç bir deputat nəzərə almadı: “Görünür, deputatlar nədənsə qorxub çəkindilər və buna görə də Pərvizin yanına getmədilər”.
I.Həşimlinin sözlərinə görə, ötən il dekabrın 25-də qapılarına qara maskalı şəxsin gəlməsindən sonra hələ ki, sakitlikdir.
Qara maskalı şəxs həbsdəki jurnalistin evinin qapısını açmağa cəhd etsə də, məhbus jurnalistin həyat yoldaşı qapını bağlayıb. Bununla bağlı I.Həşimli “102″ xidmətinə zəng də edib.
Jurnalist və hüquq müdafiəçisi, AXCP Ali Məclisinin üzvü P.Həşimli sentyabrın 17-də Milli Təhlükəsizlik Nazirliyinin əməkdaşları (MTN) tərəfindən həbs edilib. O, Cinayət Məcəlləsinin 206.3.2-ci (qaçaqmalçılıq) və 228.2.1-ci (qanunsuz olaraq odlu silah əldə etmə, saxlama) maddələri ilə ittiham olunur. Bu ittiham 3 ildən 8 ilədək həbs nəzərdə tutur. Barəsində Səbail rayon məhkəməsi tərəfindən 2 aylıq həbs-qətimkan tədbiri seçilib. Noyabrın 7-də həbs-qətimkan tədbirinin müddəti 3 ay artırılıb. Pərviz Həşimli ittihamları qəbul etmir, hüquq müdafiəçiliyi və jurnalist fəaliyyətinə görə saxta ittihamla həbs edildiyini bəyan edir. “Amnesty International” təşkilatı Pərviz Həşimlini “vicdan məhbusu” kimi tanıyıb.
