Tatyana Çeronovol xəstəxanadan «məni qorxuda bilmədiniz» mesajını göndərib
Dekabrın 25-nə keçən gecə döyülərək kəllə-beyin travması alan ukraynalı jurnalist Tatyana Çernovol reanimasiyadan çıxıb. Lakin jurnalistin vəziyyətinin hələ də ağır olduğu bildirilir. Bu barədə T.Çernovolun həyat yoldaşı Nikolay Berezovıy məlumat verib. Onun sözlərinə görə, aldığı travmadan və beyin silkələnməsindən Tatyana demək olar ki, bütün günü yatır: «Vəziyyətinin yaxşılaşması və Yeni ildə xəstəxanadan çıxacağı ilə bağlı yayılan xəbərlər həqiqəti əks etdirmir. Bu xəbərlər günahkarların məsuliyyətdən kənarda saxlanılmasına xidmət edir. Həqiqətləri üzə çıxarmağın yeganə yolu cinayət işinin «öldürməyə cəhd» maddəsi üzrə başladılmasıdır. Onu ölməsi üçün döyüblər. Xanımın ona görə narahat olan hər kəsə minnətdarlıq edir və bildirir ki, onu qorxuda bilməyiblər».
N.Berezovıy bildirib ki, Tatyana ona hücum edənləri tanıya bilib. Milisin təqdim etdiyi fotolardakı şəxslərdən biri jurnalisti döyənlər arasında olub. Lakin istintaq sirrini yaymamaq üçün hələlik bu şəxsin adı açıqlanmır.
Qeyd edək ki, “Ukrainskaya pravda” qəzetinin müxbiri, eyni zamanda «Avromeydan» fəallarından olan Tatyana Çornovol dekabrın 25-nə keçən gecə hücuma məruz qalıb. Onun avtomobilinin qarşısını kəsən naməlum şəxslər jurnalisti vəhşicəsinə döyüblər. T.Çornovol ağır bədən xəsarətləri və kəllə-beyin travması ilə xəstəxanaya yerləşdirilib. Jurnalist hadisədən bir gün əvvəl şəxsi bloqunda daxili işlər naziri Vitali Zaxarçenkonun şəhər kənarındakı nəhəng yaşayış komleksinin şəkillərini yayıb. T.Çornovolun məhz bu səbəbdən cəzalandırıldığı ehtimal edilir. İstintaq bu işdə müxalifətin əlinin olduğunu iddia etməyə çalışsa da, hələlik ortada bunu təsdiq edəcək dəlillər yoxdur. «Avromeydan» fəalları hadisədən sonra iki dəfə piket, bir dəfə də mitinq keçirərək Tatyana Çernovolu döyənlərin cəzalandırılmasını, istintaqın obyektiv və şəffaf aparılmasını tələb ediblər. Eyni zamanda nüfuzlu beynəlxalq qurumlar da Ukrayna hökumətinə eyni tələblərlə müraciət ediblər.
Gültəkin
