Dəmiryol vağzalı partladıldı; kamikadzenin başı tapıldı; çoxlu sayda ölən və yaralanan var
Teraktı həyata keçirənin kimli haqda fərqli versiyalar var; hadisəyə ekspert rəyi
Rusiyanın Volqoqrad şəhərində dünən «Volqoqrad-1» dəmiyol vağzalında baş verən partlayış nəticəsində 16 nəfər dünyasını dəyişib, 34 nəfər isə ağır xəsarət alıb. “BBC Rusiya”nın məlumatına görə, xəsarət alanlardan 9-nun durumu daha ağırdır. Ölənlərdən biri azyaşlı qız uşağı, 4-ü isə təhlükəsizlik xidmətinin əməkdaşlarıdır. Hüquq-mühafizə orqanları faciədən dərhal sonra yaydıqları rəsmi məlumatda partlayışın terror aktı olduğunu bildirərək, müvafiq maddə ilə cinayət işi açıblar. Region rəhbərliyi baş verən hadisə ilə bağlı 2014-cü il yanvarın birindən üçünə qədər matəm elan edib.
Onu da qeyd edək ki, bu il oktyabrın sonunda da bu şəhərdə terror hadisəsi baş vermişdi. Krasnoyarsk rayonunda hərəkət edən avtobusun salonunda bomba partladılması nəticəsində 6 nəfər və hadisəni törədən qadın həyatını itirmişdi. 40 nəfər isə xəsarət almışdı. Terror hadisəsini 30 yaşlı Naida Asiyalovanın törətdiyi bildirilirdi.
Terror aktı ilə bağlı Rusiya DİN-dən verilən məlumata görə, hadisə vağzalın birinci mərtəbəsində giriş qapısı ilə turniketin arasında baş verib. Partlayışdan dərhal sonra hadisə yerinə gələn hüquq-mühafizə orqanlarının əməkdaşları ərazini mühasirəyə alıblar. Axtarışlar nəticəsində bir neçə saat sonra hüquq-mühafizə orqanlarının əməkdaşları partlayışı törədən qadın terrorçunun başını tapıblar.
Bu tapıntı kamikadzenin şəxsiyyətini müəyyənləşdirməyə kömək edib. Terrorçu Dağıstanlı Oksana Aslanovadır. O.Aslanova iki dəfə ərdə olub. Onun hər iki əri Dağıstandakı hərbi qruplaşmaların üzvləri olublar. O da məlum olub ki, O.Aslanova oktyabrın sonunda bu şəhərdə avtobusda terror aktını törədən N.Asiyalovanın rəfiqəsidir.
Bu arada “İnterfaks” agentliyi terrorçu ilə bağlı fərqli versiya irəli sürüb. Agentliyin yaydığı məlumata görə, partlayışı slavyan görkəmli Pavlov soyadlı kişi törədib. Pavlov soyadı digər versiyalarda da hallanır. Pavlovun Oksana Aslanova ilə əlbir olduğu ehtimalı var.
Qurbanların sayı daha çox ola bilərdi
Rusiya İstintaq Komitəsi terrorçunun özünü vağzaldakı metalaxtaranların qarşısında, polis əməkdaşı ona yaxınlaşarkən partlatdığını açıqlayıb. Məlumata görə, hadisənin qurbanları bir qədər də çox ola bilərdi. Amma təhlükəsizlik sisteminin işə düşməsi nəticəsində terrorçu sərnişinlərin gözləmə zalına daxil ola bilməyib. Ekspertlərin rəyinə görə, əgər qadın zala daxil ola bilsəydi, faciənin qurbanlarının sayı on dəfə arta bilərdi. Çünki partlayış baş verən zaman gözləmə zalında üç qatarın gecikməsi üzündən xeyli sayda insan cəmlənmişdi. Digər bir tərəfdən Moskva qatarının vağzala çatmasına yarım saat qaldığından terrorçu böyük növbələr üzündən insanların gur toplaşdığı yerə vaxtında çata bilməyib.
10 kq trotil ekvalentində bomba
Polisin məlumatına görə, vağzalda partlayan bombanın gücü 10 kq trotil ekvalentində olub. Hadisə nəticəsində ölənlərin yaxınlarına kompensasiya veriləcək. Məlumata görə, yaralılar 200 min, ölənlərin ailələri isə 1 milyon rubl vəsait alacaqlar. Hadisə şahidlərinin sözlərinə görə, partlayışdan dərhal sonra başlayan yanğın qısa müddət ərzində böyük ərazini əhatə edib. Partlayışın baş verdiyii ərazi isə qan gölməçəsini xatırladıb. Xəsarət alanların bədən üzvləri ətrafa səpələnib. Terror aktı vağzalın gündəliyini də pozub. Nəticədə yaxınlıqda yerləşən vağzallar «Volqoqrad-1»ə gələn qatarları qəbul etmək məcburiyyətində qalıblar.
“Rusiya Şimali Qafqaz siyasətini dəyişməlidir”
Politoloq Vəfa Quluzadənin fikrincə, baş verən terror hadisəsi Rusiya hakimiyyətinin Şimali Qafqazda yürütdüyü imperialist siyasətin nəticəsidir. Rusiyada terror hadisələrinin səbəbinə aydınlıq gətirməyin tərfdarı olan V.Quluzadə bildirdi ki, Şimali Qafqazda Rusiyanın apardığı qəddar siyasət region xalqlarını bu yola sövq edib: «Rusiya Şimali Qafqazda uzun müddətdir ki, təmizləmə siyasəti aparır. Rusiya Şimali Qafqazda yaşayan xalqların dinini, dilini qəbul etmir. Rusiya Şimali Qafqaza öz adət-ənənəsi ilə yaşamağa imkan vermir və bu siyasəti qəbul etmək istəməyənlər də təzyiqə məruz qalır. Mən terrora bəraət qazandırmıram. Amma Şimali Qafqaz xalqları başqa çıxış yolları qalmadığından bu cür amansız mübarizə vasitəsinə əl atıb. Rusiya terrora qarşı mübarizə aparmaq istəyirsə, ilk növbədə özünün Şimali Qafqazda yürütdüyü siyasəti dəyişməlidir».
Xəyal
