Avropa Birliyi Ankaraya xəbərdarlıq etdi, Vaşinqton Türkiyədən təkzib istədi
Abdulla Gül: «Korrupsiya varsa, ört-basdır edilə bilməz»
Türkiyə prezidenti Abdulla Gül ölkədəki rüşvət və korrupsiya qalmaqalına ilk dəfə münasibət bildirib. A.Gül Türkiyədə məhkəmələrin müstəqil və tərəfsiz olduğunu vurğulayıb: “Türkiyə artıq 20 il əvvəlki köhnə Türkiyə deyil. Ortada korrupsiya varsa, üstü qapana bilməz. Bu məsələ ilə bağlı hamı rahat olsun. Hər kəs hüquqi prosesə hörmətlə yanaşmalıdır. Məhkəmə sistemi hər hansı məsələni sual altında qoymadan yekun qərarını verəcək”.
Adı rüşvət və korrupsiyada hallandırılan nazirlərin aqibətinin necə olacağı ilə bağlı suala isə Gül belə cavab verib: “Nazirlərlə bağlı hörmətli baş nazirlə uzun-uzadı söhbət etdik. Dəyərləndirmə aparır. Mən də öz fikirlərimi açıqladım. Ölkəyə qayıdan kimi görüşəcəyik. Sualınıza cavabı da o görüşdən sonra eşidəcəksiniz”.
İrandan Rza Zərrabla bağlı açıqlama
Iran Xarici Işlər Nazirliyi Türkiyədə keçirilən korrupsiya və qaçaqmalçılıq əməliyyatı çərçivəsində həbs olunmuş iş adamı Rza Zərrabla bağlı açıqlama yayıb. Xarici işlər nazirinin Asiya və Sakit okean regionu üzrə müavini Ibrahim Rahimpur bildirib ki, Türkiyədəki son hadisələr tək R.Zərrabla bağlı deyil: “Məsələ bu ölkədəki quruluşun pərdə arxasında cərəyan edən qarşıdurmalardan qaynaqlanır”. Onun sözlərinə görə, soyadını Sərraf olaraq dəyişdirmiş iş adamı haqqında bəzi iddialar ortaya atılıb: “Biz mövzunu hələ araşdırdığımızdan, bir qiymətləndirmə edə bilməyəcəyik. Düzdür, Iranla bağlı bəzi iqtisadi əlaqələr gündəmə gətirilib. Lakin bu məsələ Türkiyənin daxili məsələsidir. Mövzu qarışıq olduğundan, mühakimə üçün şərtlər əlverişli deyil”. I.Rahimpur R.Zərrabın rəsmi şəxs və dövlətlə əlaqəsi olmadığından, onun həyata keçirdiyi bank əməliyyatlarının Iranla nə qədər əlaqəsi haqqında məlumatları olmadığını deyib: “Son bir həftədəki bütün məlumatlar medianın ortaya atdığı məlumatlardır. Ancaq həyata keçirilən həbslər mövzunun ciddiliyini göstərir”.
Azərbaycanın Türkiyədəki səfirliyinin mətbuat müşaviri Elsevər Salmanov isə açıqlama verib ki, Rza Zərrab heç vaxt Azərbaycan vətəndaşı olmayıb. E.Salmanov Türkiyə mediasında R.Zərrabın “Bakıda doğulan keçmiş azəri vətəndaşı” kimi təqdim olunmasından ciddi narahatlıq duyduqlarını bildirib: “Bu şəxs Bakıda doğulmayıb. Azərbaycanın dövlət orqanlarında bu barədə hər hansı sənəd yoxdur. O nə keçmişdə, nə də indi Azərbaycan vətəndaşı olub. Gələcəkdə də ola bilməz”.ÿQeyd edək ki, Türkiyə mediasında iranlı R.Zərrabın 1984-cü ildə Bakıda doğulduğu haqda məlumatlar yayılıb.
Rza Zərrabın İranlı şəriki ilk dəfə danışdı
Bu arada, dünən R.Zərrabın Irandakı şəriki, 39 yaşlı milyarder Babək Zəncanidən açıqlama gəlib. Zəncani deyib ki, Türkiyə mətbuatında barəsində yayılan və heç bir məna verə bilmədiyi xəbərlərə münasibət bildirmək məcburiyyətində qalıb. Həyata keçirdiyi işlərdə qeyri-qanuni heç bir şey olmadığını bildirən Zəncani R.Zərrabla əlaqələrindən də danışıb. Onun sözlərinə görə, Zərrabla bir neçə dəfə görüşüb. Amma Türkiyə mediasının iddia etdiyi kimi, o, Zərrabın “şefi” deyil: “Türkiyədə həyata keçirdiyim ticari fəaliyyətimdə qanunsuz heç bir hərəkətə yol verilməyib. Hazırda həbs edilən şəxslərdən isə yalnız Rza Zərrabı tanıyıram. Onunla da həyatım boyu bir neçə dəfə görüşmüşəm. Zərrabın ticari fəaliyyətində heç bir formada yer almıram. Gördüyü işlərdən də xəbərim yoxdur. Qanunsuz işlərə qarışıblarsa, məsuliyyət onların üzərindədir. Məni bu işə hər hansı şəkildə qarışdırmanızı istəmirəm”.
Zəncani Zərrabla görüşmək üçün bir neçə gün əvvəl saxta sənədlə Antalyaya gəldiyi ilə bağlı xəbərləri də təkzib edib: “Tamamən yalan məlumatdır. Altı aydır ki, Irandan kənara çıxmıram. Mən tanınmış adamam. Qeyri-qanuni yolla səyahət etməyim və saxta sənəddən istifadə etməyim mümkün deyil”.
Baş nazir Ərdoğanın liderliyinə inandığı üçün Türkiyəyə sərmayə qoyduğunu deyən iş adamı bu ölkə ilə bağlı fəaliyyətini bundan sonra da davam etdirəcəyini bəyan edib: “Türkiyəyə sərmayə qoymağı davam etdirəcəm. Haqqımda saxta xəbərlər yayıb məni bezdirənləri sevindirməyəcəm. Məndən tələb olunan bütün sənədləri təqdim etməyə hazıram”.
Ağ ev ABŞ səfirinə hücumlardan narahatdır
ABŞ Dövlət Departamentinin nümayəndəsi Türkiyənin bəzi media orqanlarında ABŞ-ın Ankaradakı səfiri Frenk Rikkardone haqqında yayılan xəbər və iddialarla bağlı “Vatan” qəzetinə açıqlama verib. Adının çəkilməsini istəməyən amerikalı nümayəndə deyib: “Bəzi Türkiyə media orqanlarında Amerika səfiri, digər yüksək səviyyəli ABŞ nümayəndələri, bəzi ABŞ vətəndaşları, beynəlxalq media təmsilçiləri haqqında iftiralar və hücumlar dərin narahatlıq doğurur”. ABŞ Dövlət Departamentini təmsilçisi Türkiyə hökumətini bu kampaniyaya reaksiya verməyə çağırıb: “Ümid edirik ki, Türkiyə hökuməti bu iddiaları təkzib edəcək, hücumları qınayacaq və həyati önəmə sahib ikitərəfli əlaqələrimizi qoruyacaq”. Qeyd edək ki, Türkiyənin iqtidara yaxın mediası rüşvət və korrupsiya əməliyyatının arxasında ABŞ-ın dayandığını bildirir və səfir F.Rikkardonenin ölkədən qovulmasını tələb edir.
Füle: “Ərdoğan Avropa Birliyinə üzvlük perspektivini riskə atır”
Avropa Birliyinin genişlənmə və Avropa qonşuluq siyasəti üzrə komissarı Ştefan Füle Türkiyə hökumətinə xəbərdarlıq edib. Ş.Füle öz sözçüsü vasitəsilə yaydığı açıqlamada Türkiyədə məhkəmə-hüquq sisteminin müstəqilliyi prinsipinin pozulduğunu və baş nazir Ərdoğanın Türkiyənin AB-yə üzvlük perspektivini riskə atdığını söyləyib. Ş.Füle bildirib ki, məhkəmə-hüquq sisteminin müstəqilliyi Türkiyənin AB-yə üzvlüyü prosesində ən önəmli məsələlərdən biridir: “Polis müdirlərinin qovulması və polisə apardığı istintaq barədə yuxarı orqanlara və daha səlahiyyətli şəxslərə məlumat vermək məcburiyyəti gətirilməsi istintaqın müstəqilliyi, effektivliyi və tərəfsizliyinə, eləcə də hakimiyyət bölgüsü prinsipinə ziddir və narahatlıq doğurur”.
“Rüşvətdə günahlandırılan nazirlər hələ də öz vəzifələrində qalır”
Türkiyə-Avropa Birliyi birgə parlamentlərarası komissiyasının həmsədri, Avropa Parlamentinin liberallar qrupunun üzvü, ingiltərəli Endrü Daff isə AB-ni Türkiyədək rüşvət və korrupsiya əməliyyatı ilə bağlı səssiz qalmaqda ittiham edib. O, öz “Twitter” səhifəsində yazıb: “Türkiyədə media təzyiq altındadır, xaricilər günahlandırılır, rüşvətdə günahlandırılan nazirlər hələ də öz vəzifələrində qalır. Harada belə bir şey ola bilər?”.
