“Yeni Müsavat”da haqqımda gedən məqalənin kimlərin sifarişi əsasında yazıldığını yaxşı bilirəm. Lazım olsa ölkəyə qayıdan kimi böhtan xarakterli yazıların sifarişçilərinin adını açıqlayacağam”. Bu sözləri axar.az-a bütün Qafqazın şeyxi Allahşükür Paşazadənin qardaşı, deputat Cavanşir Paşazadə Türkiyədə həbs edilən Rza Zərrabla əlaqələri barədə “Yeni Müsavat” qəzetinin yaydığı məlumata münasibət bildirərkən deyib.
Deputat əlavə edib ki, qəzeti məhkəməyə verəcək: “Mən o insanı (Rza Zərrab nəzərdə tutulur) tanımıram və görsəm də tanımaram. Mənim o insanla heç bir əlaqəm yoxdur. Bu yazı jurnalist təxəyyülünün məhsuludur. Indi ölkə xaricindəyəm, yanvarın 10-da qayıdıram və ölkəyə qayıdan kimi ”Yeni Müsavat” qəzetini məhkəməyə verəcəm. Bu arada Palmali Şirkətlər Qrupunun da bu çirkin işdə adını hallandırırlar. Türkiyə hüquq-mühafizə orqanları bir il ərzində təhqiqat aparıblar və cinayətkarları həbs ediblər. Əgər Mübariz Mənsubovun bu cinayətlərə aidiyyəti olsaydı, onu da həbs edərdilər. Ona görə də azərbaycanlı iş adamına bu cür böhtan atmaq düzgün deyil”.
Cavanşir Paşazadə bundan əvvəlki açıqlamasında da qəzeti məhkəməyə verəcəyi ilə hədələyib. Deputatın növbəti dəfə bu məsələyə qayıtması “Yeni Müsavat”ı məhkəməyə verməkdə israrlı olduğunu göstərir.
Bəs “Yeni Müsavat” qəzetinin baş redaktoru Rauf Arifoğlu Cavanşir Paşazadənin iddiaları və hədələri barədə nə düşünür?
Baş redaktor “Azadlıq”a açıqlamasında bildirib ki, sözügedən yazı redaksiyaya daxil olan məlumatlar əsasında hazırlanıb və burada hər hansı qərəz yoxdur. Rauf Arifoğlu həmçinin əlavə edib ki, məhkəməyə müraciət etmək Cavanşir Paşazadənin hüququdur: “Biz həmin yazını əldə etdiyimiz məlumatlar əsasında dərc etmişik. Və bildirmişik ki, qarşı tərəfin də mövqeyini dərc edə bilərik. Yəni heç bir qərəzimiz olmayıb. Əgər Cavanşir Paşazadə bizi məhkəməyə verməkdə israr etsə, bu onun haqqıdır, etirazımız olmayacaq, özümüzü müdafə edəcəyik.
Bu ictimai əhəmiyyəti olan bir məsələdir. Ona görə də əldə olunan məlumatları dərhal yaymaq olar. Bu dünya standartlarında da belədir. Digər tərəfdən Paşazadələrin çirkli pulların yuyulmasında adları ilk dəfə deyil ki, hallanır. Allahşükür Paşazadənin qudası Əli Evsen məhz buna görə həbs olunmuşdu. Biz də bununla bağlı yeni məlumatlar aldıq və çap etdik. Bundan başqa biz həmin məlumatları dərc etməzdən bir gün əvvəl ölkənin əksər rus və azərbaycan dilli saytlarında Allahşükür Paşazadənin özünün Rza Zərrabla əlaqəli olması barədə xəbər yayılmışdı. O xəbərlər və linklər əlimizdədir. Və Paşazadələr həmin xəbərlərə reaksiya verməyiblər. Əgər versəydilər nəzərə alardıq. Beləliklə, bizim bir istinad yerimizdə mediada təkzib olunmayan həmin məlumatlardır”.
Baş redaktoru yazının sifariş olması barədə iddiaların əsassız olduğunu vurğulayıb: “Burada hər hansı sifarişdən söhbət gedə bilməz. Gecə yarısı kimdi bizə sifariş verən. Bu o qədər də operativ iş deyil. Sifariş vermə uzun müddətli prosesdir, yazılmalıdır, hazırlanmalıdır və qərar verilməlidir. Bu iddia heç bir tənqidə dözmür”.
Azad
