İran prezidentinin Babək Zəncaninin cəzalandırılması ilə bağlı göstəriş verdiyi bildirilir
İsrail mətbuatı: «Son olaylar Ərdoğanın yanlış hesablamalarının və xarakterindəki zəifliklərin nəticəsidir»
Türkiyə mətbuatının gündəminə “böyük rüşvət əməliyyatında” həbs edilən iş adamı Rza Zərrabla əlaqələrinə görə gündəmə gələn iranlı milyarder Babək Zəncani haqda yeni məlumatlar üzə çıxıb. Iran mediasının yazdığına görə, prezident Həsən Ruhani ölkəyə qarşı beynəlxalq sanksiyalardan haqsız qazanc əldə edənlərlə bağlı araşdırma aparmaq göstərişi verib. Və həmin siyahıda Babək Zəncaninin də adı var.
Ruhani bir ay vaxt qoydu
Ruhani bu qərarı Türkiyə mediasının bəzi iranlı iş adamlarının sanksiyalar sayəsində qısa müddətə böyük sərvətə sahib olması iddialarından sonra verib. Iranın “Mehr” agentliyinin yaydığı məlumata görə, Ruhani köməkçisi Isaq Cahangiriyə göndərdiyi məktubda sanksiyaları yararaq böyük pullar qazanan şəxslərin müəyyən edilərək üzə çıxarılmasını və cəzalandırılmasını istəyib. Iran lideri bildirib ki, ölkəsinin inkişafı üçün iqtisadi fəaliyyətlərin şəffaf və etibarlı şəraitdə həyata keçirilməsi çox vacibdir. Iddialara görə, prezident məktubunda “Xüsusi imtiyazlarla, korrupsiya və haqsız qazanc yolu ilə zəngin olanların cəzalandırılması üçün təcili tədbirlər görülməlidir”, deyə qeyd edib. Ruhani araşdırmanın bir ay ərzində yekunlaşdırılıb adların müəyyən edilməsini və yekun hesabatın ona təqdim olunmasını tapşırıb.
Türkiyə mətbuatı Zəncaninin R.Zərrabdan aldığı qızıl müqabilində Ankaraya neft satdığını və bundan milyonlar qazandığını iddia edir. Zəncani isə bir neçə gün əvvəl açıqlama yayaraq Türkiyə mediasında haqqında çıxan xəbərləri yalanlamış və fəaliyyətində heç bir qanunsuzluğa yol vermədiyini bəyan etmişdi. Iş adamı bildirmişdi ki, onu bu cür yalan xəbərlərlə bezdirməyə çalışmasınlar və zərurət varsa, ticari fəaliyyəti ilə bağlı bütün sənədləri təqdim edə bilər. O, Ərdoğanın liderliyinə etibar etdiyi üçün Türkiyəyə iri həcmli sərmayələr yatırdığını və bu fəaliyyətini bundan sonra da davam etdirəcəyini bildirmişdi.
39 yaşlı iş adamının 13,5 milyardlıq sərvətə sahib olduğu bildirilir.
Ərdoğandan prokurora hədə: “Gözlə, səninlə işimiz olacaq”
Baş nazir Rəcəb Tayyib Ərdoğan dünən Manisada xalqla görüşüb və gündəmində yenə “böyük rüşvət əməliyyatı” olub. Ərdoğan bildirib ki, dövlətin içində paralel dövlət qurmaq istəyənlərin cəhdi baş tutmayacaq: “Kim olursa-olsun qarşılarında bizi görəcək. Bir prokuror çıxır, vəzifəsindən fərqli şəkildə istifadə edir. Məxfi sənədləri özü ilə aparır və bəzi media qurumları ilə birgə onlardan istifadə edir. Bir çox günahsız insana iftira atmağa çalışır. Bu insanlar tərtəmiz olsalar da, sabah camaatın üzünə necə çıxacaqlar? Bu necə prokurordur? Gözlə hələ, səninlə işimiz olacaq. Ədalət sarayının önündə ədalət yox, məlumat paylayırsan. Hansı prokuror küçəyə çıxıb məlumat paylayar? Korrupsiya bizim düşmənimizdir. Atamızın oğlu da olsa, bu məsələyə göz yummarıq. Biz sadəcə onu deyirik ki, istintaq qeyd-şərtsiz hökmran ola bilməz. Hökmranlıq qeyd-şərtsiz millətdədir”. Baş nazir bir vaxtlar CHP-nin keçmiş sədri Dəniz Baykala qurulmuş tələdən də danışıb: “Hörmətli Baykalı bir kasetlə aradan götürdülər. Iş indi ortaya çıxır. Demək ki, bu işin arxasında biriləri var. Öz başqanına bu tələni quran ölkəyə hər şeyi edər”.
Bilal Ərdoğana göndərilən çağırış vərəqəsi mediaya çıxdı
Yeri gəlmişkən, Ərdoğanın günlərdir tənqid atəşinə məruz qoyduğu prokuror Müəmmər Akkaşın baş nazirin oğlu Bilal Ərdoğana göndərdiyi istintaqa çağırış vərəqəsi mətbuatda yayılıb. Qeyd edək ki, yerli mətbuat Akkaşın təlimatı ilə Türkiyədə ikinci həbs dalğasının başlanacağından yazmış və siyahıda bir çox tanınmış simalarla yanaşı, baş nazirin oğlu Bilal Ərdoğanın da yer aldığını bildirmişdi. Məhz bu xəbərdən sonra hökumət “rüşvət əməliyyatının” araşdırmasını M.Akkaşdan alaraq başqa bir prokurora həvalə etmiş və prokuroru gizli sənədləri özbaşına mətbuata yaymaqda ittiham etmişdi. Akkaş da açıqlama verərək işin ondan təzyiq yolu ilə, üstəlik heç bir əsas gətirilmədən alındığını bəyan etmişdi. Həmin ərəfədə hökumət belə bir qərar da qəbul etmişdi ki, bundan sonra prokurorlar Baş prokuror və valinin xəbəri olmadan hər hansı təhqiqat başlada bilməzlər. Lakin üzərindən çox keçməmiş Türkiyənin ali ədliyyə qurumlarından olan Danıştay qərarın ləğvi barədə qərar vermişdi. Bu isə o demək idi ki, prokurorlar əvvəllər olduğu kimi, təhiqat başlatmaq üçün “yuxarıları” xəbərdar etməyə bilərlər.
Dünən mətbuatda Bilal Ərdoğana ünvanlanan məlum bildirişin fotosu yayılıb və bununla da baş nazirin istintaqa çağırılması ilə bağlı xəbərlər təsdiqini tapıb.
“Ərdoğan siyasi dahidir, amma…”
Dünya mətbuatı Türkiyədə yaşanan qalmaqalı gündəmədən çıxarmır. Dünən Israilin tanınmış “Haartez” qəzeti də ölkəni silkələyən “rüşvət əməliyyatından” yazıb və məqaləni “Ərdoğan projektorlar altında: ittihamlar, korrupsiya və tələlər” başlığı ilə təqdim edib. Məqalə müəllifi Türkiyədəki son olayları baş nazir Ərdoğan üçün dönüş nöqtəsi adlandırıb: “Ərdoğanın siyasi dahi olduğuna şübhə yoxdur. Amma bir zamanlar sahib olduğu güc tükənmək üzrə ola bilər”. Qəzet yazır ki, türk baş nazirin uğurları danıla bilməz, amma son baş verənlər həm də onun yanlış hesablamaları və təbiətindəki zəifliklərdən qaynaqlanır. Müəllifin fikrincə, Ərdoğanın zəif tərəflərindən biri də onun müxalif fikirlərə dözümsüz olmasıdır. Sonda qeyd olunur ki, korrupsiya ilə bağlı iddialar həqiqətdirsə, Ərdoğanın bu proseslərdən təsirlənməməsi mümkün deyil: “Ərdoğanın önündə çətin bir yol var və bu yolculuqda bütün ölkəni özü ilə aparır”.
Gültəkin
