Türkiyədəki korrupsiya və rüşvət əmliyyatları zamanı saxlanılan və 8 saatlıq sorğudan sonra sərbəst buraxılan iş adamı, “Ağaoğlu” şirkətlər qrupunun prezidenti Əli Ağaoğlunun 1 milyard dollar qazanacağı layihəsi dayandırılıb. Türkiyə mətbuatı xəbər verir ki, iş adamının “Bakırköy 46” layihəsinə möhür vurulub (virtualaz.org).
Bakırköy bələdiyyəsi iş adamını məhkəməyə verib. Məhkəmənin qərarı ilə layihənin dayandırılması göstərişi verilib.
İş adamının sorğusu zamanı ona “Bakırköy 46” layihəsi ilə bağlı suallar da verilmişdi. İddialara görə, Ə.Ağaoğlunun saxlanılması səbəblərindən biri də “Bakırköy 46” layihəsi idi. Layihənin əhatə edəcəyi ərazi Ətraf və Şəhərsalma Nazirliyi tərəfindən qanunsuz olaraq özəl layihə ərazisi elan edilib. 2013-cü ilin yanvarında İstanbul bələdiyyəsinin etirazlarına baxmayaraq ərazi tikintiyə açılıb.
Layihədə satışlar və inşaat bu günə qədər davam edirdi. Layihənin açılışı olarkən iş adamı bildirmişdi ki, bu layihədən 1 milyard dollar gəlir əldə etməyi planlaşdırıblar.
