Həbs edilən bankir aldığı pullardan danışdı

Türkiyədə “böyük rüşvət” əməliyyatında həbs edilən “Halkbank”ın baş direktoru Süleyman Aslanın məhkəmədəki müdafiə çıxışında dedikləri mətbuata sızıb.
Onun evində ayaqqabı qutularının içərisində tapılan 4.5 milyon dolların ianə olduğunu dediyi artıq yayılmış məlumatdır. Bankirin sözlərinə görə, evində saxladığı 4.5 milyon dollar Makedoniyada Balkan Universiteti və Çorum Osmancık Anadolu İmam Hatip Liseyi üçün yığılmış ianə olub.
Türkiyə mətbuatının yaydığı son məlumatlara görə, Süleyman Aslan məhkəmədə deyib ki, Universitetin qəyyumlar şurasının sədri olan H.B isimli İstanbuldan millət vəkili ona “Türkiyədə ianə yığılıb, Makedoniyaya çatdırmağa çətinlik çəkirik” deyərək kömək istəyib. Sonra oğlu C.B vasitəsilə ona 1 milyon 950 min avro verib.
Aslan ifadəsində Rza Zərrab barəsində də danışıb: “Rza Sarraf (Zərrabın soyadı Türkiyə vətəndaşlığında Sərraf kimi gedir – red.) xeyriyyəçiliklə məşğul olmaq istədiyini deyincə, ağlıma məzunu olduğum Çorum Osmancık İmam Hatip Liseyi gəldi. Ehtiyacları ona çatdırınca məsrəfləri ödəməyə hazır olduğunu dedi. Doğulduğum yer, oxuduğum məktəb olduğunu düşünüb, bu təklif barədə yerli idarəçilərə, məktəb rəhbərliyinə və Çorumdan olan millət vəkillərinə məlumat verdim.
Texniki səbəblərdən layihənin icrasına başlaya bilmədiyimiz üçün verilən ianələri öz evimdə saxladım. Vəziyyəti Çorum millət vəkilimiz C.B.-yə də anlatdım. 7 milyon TL ianənin yığıldığını dedim”.

Süleyman Aslan deyib ki, Balkan Universiteti üçün yığılan pulların ilk 450 min avrosunu qarşı tərəfdəki hüquqi prosedurlar səbəbindən vaxtında ünvanına çatdırmaq mümkün olmayıb. Buna gör də həmin vəsaiti də evində saxlayıb.
Bank direktorunun sözlərinə görə millət vəkili H.B-nin ona verdiyi 1 milyon 950 min avro ianənin yalnız 950 minini çətinliklə ünvanına çatdıra biliblər. 1 milyon avro isə evdə qalıb. Əməliyyat zamanı həmin pullar müsadirə olunub.

Süleyman Aslan bildirib ki. Rza Zərrab da Balkan Universitetinə öz xətti ilə 500 min avro ianə göndərib. İanə üçün nəzərdə tutduğu qalan vəsaiti isə göndərməyə çətinlik çəkib və pulları ünvanına çatırmaq üçün “Halkbank”ın direktoruna verib. Bankirin dediyinə görə, ona verilən pulları Makedoniyaya niyə köçürə bilmədiklərini göstərən bütün qeydlər bankın sənədlərindən mövcuddur.
Süleyman Aslan qeyd edib ki, hazırda müsadirə olunan pulların 2 milyon avrosu Balkan Üniversiteti üçün verilən, qalanı isə İmam Hatip Liseyi üçün ayrılan pullardır.