Gücümüz Azərbaycan xalqının azadlıq ehtirasından doğur
Bu gün “Azadlıq” qəzetinin 24 yaşı tamam olur. Bizim üçün bayramdır və bu bayramı “Azadlıq”ı sevən hər kəslə bölüşürük. “Azadlıq”ı sevənlərin çox olduğunu bilirik. Azərbaycana yerləşməyəcək qədər çox. Bu, bizim hamımızın fərəhimizdir. Bu redaksiyada çalışanların və bu qəzeti oxuyanların birgə sevgisindən doğur “Azadlıq”.
Bu il “Azadlıq” üçün ağır sınaqlar ili oldu, amma biz bu sınaqlardan birlikdə keçdik. Həm də, ilk dəfə deyildi ki, bizim üçün qapadılan qapıları oxucularımızla bir yerdə açırıq. Həmin ağır günlərdə biz hamınmız bir yerdə “Azadlıq”ın Azərbaycan üçün nə qədər önəmli bir dəyər olduğunu bir daha birlikdə qəbul etdik.
“Azadlıq” söz azadlığının küncə qovulduğu Azərbaycanın təskinliyidir. Bunu bilirik. “Azadlıq” vətəndaşlarımıza zorla qəbul etdirilmək istənilən tabuların başlıca əngəlidir. Bunu bilirik. “Azadlıq” Azərbaycan xalqının azadlığını cilovlamaq istəklərini cilovlayan qüdrətdir. Bunu bilirik. Və bunu bilərək də millətin, xalqın önündə hansı xidmətləri göstərməli olduğumuzu anlayırıq. Bu xidmətdən heç bir şərt və zorluq altında geri durmaq niyyətində deyilik.
“Azadlıq”ın qüdrəti və gücü Azərbaycan xalqının azadlıq ehtirasından doğur. Buna görə də bu qəzeti sındırmaq mümkün olmur. Yəqin, hər kəsin gözləri qarşısında millətin azad sözə olan ehtiyacını bir-birinin dalınca güzəştə gedən medya brendlərini hamı necə varsa, elə də tanıyır. Və şübhəsiz, hamı onun fərqindədir ki, “Azadlıq” bu 24 ili hansı məhrumiyyətlər və savaşlar hesabına fəth edir. Oxucularımızı bir daha əmin edirik ki, “Azadlıq” öz prinsiplərini kimsəyə güzəştə getməyəcək. Çünki bu prinsipləri güzəştə getmək haqqına sahib deyilik. Azərbaycan xalqı bizə bu haqqı vermir. Bizim ictimai mövcudluğumuzda “qəsb etmək” anlayışı yoxdur, “xidmət etmək” anlayışı var. Və bu xidməti göstərəcəyik. Qorxmadan, çəkinmədən, bütün əziyyətlərə və zorluqlara qatlanaraq.
Davam edəcəyik. Bu millətin demokratiya və azadlıq haqqını qəsb edənlərin haqsızlıqları öz qiymətini alan günlərə də bir yerdə şahidlik edəcəyik. “Azadlıq” həmişə sizinlə olacaq!
