Kiyevdə yenə 100 min etirazçı küçələrə çıxdı
«Elə vəziyyətə salacağıq ki, yer ayaqlarının altından qaçacaq»
«Hakimiyyətdəki yaramazlara rahat yaşamağa və yatmağa imkan verməyəcəyik»
Dünən müxalifət liderləri Arseyni Yasenyuk, Vitali Kliçko və Oleq Tyaqnibokun təşəbbüsü ilə Ukraynada sayca dördüncü “xalq yığıncağı” keçirilib. Bir aydan artıqdır meydanda olan avrointeqrasiya tərəfdarları hesab edirlər ki, prezident Viktor Yanukoviç onların tələblərinə məhəl qoymaq istəmir.
Onlar da tələblərində israrlı olduqlarını nümayiş etdirmək və hakimiyyətin avrointeqrasiya tərəfdarları ilə hesablaşmasına nail olmaq üçün dünən növbəti izdihamlı mitinqin təşkilinə qərar veriblər. “Gücümüzün mitinqi” şüarı altında keçirilən aksiyanın budəfəki ünvanı da “Müstəqillik” meydanı (Maydan) olub. Meydana paytaxt Kiyevlə yanaşı, bölgələrdən də minlərlə insan axın edib. Həmişə olduğu kimi, bu dəfə də meydanda çadırlar qurulub, fəallar aksiyaya gələn insanlara isti çay və yemək paylayıblar. Çadırlarda aksiyaçıların isinməsi və isti paltarla təminatı üçün də şərait olub. Mitinqin başladığı ilk saatda meydana təxminən 15 min etirazçı toplaşıb. Aksiyanın sonlarına yaxın isə müxalifət nümayişçilərin sayının 100 min olduğunu açıqlayıb.
“Yanukoviç rejimi devrilənə qədər meydanda qalaq”
Müxalifət liderləri əvvəldən bəyan etmişdilər ki, bu aksiyada bundan sonrakı addımlarının nədən ibarət olacağını elan edəcəklər. “Xalq yığıncağı” ənənəyə uyğun olaraq duaların oxunması ilə başlayıb. Aksiyaçılar qarşısında ilk olaraq keçmiş daxili işlər naziri Yuri Lutsenko çıxış edib. Lutsenko aksiyaçıları Yanukoviç rejimi devrilənə qədər meydanda qalmağa səsləyib. O bildirib ki, yazda Ukraynada tam azadlıq bərqərar olunmalı, yayda isə azadlığın sərhədləri Krıma qədər çatmalıdır.
“İnzibati binaları partizansayağı blokadaya alacağıq”
“Azadlıq” Partiyasının lideri Oleq Tyaqnibok mitinqdəki çıxışı zamanı bildirib ki, müxalifət “Müstəqillik” meydanında Maydan Milli Birliyinin yaradılmasını elan edir: “Kiyevdə olanlar burada mübarizə aparacaq – Maydanda qalacaq. Sonra biz inzibati binaları partizansayağı blokadaya alacaq, hakimiyyətdəki yaramazlara rahat yaşamağa və yatmağa imkan verməyəcəyik. Evlərinə qayıdanlar isə Maydan Milli Birliyi üçün dəstələr quracaq. Bu bizim vəzifəmizdir. Bu hakimiyyəti elə vəziyyətə salacağıq ki, yer ayaqlarının altından qaçacaq”.
“Batkivşina” Partiyasının sədr mavini Aleksandr Turçinov isə bildirib ki, Maydan Milli Birliyinə siyasi partiyalar, ictimai təşkilatlar və Ukrayna vətəndaşları qoşula bilər. Turçinov deyib ki, artıq Taras Boykiv, Aleksey Qaran, Vasili Qatsko, Iqor Jdanov, Andrey Ilyenko, Irena Karpa, Serqey Kvit, Vyaçeslav Kirilenko, Iqor Koliuşko, Vitali Kliçko, Ruslan Koşulinskiy, Ivan Krulko, Ruslana Lıjiçko, Iqor Lutsenko, Yuri Lutsenko, Mariya Matios, Andrey Moxnik, Valeriy Patskan, Oleq Osuxovski, Saşko Polojinskiy, Petro Poroşenko, Vitali Portnikov, Serqey Raxmanin, Yeqor Sobolev, Serqey Sobolev, Aleksandr Suşko, Viktoriya Syumar, Boris Tarasyuk, Yuliya Timoşenko, Aleksandr Turçinov, Oleq Tyaqnibok, Valeri Tsalıy, Refat Çubarov, Viktor Çumak, Zoryan Şkiryak, Yelizaveta Şepetilnikova, Arseni Yasenyuk yeni yaradılan birliyə üzv olublar. Yuliya Timoşenko, Arseni Yasenyuk, Vitali Kliçko, Oleq Tyaqnibok, müğənni Ruslana, Yuri Lutsenko və Kiyev-Mogilyan Akademiyasının prezidenti Serqey Kvit həm də qurumun həmsədrləri seçiliblər.
“Prezidentin necə yatıb, hansı fikirlə oyanmasından asılı olmamalıyıq”
Arseni Yasenyuk bildirib ki, indi əsas məsələ birliyə üzv olanların sayını artırmaqdır. Yaranmış birlik isə hakimiyyətin balanslı şəkildə bölüşdürülməsini təmin edəcək yeni Konstitusiyanın qəbuluna çalışacaq: “Ukrayna, prezidentinin necə yatması və hansı fikirlə oyanmasından asılı olmamalıdır. Prezident şah olmamalı, Ukrayna xalqı da onu istefaya göndərmək hüqununa sahib olmalıdır. Ölkədə azad məhkəmə hakimiyyəti olmalı, korrupsiya məhv edilməli, polis və prokurorluq sistemində islahatlar aparılmalı və yeni Vergi Məcəlləsi qəbul edilməlidir”.
Mitinqin sonunda meydanda TNMK, “Motorrolla”, “KOZAKsistem”, “Qaydamaki”, “Roleks”, “Krambambulə” musiqi qrupları, həmçinin Taras Çubay, Mariçka Burmaka, Nina və Antonina Matvienkolar çıxış ediblər.
Timoşenko üçün petisiya…
Bu arada, Ağ evin rəsmi saytında həbsdə olan keçmiş baş nazir Yuliya Timoşenko ilə bağlı petisiya yerləşdirilib. Sənəd müəllifləri ABŞ prezidenti Barak Obamanı Yuliya Timaşenkonun azad edilməsi üçün tədbir görməyə çağırıblar: “Timoşenko Ukraynadakı hazırkı hakimiyyət tərəfindən həbsə atılıb. Avropa Məhkəməsi bu həbsi qanunsuz hesab etsə də, hakimiyyət hələ də onu azad etməyib”. Dünən üçün petisiyaya 2500 nəfər imza atmışdı. Sənədin ABŞ Administrasiyasında baxılması üçün 100 min imzaya ehtiyac var. Imzalama yanvarın 19-da başa çatacaq.
Gültəkin
