Prezidentin sabiq işlər müdiri Akif Muradverdiyevin vəkili Mətləb Qasımov “Media forum” saytına danışıb. Vəkil həbs olunan zaman Akif Muradverdiyevin çantasında tapılan qızıl sikkələrin aqibəti haqqında deyib ki, qiymətli metallar məhkəmənin hökmü ilə dövlət nəfinə verilib: “Məhkəmə boyu Akif Muradverdiyevin üzərindən tapılan 40 ədəd onluq sikkə ortaya gətirilmədi, üzə çıxarılmadı. Məhkəmənin hökmü ilə dövlət nəfinə müsadirə edildi. Bildirdik ki, qızıllar bizim deyil, onu çantamıza atıblar. İstintaq araşdırıb mənbəyini tapmalı idi, harada, necə, kimin vasitəsilə əldə edilib. Heç nə araşdırılmadı. İstintaq heç bir sübut, dəlil təqdim etmədi. Hətta mağazanın internet saytını göstərdim ki, Moskvada həmin qiymətli əşyalar, çar Rusiyasının qızıl sikkələri satılır. Qiyməti də bura ilə eynidir. Ona bu qızıllar lazım idisə oradan da ala bilərdi. Deyirlər tamah məqsədilə aparıb. Əgər qiymət eynidirsə, hansı tamah məqsədindən söhbət gedə bilər? Biz yazılı qaydada cavab da almışıq, məhsul açıq satışda var, qiyməti də bəllidir. Vəsatətlərimizdə bildirdik ki, Akif Muradverdiyev hava limanında bütün yoxlanış mərhələlərini, aviasiya təhlükəsizliyi, gömrük, sərhəd xidmətini keçib. Heç bir monitorda şəxsin üzərində qızıl, metal əşyanın olduğu görünməyib, birbaşa uçuş zonasından onu geri qaytarıblar. Sorğu verdik ki, hava limanında aparılan çəkilişləri gətirin, hər şey orada əks olunmalıdır. Sübut gətirmək prokurorluğun üzərinə düşür. Təəssüf ki, heç biri təmin edilmədi.
Sanksiya 1 ildən 5 ilə qədərdir. Prokuror Akif Muradverdiyevə məhz 5 il iş tələb etdi. Niyə? Tutaq ki, cinayət törədilib. İşdə hansı ağırlaşdırıcı hallar var ki, dövlət ittihamçısı ona ən yüksək cəzanı verir? Akif Muradverdiyev əvvəllər həmin maddə ilə məhkum edilməyib. Təkcə 2005-ci ildə siyasi məqsədlə həbs olunub, Avropa İnsan Hüquqları Məhkəməsi həbsin qanunsuz olduğu haqda qərar qəbul edib. Niyə bir, iki, üç deyil, beş il? Bütün bunlara çıxışlarımda cavab istəmişəm. Heç bir əsas gətirilməyib. Bütün bunlar sadəcə güc strukturları tərəfindən qeyri-peşəkarcasına hazırlanmış iş oldu”. Akif Muradverdiyev Xəzər Rayon Məhkəməsinin 13 dekabr hökmü ilə qaçaqmalçılıqda təqsirli bilinərək 4 il müddətinə azadlıqdan məhrum olunub. Prokuror ona 5 il həbs istəmişdi. Akif Muradverdiyev iyun ayında tutulub. Milli Təhlükəsizlik Nazirliyinin rəsmi məlumatına görə, Akif Muradverdiyev Bakının beynəlxalq hava limanından Rusiya Federasiyasına aparmaq məqsədilə külli miqdarda dəyəri olan, çar Rusiyasına aid qədim qızıl pul sikkələrini qaçaqmalçılıq yolu ilə Azərbaycan Respublikasının gömrük sərhədindən gizli keçirib.
