Ekspertlər KIVDF-nin «Azadlıq»la bağlı son addımını belə qiymətləndirirlər
Xəbər verdiyimiz kimi KIV-in Inkişafına Dövlət Dəstəyi Fondu növbəti üç ay ərzində layihələrini maliyyələşdirəcəyi mətbuat orqanlarının siyahısına “Azadlıq” qəzetini daxil etməyib. Bu addımını Fond özünə məxsus formada izah edib. “Azadlıq”ın layihəsinin maliyyələşdirilməsi Fondun Nizamnaməsinə, “KIV-lərə maliyyə yardımı müsabiqəsinin qaydaları”na zidd sayılıb. Qəzetin tez-tez məhkəmə çəkişmələrinə çıxması üzündən bank hesabına həbsin qoyulmasını Fond maliyyə vəsaitinin çatdırılmasında ciddi problem kimi qeyd edib. Bu üzdən KİV DF növbəti üç ay üçün «Azadlıq»ın verdiyi layihəni təsdiq etməyib. Bundan başqa xatırladaq ki, KİV DF ötən ilin noyabrın axırlarında qəzetimizin hesabı üzərində həbs faktını bəhanə gətirərək, tərəflər arasında qüvvədə olan layihənin maliyyələşdirilməsini dayandırmışdı. Beləliklə, qəzet oktyabr, noyabr ayları ərzində layihə çərçivəsində nəzərdə tutulmuş işləri tam həcmdə yerinə yetirməsinə baxmayaraq, 20 min manatlıq vəsait qəzetimizə ödənilməyib.
Son zamanlar «Azadlıq» qəzetinə hakimiyyət tərəfindən təzyiqlərin artmasının fonunda baş verənlər birmənalı qiymətləndirilmir.
Arif Əliyev: «Azadlıq»ın layihəsinin maliyyələşdirilməməsi bir bəhanədir və məsələnin siyasi mahiyyət daşıdığına dəlalət edir»
«Yeni Nəsil» Jurnalistlər Birliyinin sədri Arif Əliyev hesab edir ki, qəzetin hesabının vaxtı ilə həbsdə olub-olmamasının məsələyə heç bir aidiyyatı yoxdur və baş verənlər qəzetə təzyiq kimi dəyərləndirilməlidir: «Bu bir bəhanədir. Əgər deyilsəydi ki, qəzetin təqdim etdiyi layihə yaxşı deyil, keyfiyətsizdir o zaman imtinanın səbəblərini başa düşmək olardı. Amma hazırda baş verən bir daha onu göstərir ki, qəzetlərə ayrılan dövlət vəsaiti ümumiyyətlə layihələrin keyfiyyətindən asılı deyil. Bu maliyyə bu və ya digər KİV-lərə subyektiv meyarlar əsasında paylanılır. Həmin subyektiv meyarlar əsasında da «Azadlıq» qəzetinə deyilir ki, növbəti mərhələdə sizə pul verməyəcəyik. Bundan başqa «Azadlıq»a görülən işin pulunun verilməməsi səbəbi kimi hər hansı bir məmur üzündən qəzetin hesabının həbsdə olmasını göstərmək uğursuz cəhddir. Və bu məsələnin siyasi mahiyyət daşıdığına dəlalət edir».
Elçin Şıxlı: «Baş verənləri «Azadlıq» qəzetinin ram edilməsi istiqamətində səylərin davamı kimi qiymətləndirmək olar»
«Zerkalo» qəzetinin baş redaktoru Elçin Şıxlının isə fikrincə, baş verənlər onu deməyə əsas verir ki, «Azadlıq»la əməkdaşlığın dayndırılması üçün göstərilən səbəblər bir bəhanədir və artıq o tapılıb: «KİV DF əvvəl layihələrini altı aydan bir verirdi. İndi müddət bir qədər azaldılıb. Baş verənləri «Azadlıq» qəzetinin ram edilməsi istiqamətində səylərin davamı kimi qiymətləndirmək olar. Belə görünür ki, fond növbəti 3 ay müddətində qəzetin fəaliyyətini izləyəcək. İstədikləri olsa o zaman növbəti maliyyə ayrılacaq».
Qulu Məhərrəmli: «Bu qədər ədalətsiz yanaşma olmaz»
Baş verən halın təqdiredici olmadığını deyən tanınmış jurnalist Qulu Məhərrəmli bildirdi ki, qəzetlər arasında ayrıseçkiliyin salınması arzu olunan hal deyil: «Bu arzulanan, təqdir edilən hal deyil. Qəzetlər arasında qeyri-bərabərlik yaratmaqdır. Bu halı məqbul saymaq olmaz. Hesab edirəm ki, KİVDF bununla bağlı fərqli qərar verə bilər. Hamının gözü önündə bu qədər ədalətsiz yanaşma olmaz».
Hikmət
