Elxan Şahinoğlu: «Tək baş nazirlə prezident arasında deyil, baş nazirlə müavini arasında da bu məsələdə fikir ayrılığı var»
Türkiyəni silkələyən rüşvət qalmaqalına sərt reaksiya göstərən və baş verənlərin xaricdə hazırlandığını deyən baş nazir Rəcəb Tayyib Ərdoğandan fərqli olaraq ölkə prezidenti Abdulla Gül diqqəti əsasən korrupsiya faktlarına yönəldib. “Korrupsiya varsa, üstü qapadılmamalıdır” deyən Türkiyə prezidenti məsələnin ədalətlə çözüləcəyinə inandığını da bildirib.
Qeyd edək ki, baş nazir Ərdoğan rüşvət qalmaqalını Türkiyəyə qarşı beynəlxalq səviyyədə hazırlanan oyun olduğunu və yerli qüvvələrin bu sui-qəsddə muzdur kimi istifadə olunduğunu deyib.
Prezident Abdulla Gülün baş nazirdən fərqli mövqe ortaya qoyması nə ilə bağlıdır?
“Atlas” Araşdırmalar Mərkəzinin rəhbəri Elxan Şahinoğlu rüşvət qalmaqalı üzə çıxandan sonra baş nazir Ərdoğanın qalmaqaldan, onun qarşısının alınmasından danışmaqdansa, yalnız siyasi məsələlərdən danışdığını bildirdi: “Ərdoğan deyir ki, bizə qarşı tələb qurublar, xarici qüvvələr mənə qarşı birləşib. Amma ortada fakt var, faktın üzərinə getmək lazımdır. Ona görə də hamı prezidentdən mövqe gözləyirdi. O da mövqeyini ortaya qoydu. Bu da Ərdoğanın mövqeyindən fərqli oldu. Gül konkret dedi ki, rüşvət məsələsinin üstünü qapatmaq olmaz. Məhz onun bu açıqlamasından sonra adları hallanan nazirlərin artıq istefası sürətləndirilib”.
Ekspertin sözlərinə görə, gələcəkdə də hakimiyyət daxilində fərqli fikirlər ortaya çıxa bilər. Artıq belə hallar baş verir: “Rüşvət qalmaqalının sabahı günü baş nazirin birinci müavini Bülənt Arınc da bildirdi ki, bu işlərdə Fətullah Gülənin əlinin olduğunu düşünmür. Bir gün sonra isə Ərdoğan bütün qüvvəsini Fətullah Gülənə qarşı yönəltdi. Bu o deməkdir ki, tək baş nazirlə prezident arasında deyil, baş nazirlə müavini arasında da bu məsələdə fikir ayrılığı var. Ona görə düşünürəm ki, üç istefa hələ son deyil. Hökumətdə başqa istefalar da ola bilər. AKP-dən olan millət vəkili, keçmiş mədəniyyət naziri də fərqli fikir ortaya qoyub, Ərdoğanı tənqid edib. Düşünürəm ki, bu proses Ərdoğanın partiyasında da itkilərə səbəb olacaq”.
Ekspert prezidentlə baş nazir arasında fikir ayrılığının bir qədər də artacağını deyir. Gələcəkdə prezident seçkilərinə yaxın bu fikir ayrılığı özünü daha çox göstərəcək.
Fizzə
