Anar Məmmədli ilə bağlı beynəlxalq təşkilatlara çağırış edildi
Mehman Əliyev: «Hakimiyyət Qərblə bazarlıq etməsi üçün siyasi məhbusların sayını artırmaqla məşğuldur»
Leyla Yunus: «Hakimiyyətin beynəlxalq aləmlə qarşıdurmaya getməsi fəsadsız ötüşməyəcək»
Hüquq müdafiəçisi Anar Məmmədlinin həbsi hakimiyyətə qarşı sərt beynəlxalq təpkiyə səbəb oldu. Elə bunun nəticəsidir ki, A.Məmmədli artıq beynəlxalq təşkilatlar tərəfindən siyasi məhbus kimi tanınır. Baş verənlərdə maraqlı məqamlardan isə biri budur ki, beynəlxalq təpkiyə rəğmən hakimiyyət repressiv siyasətin davam etdirməkdədir. Qarşıda ATƏT-in 2013-cü il prezident seçkiləri ilə bağlı yekun hesabatının açıqlanacağı belə iqtidarı çəkindirmir. Ekspertlərin fikrincə, hakimiyyətin yürütdüyü bu siyasətini ciddi beynəlxalq fəsadları ola bilər.
Hüquq müdafiəçisi Leyla Yunus bildirdi ki, hazırda A.Məmmədliyə qarşı həqiqətən də ciddi beynəlxalq təzyiq var. A.Məmmədli ilə bağlı beynəlxalq təzyiqlərin I.Məmmədovun həbsi zamanı açıqlanan bəyanatlarla oxşar olduğunu deyən L.Yunus vurğuladı ki, A.Məmmədlinin həbsi rəhbərlik etdiyi təşkilatın seçkilərdə reallaşdırdığı monitorinqin effektli olması ilə bağlıdır: “Əslində biz sovet dövrünə qayıtmışıq və hazırda sənin qanunu pozub-pozmamağın əhəmiyyətli deyil. Əgər yuxarıdan göstəriş varsa, o zaman sənin həbsin qaçılmaz olacaq. Əslində bununla hakimiyyət beynəlxalq aləmlə qarşıdurmaya getməkdən çəkinmədiyini göstərməyə çalışır”.
L.Yunus hesab edir ki, hakimiyyətin beynəlxalq aləmlə qarşıdurmaya getməsi fəsadsız ötüşməyəcək: “Hazırda beynəlxalq təşkilatların təmsilçiləri ilə yazışmalarımız davam edir. Biz Azərbaycanın AŞ PA-da rəhbərliyi həyata keçirməmişdən əvvəl siyasi məhbus məsələsi ilə bağlı ciddi addımlar atmasını istəyirik. Hazırkı dönəm üçün bu, Azərbaycan hakimiyyətinə qarşı bəlkə də yeganə təzyiq vasitəsidir. Mən ümid edirəm ki, beynəlxalq aləmdən bu istiqamətdə hakimiyyətə ciddi təpkilər gələcək”.
“Turan” Informasiya Agentliyinin direktoru Mehman Əliyevin fikrincə, əslində hakimiyyətin hazırkı aqressiv addımlarında təəccüblü heç nə yoxdur. Hakimiyyət hazırkı repressiv addımları ilə ona olan təzyiqlərə bir növ “hazırlıq” görür: “Hazırda beynəlxalq aləmdən gələn bəyanatları da ciddi təpki saymıram. Çünki beynəlxalq aləmin münasibəti bəyanatlardan o yana keçməyib. Hazırkı dönəmdə isə hakimiyyətə qarşı sərt, prinsipial addımların atılmasına ehtiyac var. Hakimiyyət Qərblə bazarlıq etməsi üçün siyasi məhbusların sayını artırmaqla məşğuldur. Çünki hakimiyyət bir müddət sonra ondan üzərinə götürdüyü öhdəliklərin icrasının tələb olunacağını gözəl bilir”.
Xəyal
