Onun təmsilçiliyi Milli Şuraya yalnız uğur gətirə bilərdi
Bir müddət öncə Milli Şuranın sessiyasında Rüstəm Ibrahimbəyov əksəriyyətin səsini alaraq qurumun fəxri sədri seçildi. Yalnız Müsavat partiyası bu seçimə etiraz etdi və Rüstəm Ibrahimbəyovun qurumdakı fəaliyyətini yolverilməz olduğunu ifadə etdi. Bugünlərdə isə Rüstəm Ibrahimbəyov Milli Şuranın fəxri sədrliyindən istefa verdi.
Baş verənlər birmənalı qarşılanmadı və qurumun əksər üzvləri Rüstəm bəyin qurumda təmsilçiliyinin vacib olduğunu bildirdilər.
Milli Şura üzvü Leyla Yunus hesab edir ki, Rüstəm bəyin qurumda sıravi üzv kimi qalması belə demokratik düşərgəyə xeyir gətirərdi: “Rüstəm Ibrahimbəyov dünyada tanınmış, ziyalı adını yaşadan insandır. Mən sessiyada Rüstəm bəyin fəxri sədrliyinə dəstək vermişdim. Rüstəm bəyin istefasına gəlincə, onun sonuncu məktubu çox mətləblərə aydınlıq gətirir. Görünür, Rüstəm bəyə mesaj çatdırılıb ki, sənin qurumda qalmağın vəziyyəti çətinləşdirir, qurumda gərginliyə səbəb olur. Rüstəm bəy də bunları əsas tutaraq istefa verib. Mən buna təəssüflənirəm”.
Milli Şura üzvü Ibrahim Ibrahimli bildirdi ki, Rüstəm bəyə qarşı lazımsız münasibətlər sərgiləndi və o da böyüklük göstərib istefa verdi: “Rüstəm bəy son 20 ildə demokratik qüvvələri bir araya gətirdi və ortaya vətəndaş mövqeyi qoydu. Kimlərsə onu qısqana, ona qarşı sayğısızlıq göstərə bilər. Ancaq tarix hər kəsin qiymətini verəcək və Rüstəm bəyin xidmətləri hər zaman xatırlanacaq. Təssüflər olsun ki, bəzi müxalifyönlü mətbuat, müxalifət funksionerləri də Rüstəm bəyə qarşı lazımsız münasibət sərgilədi və hakimiyyətin siyasətinə uyğun mövqe nümayiş etdirdilər. Ancaq Rüstəm bəy növbəti dəfə böyük nümunə göstərdi və şəxsi ambisiyalarının ümumi işdən üstün olmadığını göstərdi. Rüstəm bəy məktubunda da bu addımı Milli Şuranın qorunması üçün atdığını bildirdi və Müsavat partiyasını da açıq şəkildə ittiham etdi. Rüstəm bəy Milli Şuraya yalnız əlavə dvidendlər, başucalığı gətirə bilərdi. Hesab edirəm ki, bundan sonra da Rüstəm bəy demokratik düşərgəyə bacardığı yardımı göstərəcək. Biz bundan sonra qurumun fəaliyyətini daha da gücləndirməli və pozucu adamların ünvanını açıq göstərməliyik”.
Milli Şura üzvü Sülhəddin Əkbər Rüstəm Ibrahimbəyovun istefasından təəssüfləndiyini bildirdi: “Milli Şurada gərginliklərin, fikir ayrılıqlarının olması barədə mətbuatda yazılar dərc olunmasını istəməzdim. Rüstəm bəyin istefa ərizəsi o qədər açıq şəkildə yazılıb ki, əlavə şərhə ehtiyac yoxdur. Onun niyə istefa verməsi hər kəsə məlumdur. Rüstəm bəy geniş imkanlara, resurslara malikdir. Çox təəssüf ki, biz bundan istifadə edə bilmədik. Rüstəm bəy Milli Şura üçün önəmli fiqur idi”.
Milli Şura üzvü Qələndər Muxtarlı hesab edir ki, Rüstəm Ibrahimbəyovun istefası demokratik düşərgə üçün böyük itkidir: “Rüstəm Ibrahimbəyovun Azərbaycan müxalifətinin ən böyük koalisiyası olan Milli Şurada təmsil olunmasını böyük uğur hesab edirəm. Onun sıravi üzv kimi qalması da Azərbaycan müxalifətinin qələbəsi olardı. Təəssüf edirəm ki, müxalifət adına iddia edib, bu yolla dolanışığını təmin edənlər, hakimiyyətin sifariş və tapşırıqlarını yerinə yetirən işbazlar qismən istəklərinə nail oldular. Bu adamlar 20 ildir müxalifətin uğursuzluğuna xidmət edirlər. Rüstəm Ibrahimbəyov müxalifətin yanında olmağa özündə güc tapdı və öz töhfələrini verdi. Rüstəm Ibrahimbəyovun itkisi ağır itkidi və onun fəxri sədr kimi qalması düzgün qərar idi”.
