Rüstəm Ibrahimbəyov fəxri sədr adını daşımağa layiqdir
Bir müddət öncə Milli Şuranın sessiyasında Rüstəm Ibrahimbəyov əksəriyyətin səsin alaraq qurumun fəxri sədri seçildi. O, zaman bu məsələyə Müsavat partiyası etiraz etdi və bununla bağlı Milli Şuradan çıxmaq ehtimalının olduğunu da bildirdilər. Bugünlərdə isə Rüstəm Ibrahimbəyov Milli Şuranın fəxri sədrliyindən istefa verdi.
Bu dəfə də Müsavat Partiyası Mərkəzi Icra Aparatının rəhbəri Arif Hacılı “Qafqazinfo”ya Rüstəm Ibrahimbəyovun Mili Şuranın həmsədri, ya da fəxri sədri olmasının indiki durumda Azərbaycan müxalifətinin xeyrinə olmadığını deyib: “Rüstəm Ibrahimbəyov Rusiya vətəndaşıdır. Onun Rusiya qarşısında müəyyən öhdəlikləri var. Orada öz peşə fəaliyyəti ilə məşğuldur. Buna görə də Rusiyadan xeyli dərəcədə asılıdır” -deyə Arif Hacılı bildirib.
Baş verənlər birmənalı qarşılanmadı və qurumun əksər üzvləri Rüstəm bəyin qurumda təmsilçiliyinin vacib olduğunu bildirdilər.
Milli Şuranın Beynəlxalq Əlaqələr Komissiyasının sədri Gültəkin Hacıbəyli “APA” ya açıqlamasında R.Ibrahimbəyovun istefasından təəssüfləndiyini qeyd edib: “Rüstəm Ibrahimbəyovun Milli Şuranın fəxri sədri olması qurumun öz mənafeyi baxımından daha faydalı idi və cəmiyyətin bu təşkilata olan marağını artırırdı. Rüstəm Ibrahimbəyova qarşı haqsızlıq edildi. Təəssüf edirəm ki, Müsavat Partiyasının ayrı-ayrı funksionerləri tərəfindən Rüstəm Ibrahimbəyovla bağlı müəyyən fikirlər səsləndi. Kaş ki, o fikirlər olmayaydı və indiki vəziyyət yaranmayaydı. Təbii ki, bu fikirlər Rüstəm Ibrahimbəyov kimi böyük bir düşüncə adamının səviyyəsinə uyğun olmayan, onu kifayət qədər incik salan fikirlər idi. Əslində bu situasiyanın özü də Rüstəm Ibrahimbəyovun böyüklüyünü sübut etdi. O, indiyədək bir neçə dəfə geri çəkilməklə böyüklük nümayiş etdirmişdi. Milli Şuranın vahidliyini, bütövlüyünü qoruyub saxlamaq üçün atdığı bu son addım da ona qarşı ittihamların nə qədər əsassız olduğunu göstərir. Düşünürəm ki, bundan sonra yenidən Milli Şuranın taleyi, qurumun parçalanması ilə bağlı fikirlər tam əsassız olacaq və bu çağırışları edən insanlar özlərini cəmiyyət qarşısında uğursuz bir durumda təqdim edəcəklər”.
Milli Şura üzvü Namizəd Səfərov qəzetimizə açıqlamasında Rüstəm Ibrahimbəyovun müxalifətin birliyində müstəsna xidməti olduğunu və hər zaman görkəmli ziyalı, ləyaqətli vətəndaş kimi xatırlanacağını bildirdi: “Rüstəm Ibrahimbəyovun bu addımı niyə atması, bunun hansı zərurətdən yarandığı haqda məlumatım yoxdur. Yəqin ki, Rüstəm bəy bu məqamlara aydınlıq gətirəcək. Biz Rüstəm bəyi fəxri sədr seçməklə, onun xüsusi xidmətlərini qiymətləndirmişdik və hesab etmişdik ki, onun qurumda təmsilçiliyi demokratik düşərgənin uğurudur. Yəqin ki, Rüstəm bəy bu addımı Milli Şuranın dağılmaması, kimlərinsə qurumu tərk etməməsi üçün atıb. Rüstəm bəyin qərarına hörmətlə yanaşıram və düşünürəm ki, bu addımı növbəti fədakarlığın göstəricisidir”
Milli Şura üzvü Fuad Ağayev Rüstəm bəyin istefasının yolverilməz olduğunu bildirdi: “Hesab edirəm ki, Milli Şura Rüstəm Ibrahimbəyovun istefa ərizəsini qəbul etməməlidir. Rüstəm Ibrahimbəyov qurumda təmsil olunmalıdır. Yəni, Milli Şura iqtidarın niyyətini gerçəkləşdirməməlidir”.
Milli Şura üzvü Rövşən Əhmədli Rüstəm Ibrahimbəyovun xidmətlərinin danılmaz olduğunu və onun qurumda təmsilçiliyinin yalnız xeyir gətirdiyini bildirdi: “Bizim Rüstəm bəyə böyük hörmətimiz var, onun sona qədər bu qurumda qalmasının tərəfdarıyıq. Təbii ki, hər hansı qərar qəbul etmək onun haqqıdır və biz də onun qərarlarına hörmətlə yanaşırıq. Hesab edirəm ki, Milli Şura üzvlərinin böyük əksəriyyəti Rüstəm bəyin fəaliyyətini yüksək qiymətləndirir və onun qurumda təmsilçiliyinə tərəfdardır”.
