İfadə verən məhkumlar istintaq zamanı fiziki zorakılığa məruz qaldıqlarını dedilər
Bu gün Şəki Rayon Məhkəməsində İsmayıllı işinə görə həbs olunan şəxslərin, o cümlədən Müsavat başqanının müavini Tofiq Yaqublunun və “ReAl” təşkilatının sədri İlqar Məmmədovun növbəti məhkəmə prosesi keçirilib.
Məhkəməyə Müsavat başqanı İsa Qəmbər və partiya rəhbərliyinə daxil olan bir neçə nəfər, eləcə də “ReAl” hərəkatının rəhbər şəxsləri qatılıblar.
Məhkəmə iclasında 5 nəfər təqsirləndirilən şəxs dindirilib. Bildiriblər ki, ibtidai istintaq zamanı onlardan ifadə alınanda fiziki təzyiqlərə məruz qalıblar, döyülüblər. Onlar özlərini təqsirli bilmədiklərini məhkəmənin diqqətinə çatdırıb
Bu zaman təqsirləndirilən Qarabağ əlili, epilepsiya xəstəsi Abdullayev Mirkazım ifadə verərkən huşunu itirib. Bundan sonra təcili yardım çağırılıb.
Məhkəmə dekabrın 29-da işini davam etdirəcək.
Bundan sonra təqsirləndirilənlər Gəncə İstintaq təcridxanasında deyil, yeni istifadəyə verilmiş Şəki İstintaq təcridxanasında saxlanılacaq.
İsa Qəmbər məhkəmə prosesini dəyərləndirərək “musavat.com”a bildirib ki, bu, məhkəmə yox, məzhəkədir: “Vəkillər nə bacarırlarsa edirlər. Həmişəki kimi cəsarətli və peşəkar şəkildə müdafiə edirlər. Tofiq Yaqublu və İlqar Məmmədov isə formadadır. Onlar haqqı-ədaləti qoruyurlar.
Bu hadisələrdə günahsızlar tutulub, əsl baiskarlar azadlıqda gəzir. Cəmiyyət bu ədalətsizliyə etiraz etməlidir. Günahkarların cəzalandırılmasına, xalqa qarşı həqarət, hörmətsizlik göstərənlərin qanun qarşısında cavab verməsinə nail olacağıq. Buna inanıram və həmin günün yaxınlaşması üçün müsavatçı, cəbhəçi, gənclərimizlə birlikdə mübarizəmizi davam etdiririk”.
