Korrupsiyaya yol vermiş adamlar niyə məsuliyyətə cəlb olunmur?
Müzəffər Baxışov: «Şəxs korrupsiya cinayətinin subyektidirsə CM-nin 311-ci maddəsinə görə məsuliyyətə cəlb olunmalıdır»
“Ünvanlı sosial yardımlarla bağlı şikayətlərin sayı kəskin şəkildə azalıb”. Lent.az-ın məlumatına görə, bunu əmək və əhalinin sosial müdafiəsi naziri Səlim Müslümov bildirib. Onun sözlərinə görə, istər nazirliyin “qaynar xətt”inə (102 xidməti), istərsə də Baş Prokurorluğun Korrupsiya Qarşı Mübarizə Idarəsinin “qaynar xətt”inə gələn müraciətlərdə xeyli azalma müşahidə edilir. “Baş Prokurorluğa daxil olan müraciətlərin hər biri nazirliyə göndərilir və onların hər biri ilə şəxsən özüm tanış oluram”.
Nazir qeyd edib ki, artıq indiyə qədər 25-dən yuxarı sosial müdafiə mərkəzinin direktoru, onların müavinləri işdən azad olunub. “Sosial müdafiə mərkəzlərindən 130 nəfərə yaxın baş məsləhətçi, məsləhətçi və digər işçilər işdən azad olunub”.
Nazirin sözlərinə görə, prezidentin bu sahədə bütün sistemin sağlamlaşdırılması tapşırığı var və ona əməl olunacaq.
Işdən azad olunanlara qarşı hər hansı cəza tədbirlərinin görünməsinə gəlincə, nazir qeyd edib ki, onları işdən çıxarmaqla nazirliyin missiyası başa çatır: “Onlarla bağlı ciddi araşdırmanın aparılması başqa hüquqi prosedurdur”.
Qeyd edək ki, ölkə başçısı Ilham Əliyev də Səlim Müslümovun fəaliyyətini dəstəkləmişdi və bu sahədə korrupsionerlərə, cinayətkarlara yer olmadığını bildirmişdi.
Maraqlı məqam ondan ibarətdir ki, öz vəzifəsində korrupsiyaya yol vermiş adamlar yalnız işdən çıxarılmaqla cəzalanır.
Bəs, bu cinayət törətmiş, korrupsiyaya bulaşmış adamlar dərhal hüquqi müstəvidə cəzalandırılmalı deyilmi?
Hüquqşünas Müzəffər Baxışov bildirdi ki, cəmiyyət tamamilə korrupsiyaya bulaşıb və korrupsiya ilə mübarizə yalnız görüntü xarakteri daşıyır: “Işdən çıxarılan şəxslər korrupsiya cinayətinin subyektidirsə CM-nin 311- ci maddəsi ilə məsuliyyətə cəlb olunub cəzalandırılmalıdır. Ancaq, ƏƏSMN-də elə şəxslər var ki, onları bu maddə ilə məsuliyyətə cəlb etmək olmur. Çünki, bu sektorda ən çox korrupsiyalaşmış sahə sosial yardılmların təyin edilməsi sahəsidir. Bu yardımlar komissiyalar tərəfindən təyin edilir və burda rüşvət alan şəxs elə bir məmurdu ki, o vəzifəli şəxs sayılmır. Ona görə də bu adamları cinayət məsuliyyətinə cəlb etməkdə problem yaranır. Ancaq, bu sektorda xeyli vəzifələr var ki, bu vəzifələri tutan adamları məsuliyyətə cəlb etmək mümkündür. Azərbaycanda korrupsiya ilə bağlı elə vəziyyət yaranıb ki, cəmiyyət korrupsiyaya bulaşıb və bütün cəmiyyəti cinayət məsuliyyətinə cəlb etmək mümkün deyil. Yəni, vəzifədə olanlar rüşvət alaraq, vəzifədə olamayanlar rüşvət verərək məsuliyyət daşıyırlar. Korrupsiyaya görə məsuliyyətə cəlb etmə dövlətin planlı siyasətinə daxildir. Hər ay 5-6 müxtəlif sahələrin nümayəndələrin korrupsiyaya görə həbs edirlər və korrupsiya ilə mübarizə görüntüsü yaradırlar”.
