Ukrayna hökuməti bayramdan sonra Avropa Birliyi ilə danışıqları bərpa etmək istədiyini bəyan etdi
Leh Valensa: «Yanukoviç çox hiyləgərdir, eyni anda həm Avropayla, həm də Rusiyayla oyun oynayır»
Ukrayna Assosiasiya sazişinin imzalanması ilə bağlı Avropa Birliyi ilə danışıqları Yeni ildən sonra bərpa edəcək. Bu açıqlama ilə Ukraynanın Xarici işlər naziri Leonid Kojara çıxış edib. O bildirib ki, danışıqların iki mərhələsi Brüsseldə başa çatıb. Indi isə Avropada bayramla əlaqədar tətil başladığından danışıq aparmaq mümkün deyil. Ona görə də hökumət bu istiqamətdə bayramdan sonra hərəkətə keçəcək. Xatırladaq ki, dekabrın 23-də avrokomissar Joze Manuel Barrozo bəyan etdi ki, heç bir nəticə əldə olunmadığı üçün Avropa Birliyi Ukraynayla danışıqları dayandırır. Kojaranın bu açıqlaması isə Yanukoviç hökumətinin Avropa Birliyinin qərarından təşvişə düşdüyünü göstərir.
Prezident Viktor Yanukoviç dünən etiraz aksiyaları zamanı saxlanılan şəxslərin azadlığa buraxılmasını nəzərdə tutan qanunu imzalayıb. Prezident Administrasiyasının rəhbəri Sergey Levoçkin bildirib ki, qanun layihəsi administrasiyaya daxil olduğu variantda imzalanıb. Lakin Apelyasiya Məhkəməsinin hakimi Valeri Çernobuk bəyan edib ki, prezidentin bu qərarını icra etmək mümkün olmayacaq. Onun sözlərinə görə, qanun buna imkan vermir. Orada insanların hansı hallarda məsuliyyətdən azad olunduqları barədə heç nə göstərilməyib.
Dünən Ukraynada bütün gözlər Moskvada keçirilən Avrasiya Yüksək Iqtisadi Şurasının toplantısında olub. Toplantıda Ukraynanı baş nazir Nikolay Azarov təmsil edib. Səfər öncəsi məlumat yayılmışdı ki, Azarov bu tədbir çərçivəsində Gömrük Ittifaqına qoşulmaqla bağlı 60 sənəd imzalayacaq. Ukrayna Nazirlər Kabineti isə dünən açıqlama verərək bu məlumatın dezinformasiya olduğunu bildirib.
“Yanukoviç Rusiyadan bacardığını qopardır”
Polşanın keçmiş prezidenti, hazırda “Həmrəylik” Partiyasına rəhbərlik edən Leh Valensa hesab edir ki, Ukrayna prezidenti Viktor Yanukoviç həm Avropa Birliyi, həm də Rusiya ilə məharətlə oynayır: “Yanukoviç bilə-bilə ki, gec-tez Avropada olacaq, Rusiyadan da bacardığını qopardır. Yanukoviç çox hiyləgərdir”. Leh Valensa eyni zamanda, dekabrın 22-də Ukraynada “Meydan Milli Birliyi”nin yaradılmasını da alqışlayıb: “Indi əsas məsələ etirazçılar arasından ən fəallarını tapıb seçməkdir”.
Yeri gəlmişkən, dünəndən “Meydan Milli Birliyi”nə üzv qəbulu başlayıb. Arzu edən hər kəs birliyə qoşula bilər. Gənc müğənni Ruslana “Avromeydan”dakı 30 noyabr olaylarında xəsarət alanları dekabrın 25-də saat 12-də “Müstəqillik” meydanına toplaşmağa çağırıb. Ruslana bildirib ki, bu, xəsarət alanların qeydiyyata alınması üçündür.
Ukraynada yeni doğulan körpəyə Avromeydan adını verdilər
Avrointeqrasiya tərəfdarlarının Ukraynada başlatdığı etirazlar ölkənin dörd bir tərəfində insanların rəğbətini qazanıb. Dünən Ukraynanın Lvov şəhərində maraqlı bir hadisə yaşanıb. Şəhər sakini Yevgeni Tixun yeni doğulan körpəsinə Avromeydan adını verib. O bildirib ki, uşağın adını Kiyevdəki “Avromeydan”da keçirilən etirazların şərəfinə belə qoyub. Dediyinə görə, aksiyalar başlayandan vaxtının böyük hissəsini meydanda keçirir: “Avromeydan”da mənə heç kim pul vermir. Mən orada əqidəmə görə oluram. Əgər oğlum sonradan adını dəyişdirmək istəsə, öz qərarıdı, dəyişə bilər. Amma hələ ki, qohumlar, dostlar və qonşular bu qərarımızı dəstəkləyirlər”. Körpənin anası Mariya da bu addan məmnun qaldığını bildirib.
Saakaşvilinin Ukraynaya girişinə qadağa qoyuldu
Ukrayna Xarici Işlər Nazirliyi və Təhlükəsizlik Xidməti aralarında Gürcüstanın keçmiş prezidenti Mixail Saakaşvilinin, ABŞ və Avropa Birliyi ölkələri vətəndaşlarının olduğu 36 nəfərin ölkəyə girişinin qadağan olunması barədə iqtidardakı Regionlar Partiyasının deputatı Oleq Tsarevin müraciətini təmin edib(APA). Deputat xarici işlər naziri Leonid Kojara və Təhlükəsizlik Xidmətini rəhbəri Aleksandr Yakimenkonun adına müvafiq müraciəti dekabrın 8-də göndərib. O bildirib ki, bəzi əcnəbi siyasi texnoloqların və etirazların təşkili üzrə mütəxəssislərin Ukraynaya səfərləri milli təhlükəsizliyə təhdid yaradır. Siyahıda M.Saakaşvili ilə yanaşı daha 29 Gürcüstan vətəndaşının, eləcə də ABŞ-ın Con Hopkins Universitetinin elmi əməkdaşı Taras Kuzyo, tanınmış almaniyalı politoloq Andreas Umland və digər şəxslərin adları var. Gürcüstanın Ukraynadakı səfiri Georgi Zakaraşvili artıq 3 Gürcüstan vətəndaşının Ukraynaya səfərinə icazə verilmədiyini söyləyib. Onlardan biri “Rustavi-2″ telekanalının jurnalisti David Kakuliyadır. Səfir bu məsələni aydınlaşdırmağa çalışdığını deyib.
Gültəkin
