Yaralılar DİN-in Bakıdakı hərbi hospitalına göndəriliblər
Sabirabad rayonunda ağır yol qəzası baş verib.
“Daewoo” markalı, “10 VZ 725” dövlət nömrə nişanlı avtomobil gecə saatlarında Hacıqabul-Bəhrəmtəpə yolunun 18-ci kilometrliyində Şəhriyar kəndi ərazisində qəzaya uğrayıb. Sürətlə hərəkətdə olan avtomobil sərt döngədə yoldan çıxaraq aşıb.
Nəticədə sürücü – 1993-cü il təvəllüdlü Məmmədov Abbas Əlmirzə oğlu və sərnişinlər – Sumqayıt sakini, 1990-cı il təvəllüdlü Nuriyev Azər Akif oğlu və 1981-ci il təvəllüdlü Mirzəyev Elxan ağır bədən xəsarətləri ilə Şirvan şəhər Xəstəxanasının reanimasiya şöbəsinə yerləşdiriliblər. Avtomobildə olan hər üç şəxs Daxili Qoşunların Hacıqabul rayonunda yerləşən N saylı hərbi hissəsində müddətdən artıq xidmət edən hərbi qulluqçulardır.
Yaralılar DİN-in Bakıdakı hərbi hospitalına göndəriliblər. Faktla bağlı araşdırma aparılır.
APA