Görkəmli ziyalımız Rüstəm İbrahimbəyovun Milli Şuranın fəxri sədrliyindən istefa verməsinə qurumun sədri sədri Cəmil Həsənli və AXCP ilə Müsavat partiyalarından münasibət bildirib.
Milli Şuranın sədri Cəmil Həsənli “Azadlıq”a açıqlamasında bildirdi ki, Rüstəm Ibrahimbəyov Milli Şurada qalır: “Bəzi hökumətyönlü sayt və qəzetlər Rüstəm Ibrahimbəyovun Milli Şuradan getdiyini yazır. Bu tamamilə yanlışdır, Rüstəm bəy Milli Şuradan getmir, yalnız fəxri sədrliyindən istefa verir. Mən də onun bu qərarına hörmətlə yanaşıram. Milli Şuranın da gələcəyini normal görürəm, parçalanmanın olacağına inanmıram”.
AXCP sədrinin müavini Fuad Qəhrəmanlı bizimlə söhbətində Rüstəm Ibrahimbəyovun fəxri sədrlikdən istefasını təmsil olunduğu partiyada təəssüflə qarşıladıqlarını söylədi: “Rüstəm bəyi bu addımı atmağa vadar edən onun Rusiya vətəndaşı olmasını bəhanə edib Milli Şuraya qarşı aparılan kapmaniyaya son vermək istəyi olub. Müsavat partiyası Rüstəm bəyin fəxri sədrliyini əsas gətirərək Milli Şurada çıxacaqlarını müzakirəyə çıxarıb. Ibrahimbəyov fəxri sədrlikdən istefa verməklə bu bahənəni aradan qaldırdı. Buyurub cəmiyyətə izah etsinlər ki, bundan sonra nəyi əsas gətirib Milli Şuradan ayrılmaq qərarını verəcəklər?”.
Fuad Qəhrəmanlı xatırladıb ki, Rüstəm Ibrahimbəyov fəxri sədr postuna AXCP sədri Əli Kərimlinin təklifi ilə seçilib: “Bu təklif edilərkən Rüstəm bəyin Milli Şuranın yaranmasında oynadığı müstəsna rol və demokratik proseslərə verdiyi töhvə əsas götürülüb. Bununla da cəmiyyətimizin ziyalılarına mesaj verildi ki, Demokratik Qüvvələr o cümlədən Milli Şura dəyərli ziyalımızın və onun simasında hər kəsin fəaliyyətini qiymətləndirməyə, yüksək dəyər verməyə hazırdı. Bu baxımdan Rüstəm bəyin fəxri sədrlikdən getməsinə vadar edən prosesləri təəssüflə qarşılayırıq. Bu proseslərin iştirakçısı olanların üzərində siyasi və mənəvi məsuliyyət yaradır”.
Müsavat Partiyası Mərkəzi Icra Aparatının rəhbəri Arif Hacılı “Qafqazinfo”ya Rüstəm Ibrahimbəyovun Mili Şuranın həmsədri, ya da fəxri sədri olması indiki durumda Azərbaycan müxalifətinin xeyrinə olmadığını deyib: “Rüstəm Ibrahimbəyov Rusiya vətəndaşıdır. Onun Rusiya qarşısında müəyyən öhdəlikləri var. Orada öz peşə fəaliyyəti ilə məşğuldur. Buna görə də Rusiyadan xeyli dərəcədə asılıdır”.
Arif Hacılı qeyd edib ki, Rüstəm Ibrahimbəyovun Müsavat Partiyası rəhbərliyinin onun Milli Şuranın fəxri sədri seçilməyi ətrafında apardığı diskussiyaların Milli Şuraya qarşı ümumi kampaniyanın tərkib hissəsi olduğunu barədə olan fikirlərini də qəbul etmir: “Çünki Müsavat Partiyası Milli Şuranın yaranmasında aparıcı qüvvə olub. Seçki prosesinin aparılmasında, Mill Şuranın təşkil etdiyi aksiyalarda aktivliyi ilə seçilib. Milli Şuranın qərarlarını yerinə yetirməyə çalışıb. Ona görə də Rüstəm Ibrahimbəyovun problemin mahiyyətini dərk edərək fəxri sədrlikdən istefa etdiyini düşünürəm”.
Ramin DEKO
