Deputatların xidməti maşınları, dövlət tərəfindən ev təminatı, qanuna zidd olsa belə, biznes imkanları var. Maaşları da xeyli yüksəkdir. Hətta kefləri istəyəndə 20 sərəncama formalaşan müəllim maaşından daha artığını, bir dəyişikliklə öz maaşlarına əlavə etmək problemləri də yoxdur.
Cəza dəstəsi olan hakimlər də eyni imtiyazların sahibidirlər. Bəs saatı bir manata dərs deyən müəllimin maaşı? Niyə hər seçkidə onbaşı, yüzbaşı sistemi yaradıb ölkəni başsız qoyan, daha doğrusu, başsızlaşdıran bu təbəqə həmişə diqqətdən kənar qalır. Nə üçün? Axı nə üçün bu münasibətə rəğmən, onlar seçki saxtakarlığında hakimiyyətin yanındadır? Maddi təminat, zor, aldadıb ələ alma, yoxsa başqa, daha ciddi səbəbdir onları seçki tamaşasında baş ifaçı edən? Bu suala sadə cavab vermək istərdim, lakin təəssüf ki, bu məsələ göründüyündən xeyli qəlizdir. Amma saxtakarlıqda rol almalarına səbəb kimi göstərdikləri üç əsas məqamın üzərində dayanmaq olar. Əvvala, onlar çoxdur, lap çox. Hətta keçirilən istənilən seçkinin taleyini həll edəcək qədər çox. Demək, zor, saxtakarlığda rol almağa səbəb ola bilməz. Heç hakimiyyətin də buna imkanları çatmaz. Ikincisi, onların maddi təminatı çox aşağıdır, həyatlarından narazıdırlar. 20 il, saxtalaşdırılan 10 seçki və 120-250 manat arası əmək haqqı. Hələ bu məvacibin aylıq istehlak səbətinin harasında qaldığını demirəm. O zaman maddi təminat da səbəb kimi aradan qalxır.
Üçüncüsü, onları aldadaraq seçki saxtakarlığına, dövləti cinayətə sövq edilmələri iddiasıdır ki, bu, heç ağlabatan səbəb deyil. 20 ilə 120 manat əməkhaqqına layiq görülən müəllimi, maddi vədlərlə aldatmaq mümkündürmü? Bir sözlə, hələlik onlar ölkəmizin həyatında, insanlarımızın yaddaşında yaxşı heç nə ilə yadda qalmır. Bəli, bunun adı qəsddir. Millətə, dövlətçiliyə, müəllim adına qəsd. Heç onların “Alternativ yoxdur, kimi dəstəkləyək?” sualının qarşısında aciz qalıb, gələcəyə şübhə, özünüzə, mübarizənizə nifrət etdiyiniz anlar olubmu? Sizi bu sualın qarşısında aciz qoyan 70 yaşı, 40 il təcrübəsi olan bir müəllim olsa necə, onun alternativ axtarışını sakit, səmimi qarşılaya bilərsinizmi? Özünün seçki saxtakarlığına haqq qazandırmaq üçün “alternativ yoxdur” deyib haray çəkən müəllim, millətin kürəyinə saplanmış xəncər deyilmi? Hətta onun alternativ axtarışını səmimi qəbul etsək belə, xeyli suallar çıxır ortaya. Axı kim yetişdirməlidir alternativi? Əziz müəllim, alternativ yetişdirmək sənin də işin deyilsə, kimin işidir? Iki yüz minə yaxın müəllim bir prezidentə alternativ yetişdirə bilmirsə, ölkəsinin bərbad, vətəndaşının qısır olmasını etiraf edirsə və həm də bunun səbəbkarı özüdürsə, bunun adı qəsd deyil, bəs nədir? Dünyanın harasında alternativlər yetişdirməli olan müəllim, onun axtarışındadır?
