O da dolanışıq ucbatından intihara cəhd edib
Bakıda 46 yaşlı kişi özünü yandırıb. Hadisə şahidlərinin verdiyi məlumata görə, Suraxanı rayonu ərazisində, metronun “Xalqlar dostluğu” stansiyasından Günəşliyə gedən yolun üzərində, “Interpetrol” yanacaqdoldurma məntəqəsinin qarşısında intihara cəhd edən şəxs 1967-ci il təvəllüdlü Ələkbərov Arzu Sultan oğludur. O, 5 saylı şəhər xəstəxanasına yerləşdirilib. Vəziyyəti ağırdır.
Xəstəxanadan APA-ya verilən məlumata görə, xəstə bədəninin müxtəlif nahiyələrinin 1-ci və 2-ci dərəcəli çoxsaylı termiki yanığı diaqnozu ilə daxil olub.
Virtualaz.org saytının yazdığına görə, xəstəxananın yanıq şöbəsinə yerləşdirilən Arzu Ələkbərovun vəziyyəti yaxşıdır. Həkimlər isə hələ ki, məlumat vermir. Ailə üzvlərinə verdiyi məlumata görə, Arzu Ələkbərovun qolları yanıb, bədənin digər hissələri isə ciddi xəsarət almayıb.
Əldə etdiyimiz məlumata görə, A.Ələkbərov sürücü işləyirmiş. O, “Şaqman” marakalı yük maşını sürürmüş.
Zərərçəkmişin həyat yoldaşı Kifayət Ələkbərovanın dediyinə görə, ailədaxili heç bir problem olmayıb. A.Ələkbərov 1 aydır düzəldiyi yeni iş yerində əmək haqqı ala bilmirmiş. Buna görə də əsəb keçirirmiş.
“Interpetrol” yanacaqdoldurma məntəqəsinin (YDM) işçilərinin dediyinə görə, onlar da qışqırığa yüyürüblər: “Birdən çığırtı qopdu. Hamımız səs gələn yerə – məntəqədən 10-15 metr aralıdakı yağdəyişmə köşkünün qabağına qaçdıq. Gördük ki, bir adam alov içindədir. Əvvəlcə elə bildik ki, yanan adam yağdəyişmə köşkünün işçisidir. Axı onların üst-başı benzin, yağ-mazut olur. Sonra öyrəndik ki, belə deyil, bir nəfər özünü yandırıb. Yığışıb söndürdük”.
Hadisənin baş verdiyi yerin bir neçə addımlığındakı meyvə-tərəvəz köşkü işçilərinin sözlərinə görə, bir kişi qəfildən qışqırmağa başlayıb. “Belə yaşamaq olmaz. Bunların əlindən bezmişəm. Belə də zülm olarmı?”- deyə-deyə balaca qabdakı benzini üstünə töküb və alışqanla yandırıb.
Ətrafdakı dükan və sexlərin işçiləri tez su tökərək onu söndürüblər. Yolda böyük tıxacın yarandığını deyən satıcılar bildirdi ki, kimsə polisə zəng vurub. Hadisə yerinə gələn polislər isə təcili yardım çağırıblar. Amma şahidlərin dediyinə görə, təcili yardım haradasa yarım saata gəlib çıxıb: “O vaxta qədər həmin adam elə asfaltın üstündə uzanıb qalmışdı. Sonra təcili yardım gəldi, polislər onu xəstəxanaya yola saldı, özləri də dalınca getdi”.
Şahidlərin sözlərinə görə, yoldan keçən avtobus sürücülərindən biri onu tanıyıb. Deyib Arzu adlı bu adam bir vaxtlar marşrut avtobusu sürücüsü olub.
