Türkiyəli iş adamının iddialarına görə Mahir Abdullayev sağdır
Sabiq deputat Gülər Əhmədovanın mərhum rəfiqəsi Sevinc Babayevanın Türkiyədə gizlədilməsində adı keçən Səlcuq Ağlayan fəaliyyəti dayandırılmış Azərbaycan Beynəlxalq Universitetinin rektoru, hazırda Fransada mühacirətdə olan Elşad Abdullayevin ittihamlarına cavab verib.
Xatırladaq ki, Eldaşd Abdullayev “Azadlıq”a ünvanladığı məktubunda Səlcuq Ağlayanın adının bir sıra qalmaqallı olaylarda hallandığını bildirmişdi. O, həmçinin qeyd etmişdi ki, Səlcuq Ağlayanın “Seval” ləqəbli Nüşabə Mirzoyeva adlı bir qadınla əlaqəlsi var. Elşad Abdullayev həmin qadının adam oğurluğu ilə məşğul olan mütəşəkkil dəstənin fiqurantı olduğunu qeyd etmişdi.
Sabiq rektor həmçinin əlində olan faktları əsas gətirərək vurğulamışdı ki, Səlcuq Ağlayan prezidentin şəxsi mühafizə xidmətinin rəhbəri Bəylər Əyyubovun adamıdır.
Səlcuq Ağlayan isə “Yeni Müsavat”a müsahibəsində bildirib ki, Elşad Abdullayevin ittihamları əsassızdır:
“Bu adam çox yaxşı ssenarilər yazır. Zatən yaxşı bir aktyor olduğunu daha öncədən də sübut edib millətə. Doğma qardaşını yoxa çıxarmış biridir. Az qalıb, mən də onun yanına gedəcəm və mənə qarşı səsləndirdiyi iddiaların hesabını, sənədlərini istəyəcəm ondan. Verə bilməsə, hesabını soruşacam bu sözlərinin. Bu da onun son aktyorluğudur. Nə deyim? Hesabını verə bilməyəcəyi, boyundan böyük sözlər danışır. Inşallah, altından çıxa bilər bu sözlərin. Isbat edə bilməsə, onsuz da bunun cavabını verəcək”.
Səlcuq Ağlayan Nüşabə Mirzoyeva adlı qadını tanımadığını deyib: “Əsla tanımıram. Kimdir o qadın? Nə telefonla danışmışam, nə də tanıyıram. Elşad içib-içib sevgililərinə zəng etdiyi günləri unutmasın. Onun Rusiyadakı evini araşdırın. Gecə saat 3-də, içəndən sonra içib kimə zəng etdiyini xatırlasın. Deyəsən, Elşad yenə yaxşı içib, sonra da xəyal dünyasına dalıb. Adını çəkdiyiniz qadın da çox güman ki, Elşadın yeni sevgilisidir. Indi də ona narkotik verib, xəyal dünyasında oynadır. Daha öncə hansı qadınlarla nə münasibəti olub, özü bilər, mən bilmərəm. Ola bilər indi də canı sıxılır, amma yanlış insanla uğraşır. Bizim dünyamızda sübutu olmayan iftiranın, şərin cavabı verilir”.
Türkiyəli iş adamı iddia edib ki, Elşad Abdullayevin qardaşı Mahir Abdullayev sağdır: “Yaxşı araşdırın. Qardaşı sağdır. Sağ deyilsə, özü öldürüb qardaşını. Çünki qardaşı çox böyük məbləğdə pul götürüb. Elşad da bu pulun üstünə qonmaq üçün qardaşını düşünülmüş şəkildə yoxa çıxarıb. Sonra da özü öz yalanlarına inanıb qardaşını yoxa çıxarıb. Araşdırın, yaxşı araşdırın. Içib-içib telefonda ağladığı qadınların kim olduğunu ondan soruşun. Gecə saat 3-də Rusiyadakı möhtəşəm evindən kimə zəng edib ağlayıb, soruşun, desin sizə. Biz Allaha şükür, dik yaşadıq, dik də öləcəyik”.
