«Ədliyyə Nazirliyi və Penitensiar xidmət keçmiş naziri təkzib etsə də, vəkil məhkəmədə məsələyə aydınlıq gətiriləcəyini deyir»
Artıq xəbər verildiyi kimi, keçmiş səhiyyə naziri Əli Insanov ədliyyə naziri Fikrət Məmmədovu məhkəməyə verib. Buna səbəb onun saxlandığı şəraitdən narazı qalmasıdır. Vəkil Toğrul Babayevin sözlərinə görə, Əli Insanov hesab edir ki, onun ağır şəraitdə saxlanılması bilavasitə ədliyyə naziri Fikrət Məmmədovun göstərişilə həyata keçirilir. Buna görə də ədliyyə nazirinin qanunsuz hərəkətlərinin qarşısının alınması üçün məhkəməyə müraciət edib.
Keçmiş nazirin bu addımı ilə bağlı Ədliyyə Nazirliyinin mövqeyini öyrəndik.
Nazirliyin mətbuat xidmətinin rəhbəri Aydın Ağayev nazirin iddiası ilə bağlı Penitensiar xidmətə müraciət etməyi məsləhət gördü. Nazirliyin sözçüzü öz növbəsində ittihamlara cavab olaraq cəzaçəkmə müəssisəsinin kurort və ya sanatoriya olmadığını da dedi.
Əli Insanovun dedikləri ilə razılaşmayan Penitensiar Xidmətin ictimaiyyətlə əlaqələr şöbəsinin müdiri Mehman Sadıqov nəinki keçmiş nazirin, eyni zamanda digər məhkumlar qanunvericilikdə nəzərdə tutulmuş qaydada saxlanıldığını və onlara qarşı hər hansı qeyri-insani hərəkətə yol verilmədiyini, bundan sonra da verilməyəcəyini, buna ciddi nəzarət olunduğunu dedi.
M.Sadıqov eyni zamanda məhkumların hüquqlarının qorunması istiqamətində, onların qanuni mənafeyi istiqamətində Ədliyyə Nazirliyi tərəfindən yetərincə addımların atıldığını da bildirdi.
Əli Insanovun vəkili Toğrul Babayev isə öz növbəsində kim düz, kimin yalan dediyinə məhkəmədə aydınlıq gətiriləcəyini bildirdi: “Məhkəməyə müraciət etmişik. Məhkəmə araşdıracaq ki, kim düz deyir, kim yalan. Avropa Məhkəməsi Insan haqları Məhkəməsinin qərarında birbaşa göstərilib ki, 13 saylı cəzaçəkmə müəssisəsində Əli Insanova işgəncə verilməsi təsdiqlənib. Bununla bağlı Avropa Məhkəməsinin qüvvəyə minmiş qərarı var”.
Fizzə
