Maksim Musayev: «Mən çatışmazlıqları dediyim üçün məni ora dəvət etmirlər»
“Mən YAP-ın qurucularından biri olsam da on iki ildir ki, partiyanın işində yaxından iştiraka dəvət etmirlər.” BunuAvropa.info-ya açıqlamasında sabiq deputat məşhur 91-lərdən olan, YAP-çı Maksim Musayev deyib. Onun sözlərinə görə, partiyadakı nöqsanları, çatışmazlıqları dediyi üçün onu yaxına buraxmırlar: “Hələ vaxtı ilə Heydər Əliyevin partiyanın özünü, cəmiyyətdə nüfuzunu qoruyub saxlamaq üçün nöqsanları araşdırıb aradan qaldırmaqla bağlı tövsiyələri var idi. Bax bu məsələ bu gün partiyada yoxdur. Belə çıxır ki, bizim partiya da nöqsan yoxdur. Nöqsansız nə insan, nə bir qurum yoxdur. Ona gərə də mən bu çatışmazlıqları dediyim üçün məni ora dəvət etmirlər”.
Partiyadan çıxmaq niyyətinin olmadığını deyən M.Musayev bildirib ki, çıxartsalar da, bu ədalətsizlik olar: “Mən o partiyaya gəlməmişəm ki, vəzifə və yaxud mövqe sahibi olam, gəlmişəm ki, Heydər Əliyevin fikirlərini müdafiə edəm. Onun düşüncəsinə uyğun ölkənin idarə olunmasına nail olunsun. Görürəm ki, bu da partiyadakıların xoşuna gəlmir. Odur ki, məni nə qədər incitsələr də mən öz mövqeyimdə qalacağam. Çünki Heydər Əliyevə sədaqətli adamam”.ÿ
Maksim Musayev onu da əlavə edib ki, indi partiyaya gələnlərin və rəhbər strukturunda təmsil olunanlar arasında eləsi var ki, hakimiyyət dəyişikliyi olarsa, YAP-ın əleyhinə ilk çıxanlardan olacaq: “Adlarını çəkmək istəmirəm, amma onların əksəriyyətini yaxşı tanıyırıq. Hətta zamanında mən özüm onların bir neçəsi ilə söhbət eləyib YAP-a dəvət etsəm də, onlar bundan imtina etmişdilər. Bu gün partiyanın fəal həyatından uzaqda saxlanılan YAP-çılar var ki, onlar da bu adamlarla dəfələrlə söhbət edib partiyaya dəvət etsələr də, onlar dar gündə bizə qoşulmadılar. Amma sonradan hansı yollasa gəlib nəinki YAP üzvü oldular, hətta yüksək vəzifələr qazandılar. Ancaq köhnə elita var ki, partiya üçün bacardıqlarını ediblər, onlara şərait yaradılmaması narahatedici haldır.”
Partiyanın bu gün yürütdüyü daxili və xarici siyasətə də toxunan M.Musayev bildirib ki, beynəlxalq siyasət daxili siyasətdən daha yaxşıdır.
M.Musayevin ittihamlarına cavab olaraq YAP-ın icra katibinin müavini, deputat Siyavuş Novruzov “Axar.az”a açıqlamasında deyib: “Maksim Musayev indi hansı partiyanın üzvüdürsə, getsin o partiyanın rayon təşkilatının tədbirlərində iştirak etsin. Bu barədə artıq heç nə deməyəcəm”.