KIV-ə Dövlət Dəstəyi Fondu qəzetin layihəsini maliyyələşdirməmək qərarı verdi
Fond «Azadlıq»a borcunu da ödəmək istəmir…
Dünən KIV-in Inkişafına Dövlət Dəstəyi Fondu növbəti üç ay ərzində layihələrini maliyyələşdirəcəyi mətbuat orqanlarının adlarını açıqlayıb. Son illər ərzində ilk dəfə siyahıda “Azadlıq” qəzetinin adı yoxdur.
Fondun icraçı direktoru Vüqar Səfərli deyib ki, ümumilikdə 36 layihə təklifi daxil olub. Fond bunlardan 34-nü maliyyələşdirmək qərarı verib. Yerdə qalan iki qəzetdən biri “Azadlıq”, digəri isə “Bütöv Azərbaycan”dır.
Fondun bu haqda yaydığı məlumatdan belə məlum olur ki, iclasda Müşahidə Şurasının üzvləri Bəxtiyar Sadıqov, Vüqar Rəhimzadə, Faiq Qurbanov, Intiqam Hümbətov, Müşfiq Ələsgərli, Rəşad Məcid, Vüqar Əliyev çıxış edərək deyib ki, “Azadlıq”ın layihəsinin maliyyələşdirilməsi Fondun Nizamnaməsinə, “KIV-lərə maliyyə yardımı müsabiqəsinin qaydaları”na ziddir: “Azadlıq” qəzeti Fond tərəfindən əvvəllər ayrılmış maliyyə yardımlarının icrası zamanı ciddi nöqsanlara yol verib. 11 və 14 oktyabr 2013-cü il tarixlərində “Azadlıq” qəzetinin rəhbərliyinə mövcud nöqsanların aradan qaldırılması barədə xəbərdarlıq edilib. Əlavə olaraq, qəzet tez-tez məhkəmə çəkişmələrinə çıxdığından və nəticədə bank hesabına həbslər qoyulduğundan, Fond, bu qəzetə ayırdığı maliyyə vəsaitinin çatdırılmasında problemlərlə qarşılaşıb”.
“Azadlıq” qəzeti baş redaktorunun birinci müavini Rahim Hacıyev bildirib ki, bu qərar 2013-cü il ərzində hakimiyyətin “Azadlıq” qəzetinə qarşı apardığı təzyiq kampaniyasının son akkordudur: “Xatırlatmaq yerinə düşər ki, qəzetə qarşı fevral ayında Tağı Əhmədovun iddiası üzrə 30 min, iyulda Kəbirə Məmmədovanın iddiası əsasında 32 min manatlıq məhkəmə cəriməsi kəsilib. Seçkidən dərhal sonra Kəbirə Məmmədovanın iddiası üzrə 32 min manatlıq cərimənin on gün ərzində ödənilməsi tələbi qoyuldu. Lakin ağır maliyyə vəziyyəti üzündən bu məbləği ödəyə bilməyən qəzetin bank hesabına həbs qoyuldu. Daha sonra Tağı Əhmədov məhkəmə qətnaməsilə müəyyən olunmuş cərimənin hissə-hissə ödənilməsi barədə məhkəmə qaydasında olan razılaşmanı pozaraq, 30 min manatın dərhal ödənilməsini tələb etdi. Noyabrın axırlarında KIV-ə Dövlət Dəstəyi Fondu qəzetin hesabı üzərində həbs faktını bəhanə gətirərək, layihənin maliyyələşdirilməsini dayandırdı. Beləliklə, qəzet oktyabr, noyabr ayları ərzində layihə çərçivəsində nəzərdə tutulmuş işləri tam həcmdə yerinə yetirməsinə baxmayaraq, 20 min manatlıq vəsait ödənilmədi. Üstəlik, dövlət yayım firması olan ”Qasid” qəzetin satılmış nüsxələrinin pulunu ödəmir. Firmanın “Azadlıq”a olan borcu 65 min manatı keçib. Görünür, “Azadlıq”a qarşı bu vaxta qədər olan təzyiqlər qəzeti susdurmaq planının həyata keçirilməsi üçün kifayət etmədiyindən, 2014-cü ilin ilk üç ayı üçün nəzərdə tutulan layihənin maliyyələşdirilməsindən də imtina olundu”.
Rahim Hacıyev bildirib ki, bu son qərar “Azadlıq”ın fəaliyyətinin dayandırılmasına nail olmaq üçün çoxdan düşünülmüş çoxgedişli kambinasiyanın yalnız bir elementidir: “Nəzərə almaq lazımdır ki, KIV-ə Dövlət Dəstəyi Fondu prezident yanında yaradılmış bir strukturdur. Fondun qəbul etdiyi qərarların yüksək instansiyalardan gələn məsləhətlər nəticəsində verilməsi heç kimdə şübhə doğurmur. Peşəkarlıq səviyyəsi ”Azadlıq”la heç bir müqayisəyə gəlməyən qəzetlərə heç bir irad tutulmaması hakimiyyətin “Azadlıq”a olan sərt mənfi münasibətinin nəticəsi kimi qiymətləndirilməlidir. Bütün bunlar o deməkdir ki, yaxın aylar “Azadlıq” qəzeti üçün əsl ölüm-dirim dövrü olacaq. “Azadlıq”ın mübariz və fədakar kollektivi qəzetin kursuna bundan sonra sədaqətini qorumaqla fəaliyyətini davam etdirməkdə qərarlıdır”.
İnformasiya şöbəsi
