Tatyana Çernovolun döyülməsinə ABŞ Konqresindən sərt reaksiya gəldi
Saxlanılan 5 nəfər barəsində iki aylıq həbs qərarı çıxarıldı
Ukrayna müxalifətinin liderləri Arseni Yasenyuk, Vitali Kliçko və Oleq Təqnibok xalqı sabah saat 12-də «Müstəqillik» meydanında növbəti «xalq yığıncağına» çağırıb. Budəfəki aksiya dekabrın 25-də döyülən jurnalist Tatyana Çrnovola həsr olunacaq və «Terrora qarşı həmrəylik» şüarı altında keçiriləcək.
“Tatyana Çornovolun başına gətirilən dəhşətli olay bir daha təsdiq edir ki, bu hakimiyyəti dayandırmaq lazımdır. Gəlin, bir yerdə meydana çıxaq və fəallara olan terrora qarşı mübarizədə həmrəyliyimizi nümayiş etdirək. “, – deyə müxalifət liderlərinin mitinq çağırışında qeyd olunur.
Bu gün ABŞ Konqresindən döyülən jurnalistlə bağlı sərt reaksiya gəlib. Konqresin Xarici Əlaqələr Komitəsinin üzvü Elliot Engel jurnalistə olan hücumu pisləyib və hakimiyyəti işi obyektiv araşdırıb cinayətin sifariş və icraçılarını cəzalandırmağa çağırıb: «Prezident Yanukoviçin Avropa Birliyi ilə Assosiasiya sazişi imzalamamasına etiraz edən fəalların və jurnalistlərin bu cür kobud döyülməsi narahatlıq doğurur. Ukrayna hökuməti söz və ifadə azadlığına hörmət etməlidir». Elliot Engel bildirib ki, Konqres və bütün beynəlxalq təşkilatlar istintaqın gedişini diqqətlə izləyəcək. “Ukrainskaya pravda” qəzetinin müxbiri, eyni zamanda «Avromeydan» fəallarından olan Tatyana Çornovol dekabrın 25-nə keçən gecə hüjuma məruz qalıb. Onun avtomobilinin qarşısını kəsən naməlum şəxslər jurnalisti vəhşicəsinə döyüblər. T.Çornovol ağır bədən xəsarətləri və kəllə-beyin travması ilə xəstəxanaya yerləşdirilib. Onun vəziyyətinin orta ağır olduğu bildirilir. Polis fakt üzrə “xuliqanlıq” və “bədənə ağır xəsarətlər yetirmə” maddələri ilə cinayət işi qaldırıb. Əməliyyat-axtarış tədbirləri nəticəsində 5 nəfər saxlanılıb. Bu gün Kiyev Şəhər Məhkəməsi 5 şübhəli şəxs haqqında 2 aylıq həbs qərarı verib. Yeri gəlmişkən, saxlanılan 5ci şübhəli şəxs hadisədə iştirakını etiraf edib. Daxili İşlər Nazirliyinin məlumatına görə, bu, Dnepropetrovski vilayətinin 34 yaşlı sakinidir. O ifadəsində bildirib ki, Kiyevə «Porşe Kayen» avtomobili almağa gəlibmiş.
Ukrayna Daxili İşlər Nazirliyinin son açıqlamaları göstərir ki, hökumət şübhəli şəxs qismində saxlanılanları müxalifət liderləri – xüsusən də Vitali Kliçko ilə əlaqələndirməyə çalışır. Amma hələlik bu ittihamı sübut edəcək yetərli dəlillər yoxdur. Onu da qeyd edək ki, jurnalist hadisədən bir gün əvvəl şəxsi bloqunda daxili işlər naziri Vitali Zaxarçenkonun şəhər kənarındakı nəhəng yaşayış komleksinin şəkillərini yayıb. T.Çornovolun məhz bu səbəbdən cəzalandırıldığı istisna olunmur.
Gültəkin
