Nazirə məxsus mülkün şəkillərini yayan tanınmış jurnalist ölümcül hala salındı
Ukraynada noyabrın 21-dən bu yana keçirilən etirazların əsas ünvanı olan «Avromeydan»da bu gün həyəcanlı anlar yaşanıb. Etirazçılardan biri boğazını bıçaqla kəsərək intihara cəhd edib. Lakin xoşbəxtlikdən onun həyatını qurtarmaq mümkün olub. Məlumatlara görə, orta yaşlı kişi intihara Maydanda qurulmuş çadırlardan birində, özü də hər kəsin gözü önündə cəhd edib. Şahidlərin dediyinə görə, kişi əvvəlcə bıçaqla çörək doğrayıb, sonra isə həmin bıçağı boğazına soxub. Çadırda olan insanlar dərhal təcili yardım çağırıblar və kişi xəstəxanaya yerləşdirilib. Kiyev polisindən bildiriblər ki, aksiyaçını xilas etmək mümkün olub və hazırda o, həyati təhdlükə daşımır. Polis hadisənin baş verdiyi ərazidə təhqiqata başlayıb. Aksiyaçının niyə intihara əl atdığı hələ ki məlum deyil.
Ukrayna mətbuatının gundəmini zəbt edən əsas xəbər tanınmış jurnalist Tatyana Çernovolun dekabrın 25-nə keçən gecə naməlum şəxslər tərəfindən döyülərək ölümcül vəziyyətə salınması olub. Polis T.Çernovolu küçədə halsız, üstü-başı qan içində taparaq xəstəxanaya aparıb. Həkimlər ona beyin silkələnməsi diaqnozu qoyublar. Yaxınlarının dediyinə görə, jurnalistin üz nayihəsind əməliyyat aparılıb.
Yerli mətbuatın yazır ki, hadisə zamanı jurnalist öz avtomobilində olub: «Tatyana arxadan gələn maşının onu sıxışdırdığını görüb izləndiyini başa düşüb. Avtomobilini saxlayıb qaçmağa çalışan jurnalistin qabağını arxadakı maşından düşən iki nəfər kəsib və onu döyməyə başlayıblar».
Məlumatlara görə, jurnalist hadisədən bir gün əvvəl şəxsi bloqunda daxili işlər naziri Vitali Zaxarçenkonun şəhər kənarındakı nəhəng yaşayış komleksinin şəkillərini yayıb. Kompleksin tərkibinə hələ tikintisi davam etdirilən böyük mülk, bir neçə tamamlanmamış ev və tikintisi yekunlaşmış ev, qaraj və mühafizəçilər üçün post daxildir. Deyilənlərə görə, nazir Zaxarçenko ora şəxsi vertolyotu ilə gəlir. Kompleksin yaxınlığında vertolyotun enməsi üçün meydança və anqar var.
Jurnalistin döyülməsi «Avromeydan» fəallarını hərəkətə gətirib. Dünən etirazçılar Daxili İşlər Nazirliyinin binası qarşısında piket keçiriblər. 1500-yaxın aksiyaçı nazirliyin həyətinə toplaşaraq Tatyana Çernovolun zorakılığa məruz qalmasını pisləyiblər və cinayəti törədənlərin dərhal tapılaraq məsuliyyətə cəlb edilməsini tələb ediblər.
Qeyd edək ki, Tatyana Çernovol həm də «Avromeydan» aksiyalarının fəallarındandır. Piketdə müxalifətdən olan deputatlar da iştirak edib. Onlar nazirlikdən Çernovolun döyülməsi faktı üzrə başladılan istintaqın gedişi haqda cəmiyyətə məlumat verilməsini tələb ediblər.
Kiyev prokurorluğu hadisəni törətməkdə şübhəli bilinənlərin qismən müəyyən edildiyi barədə məlumat yayıb. Təhqiqatçıların əlində jurnalisti izləyən avtomobilin nömrəsi, şəkilləri və onun sahibinin kimliyi barədə məlumatların olduğu bildirilir. Prokurorluq qeyd edib ki, hazırda avtomobilin və həmin şəxslərin yerinin müəyyənləşdirilməsi istiqamətində əməliyyat tədbirləri həyata keçirilir.
Gültəkin
