Elxan Şahinoğlu: «Yaranmış vəziyyət AK parti daxilində fikir ayrılığı yaradıb və bu hal partiyanın parçalanmasına xidmət edə bilər»
Türkiyədə həyata keşirilən anti-korrupsiya əməliyyatı dünyanın gündəmini hələ də zəbt etməkdədir. Bu əməliyyat nəticəsində nazir övladlarının, tanınmış iş adamlarının, bankirlərin və siravi şəxslərin geniş korrupsiya şəbəkəsi meydana çıxdı. Baş verənləri bəzi ekspertlər Fətullah Gülən Ərdoğan savaşının nəticəsi, bəziləri xarici qüvvələrin tələsi, bəziləri isə sadəcə olaraq Ərdoğan hölumətinin korrupsioner mahiyyəti kimi qiymətləndirdi.
Səbəbin nə olmasından asılı olmayaraq, ortada korrupsiya faktı var və bu korrupsiya ilə hökumətin başında duran adamlar məşğul olur.
Bəzi ekspertlər hesab edir ki, baş verənlər Ərdoğan hökumətinin daxildən çökməsi və hökumət içindən Ərdoğana qarşı “bunt” qalxması ilə nəticələnə bilər.
Belə ki, baş verənlərdən sonra Ərdoğanın istefasın yalnız müxalifət deyil, həm də istefa vermiş nazirlər də dilə gətirir. Bildiyimiz kimi bu əməliyyatlardan sonra 3 nazir istefa verdi. Bunlar daxili işlər naziri Müəmmər Gülər, iqtisadiyyat naziri Zəfər Çağlayan, ekologiya və şəhərsalma naziri Ərdoğan Bayrakdardır.
Ərdoğan Bayrakdar istefa verərkən baş nazir Ərdoğanın da istefa verməli olduğunu bildirib.
3 nazir itkisindən sonra AKP hökuməti komandasını yenidən formalaşdırmaq üçün müzakirələrə başlayıb. Türkiyə xəbər qaynaqları baş nazir Rəcəb Tayyib Ərdoğanın yeni kabinetin tərkibini təqdim etmək və məsləhətləşmələr aparmaq üçün prezident Abdulla Güllə görüşə hazırlaşması xəbərlərini yayıb.
Istefalardan sonra AKP iqtidarı içərisində parçalanma olduğu da diqqətdən yayınmır. Bir sıra nazirlər hökumət üzvlərinin istefasını AKP-nin 17 dekabr əməliyyatı ilə bərbad olan imicini qurtarmaq üçün vacib saysalar da, bəzi hökumət üzvləri bu addımı qarşı tərəfin daha da ayaqlanmasına səbəb olacaq geriçəkilmə kimi qəbul edib.ÿ
Baş verən bütün bu hallar yuxarıda qeyd etdiyimiz kimi Ərdoğana qarşı daxili “bunt”un yaranmasına səbəb ola bilərmi, proseslər Ərdoğana tərəf yönələcəkmi?
Siyasi ekspert Elxan Şahinoğlu hesab edir ki, yaranmış vəziyyət AK Partinin zəifləməsinə və Ərdoğanın planlarının pozulmasına xidmət edə bilər : “Baş verənlərin Ərdoğana qarşı hökumətdaxili qiyamla nəticələnəcəyini proqnozlaşdırmaq çətin olsa da, müəyyən mülahizələr yürütmək olar. Düşünürəm ki, baş verənlər partiya daxilində fikir ayrılığının dərinləşməsinə səbəb ola bilər. Ərdoğanın avtoritarizmə yuvarlanması, hamını ittiham etməsi, artıq tərəfdarlarını da bezdirib. Və ard-arda istefalar, nazirlərin onu istefaya səsləməsi də bunun göstəricisidir. Bütün bunlar daxili qiyam yaratmasa da, bələdiyyə seçkilərində partiya mövqelərini itirəcək, digər tərəfdən partiyanın parçalanması prosesi reallaşacaq. Ərdoğan Cümhur başqanı olmaq planları üzərində çalışırdı. Bu hadisələrdən sonra öz planlarında da dəyişiklik etmək məcburiyyəti duyacaq və Ərdoğan hədəflərinə çatmaya da bilər”
Ilham
