Eyyub Hüseynov: «Bayramqabağı belə məhsullar geniş alındığından ölkəyə hər vasitə ilə gətirilir»
Bayram günləri ərəfəsində bəzi şəxslər təhlükəsizlik standartlarına cavab verməyən, insan sağlamlığına mənfi təsir göstərən malları, pirotexniki vasitələri qaçaqmalçılıq və digər qanunsuz yollarla Azərbaycana gətirməkdə davam edir. Bu barədə Dövlət Gömrük Komitəsindən APA-ya verilən məlumatda bildirilir ki, təkcə Tovuz Gömrük Idarəsinin tabeliyində olan sərhəd-gömrük postlarında pirotexniki vasitələrin gizli keçirilməsi cəhdinə dair 19 fakt üzrə araşdırma başlanıb.
Həmin pirotexniki vasitələrin əksəriyyəti Çin istehsalı olan fişənglər, xırda petardlar olub. 11 fakt üzrə toplanmış materiallar məhkəməyə göndərilib, 8 fakt üzrə isə araşdırmalar davam edir.
Ümumiyyətlə, hər bayram ərəfəsində ölkəyə yüksək səsli məhsullar gətirilir. Cəmi 2-3 gün istifadə olunan bu məhsulları hər il rəsmi səviyyədə qadağan etsələr də, problem yerində sayır. Maraqlıdır, bu qədər məhsul gömrük nəzarətindən necə gizli keçirilə bilər? Komitə sözügedən problemin qarşısını almaqda bu qədərmi acizdir?
Azad Istehlakçılar Birliyinin sədri Eyyub Hüseynov deyir ki, Gömrük Komitəsi istəsə, bu problemin kökünü kəsə bilər. Amma əhalinin bu məhsula tələbi olduğu, hər bayramqabağı belə məhsullar geniş şəkildə alındığı üçün ölkəyə hər vasitə ilə – istər qaçaqmalçılıq, istərsə də cürbəcür gizli yollarla gətirilir: “Qaçaqmalçılıq bütün ölkələrdə olur. Azərbaycanda da bu məsələ tam həll edilə bilmir. Cürbəcür gizli yollarla bazara belə məhsullar daxil olur. Gömrük Komitəsi istəsə, vəziyyəti 80 faiz nisbətində dəyişə bilər. Lakin bu problemin qarşısını 100 faiz almaq çətindir. Çünki bazar öz xüsusi, tələb və təklif aksiomuyla işləyir”.
Nigar
