İranlı deputatlar prezidentə və məhkəmə rəhbərliyinə müraciət etdi
İranın bir qrup deputatı Türkiyədəki “böyük rüşvət” əməliyyatında həbs edilən iş adamı Rza Zərrabın ortağı kimi adı keçən milyarder Babək Zəncaninin istintaqa cəlb olunmasını tələb edib.
“Fars” xəbər agentliyinin bildirdiyinə görə, 12 deputatın prezidentə, parlamentin sədrinə və məhkəmə rəhbərliyinə göndərdikləri məktubda Zəncani haqqında korrupsiya ittihamı ilə cinayət işinin açılması üçün yetərli əsasların olduğunu qeyd ediblər.
Məktubda iranlı milyarderin müxtəlif banklarda saxta sənədlərlə hesablar açaraq bank kreditlərindən yararlandığı, bir neçə dəfə məhkəməyə cəlb olunduğu və iki dəfə barəsində həbs qərarı verilsə də, tutulmadığı, ölkə neftinin satışından əldə edilən pulları uzun müddət ödəməməsinə baxmayaraq, Nef Nazirliyi rəhbərliyinin onu ictimaiyyətə güvənilir bir şəxs kimi təqdim etdiyi, Təhlükəsizlik Nazirliyinin onu müdafiə edərək məsələyə dair hər hansı açıqlama vermədiyi qeyd olunur. Deputatlar bütün bu sadalananları tənqidi yanaşaraq, Zəncanini korrupsiya ittihamı ilə istintaqa cəlb etməyi istəyirlər.
Zəncani isə deputatların bu tələbinə etirazını bildirib. O, sahibi olduğu “Sorinet Holdinq”in rəsmi saytında belə bir qeyd paylaşıb ki, həyatını, qürurunu və çabasını ölkəsini inkişaf etdirməyə xərcləyib. Tələb olunarsa sənəd və sübutları təqdim etməklə korrupsiyaya yol vermədiyini isbatlamağa hazırdır. “Ölkənmin nəzarət orqanları o qədər fəaldır ki, bu qədər korrupsiya ilə məşğul olmaq sadəcə mümkün deyil”, – deyə Zəncani bildirib.
Bununla belə Zəncaninin əmlakı, neft satışından əldə etdiyi gəlirlər və İran Zəmin adında böyük bir ticarət mərkəzi inşa etdirməsi ilə bağlı bir çox dosyelər üzərində təhqiqat aparılır. Onun nəzərdə tutduğu nəhəng ticarət mərkəzi layihəsinin icrası da dayandırılıb.
Zəncani və onun holdinqi İrana tətbiq olunan neft embarqosunu yardığı üçün ABŞ və avropa Birliyinin qara siyahısına salınıb.
