Barrozu: «Heç bir nəticə yoxdur, danışıqları davam etdirməyə dəyməz»
Ukrayna hökumətindən operativ cavab gəldi
Uzun müzakirə və tərəddüdlərdən sonra Avropa Birliyi Ukraynayla Assosiasiya sazişi istiqamətində danışıqları dayandırdı. Avrokomissar Joze Manuel Barrozu qərarı belə əsaslandırıb ki, rəsmi Kiyev avrointeqrasiya kursunu dəyişmədiyini bəyan etsə də, bu bəyanat heç nəyə əsaslanmır. Belə olan halda da Barrozu sazişlə bağlı danışıqları davam etdirməyin heç bir mənasını görmür. Brüsseldə keçirilən yekun mətbuat konfransında avrokomissar bildirib ki, Ukrayna Nazirlər Kabinetinin sazişlə bağlı prosesi dayandırmaq qərarından sonra da Kiyevlə Brüssel danışıqları ən yüksək səviyyədə davam etdirib: «Bu görüşlərdə Ukrayna hökumətinin üzvləri hər dəfə əmin etməyə çalışıblar ki, Kiyev avrointeqrasiya kursundan dönməyib. Lakin bu danışıqların arxasında heç vaxt onların sazişi imzalamaqla bağlı konkret öhdəlikləri durmayıb. Ona görə biz hesab edirik ki, indi danışıqları davam etdirməyə dəyməz. Yoxsa bu, konkret nəticələri olmayan dialoqdan başqa bir şey olmayacaq». Qeyd edək ki, buna qədər Avropa Birliyinin digər rəsmiləri də oxşar bəyanatlar səsləndirmişdilər. Amma bu bəyanatlar adətən qeyri-rəsmi xarakter daşıyırdı. Xatırlayırsınızsa, bir müddət əvvəl Avropa Birliyinin genişlənmə və qonşuluq siyasəti üzrə komissarı Ştefan Füle özünün «Twitter» səhifəsində qurumun Assosiasiya sazişi ilə bağlı danışıqları dayandırdığını bəyan etmişdi. O bildirmişdi ki, Ukrayna hökumətinin sazişlə bağlı fikir və əməlləri ziddiyyət təşkil edir. Və onların arqumentlərinin reallığqla heç bir əlaqəsi yoxdur. Həmin vaxt Fülenin bu bəyanatı Avropa Birliyinin bir sıra təmsilçiləri tərəfindən tənqid edilmişdi. Onlar bildirmişdilər ki, Füle belə bəyanatlar verərkən ehtiyatlı olmalı, üstəlik Assosiasiya sazişi kimi ciddi bir məsələyə sosial şəbəkədə rəy verməməlidir. Həmin vaxt Ukrayna baş nazirinin müavini Sergey Arbuzov da açıqlama verərək bundan sonra ancaq Brüsseldən gələn rəsmi bəyanatları nəzərə alacaqlarını bildirmişdi. Bundan sonra AB-yə üzv ölkələrin xarici işlər nazirləri ayrı-ayrılıqda açıqlama verərək Avropa Birliyinin qapılarının Ukraynaya açıq olduğunu bəayn etmişdilər. Almaniya kansleri Angela Merkelin də mövqeyi eyni olmuşdu.
Yalnız Avropa Parlamentinin prezidenti Martin Şults Füle ilə bənzər mövqedən çıxış edərək «Artıq Ukrayna prezidenti Viktor Yanukoviçdən avrointeqrasiyaya yönəlməsini gözləməyə dəyməz» açıqlamasını vermişdi. Lakin Şults bununla belə, qapıların Ukraynanın üzünə açıq qalacağını bəyan etmiş və bildirmişdi ki, Avropa Birliyi avrointeqrasiya tərəfdarı olan ukraynalıların ümidini qırıb onları tək qoya bilməz. Ukrayna hökumətinin isə Barrozunun bu bəyanatına münasibəti maraqlı olub. Baş nazir Nikolay Azarov açıqlaması ilə sanki bu bəyanatı ciddi qəbul etmədiklərini nümayiş etdirib: «Bəlkə cənab Borrozu qarşıdan gələn Yeni ildən təsirlənərək belə deyib? 23 dekabrda Avropada Yeni il tətili başlayır və yanvarın 8-nə qədər davam edir. Həmin müddətdə o, həqiqətən də heç kimlə danışmayacaq». Azarov onu da bildirib ki, Assosiasiya sazişi ilə bağlı Ukraynada fikir ayrılığı var: «Deyirlər, bizə təminat verin ki, filan müddətə sazişi imzalayacaqsınız. Bizsə deyirik ki, siz təminat verin ki, şərtlərimizi qəbul edəcək, Ukraynaya maliyyə dəstəyi göstərəcəksiniz».
Gültəkin
