Başı kəsilən qızla bağlı icra hakimiyyətindən açıqlama
Qətlə yetirilən Aynurə Kazımovanın Füzuli rayon İcra Hakimiyyətinin başçısı Alı Alıyevin bacısı qızı olması ilə bağlı məlumata rəsmi münasibət gəlib
Dekabrın 26-da Bakıda, Dərnəgül qəsəbəsindəki yataqxanada xüsusi amansızlıqla qətlə yetirilən Aynurə Kazımovanın Füzuli rayon İcra Hakimiyyətinin başçısı Alı Alıyevin bacısı qızı olması ilə bağlı məlumata rəsmi münasibət gəlib.
Füzuli rayon İcra Hakimiyyətindən ANS PRESS-ə verilən məlumata görə, bu məlumat tamamilə absurddur və həqiqəti əks etdirmir.
İcra Hakimiyyətindən bildirlib ki, ekskluziv xəbər kimi təqdim olunan, əslində isə hansısa bir “jurnalist”in xəyal gücünün məhsulu olan məlumat həqiqətə uyğun deyil.
Xəbərdə adı çəkilən Kazımova Aynurə Şahlar qızı Füzuli rayonunun Bala Bəhmənli kənd sakinidir. Füzuli rayon İcra Hakimiyyətinin başçısı Alı Alıyevin Kazımova Aynurə Şahlar qızı adında bacısı qızı olmadığı bildirilir.
***
Dekabrın 26-da xüsusi amansızlıqla qətlə yetirilən 27 yaşlı qadın icra başçısının bacısı qızı imiş. Bu barədə interpress.az saytı məlumat yayıb.
Məlumatda qeyd olunur ki, Dərnəgül qəsəbəsindəki yataqxanada başı kəsilən 1986-cı il təvəllüdlü Aynurə Kazımova Füzuli rayonunun icra başçısı vəzifəsində çalışan Alı Alıyevin bacısı qızıdır.
Qeyd edək ki, Daxili İşlər Nazirliyi Aynurəni qətlə yetirməkdə təqsirli bilinən 33 yaşlı Rafiq Ələkbərovu həbs edib.
Rafiq Ələkbərov Aynurə Kazımovanın başını iki azyaşlı uşağının gözləri qarşısında kəsib.
