İran mediası Türkiyədəki səs-küylü əməliyyat haqda ilginc iddia irəli sürdü
Türkiyədə rüşvət əməliyyatında həbs olunan iş adamı Rza Zərrabın İranlı ortağının adı məlum olub. İran mətbutaı bu şəxsin Babək Zəncani olduğunu yazıb.
İranın zəngin iş adamı olan Babək Zəncaninin 13,5 milyard dollar sərvətə malik olduğu bildirilir.
İran mətbuatının iddiasına görə, Babək Zəncani ötən həftə İran Mərkəzi Bankına 2,8 milyard dollar ödəmə edib. Beynəlxal sanksiyalara baxmayaraq, Babək Zəncaninin şirkətləri İran neftini xaricə satıb və 2,8 milyard dollar ödəmə də xam neftə görə edilib.
Babək Zəncani ilə Rza Zərrab arasında biznes əlaqələri birinciyə məxsus olan “Sorinet Holdinq” vasitəsi ilə həyata keçirilib. Rza Zərrabın İranla ticarət əməliyytalarını bu holdinq vasitəsi ilə həyata keçirdiyi bildirilir.
Rza Zərrabın verdiyi ilkin ifadələrində “müştərilərimin birinin adı B.Z.” – göstərməsi ilə İran mətbuatı bu səxsin Babək Zəncani olduğuna heç bir şübhə qalmadığını iddia edib.
İran mətbuatı Babək Zəncaninin zəngin iş adamı olmasına baxmayaraq, ölkədə o qədər də tanınmadığını yazıb.
Ötən ilin fevral ayında İrandakı Sosial Sığortalar Təşkilatı ilə əlaqədar sui-istifadə iddialarında Babək Zəncaninin adı tez-tez hallanıb.
Məlumata görə, Babək Zəncani də Rza Zərrabla birlikdə həbs olunmalı imiş. Lakin onu Türkiyədə həbs etməyə müvəffəq ola bilməyiblər. Tez-tez Türkiyədə Rza Zərrabla görüşən iranlı iş adamı müxtəlif sahələrdə böyük biznesə sahibdir.
İddialara görə, Babək Zəncani İran dövlətinin maraqlarını həyata keçirmək üçün ortaya çıxarılan uğurlu iş adamıdır. ABŞ-ın sanksiyalarına qarşı İranın əks addımı sayılan bu layihə üzərindən xarixə neft satılırmış. Həmçinin İranda istehsal olunan qızılın da dünya bazarına Babək Zəncani və Rza Zərrabın iş birliyi sayəsində çıxarıldığı yayılan məlumatlar sırasındadır.
İran mətbuiatının iddialarına görə, Türkiyədə həyata keçirilən həbslər də ABŞ kəşfiyyatının sifarişi ilə həyata keçirilib. Məqsəd İranın xarici ticarət əlaqələrini həyata keçiriən şəbəkəni zərərsizləşdirmək olub (ans press).
