AXCP Gənclər Komitəsi respublika konfransını keçirdi; komitəyə yeni sədr gəldi, yeni hədəflər müəyyənləşdi
Hakimiyyətin daha bir ayrı-seçkilik siyasəti iflasa uğradı. AXCP Gənclər Komitəsinin (GK) I Respublika Konfransını keçirmək üçün Bakı Şəhər İcra hakimiyyətinə ünvanladığı müraciətlər müsbət həllini tapmadı. Lakin konfransı keçirməkdə israrlı olan cəbhəçi gənclər hakimiyyətin yamanlığından geri durmadılar. Konfrans üçün əlverişsiz sayılsa da, ADP qərargahı seçildi.
***
Konfrans saat 13.00-da başladı. Konfransın təşkilat komitəsinin üzvü Bəyim Həsəlinin məlumatına görə, bir il müddətində 43 rayonda AXCP GK qurulub, onlardan 403 məclis üzvü seçilib. 20-dən artıq rayonda AXCP GK-nin yerli təşkilat komitəsi yaradılıb.
Konfransda iştirak üçün 309 nümayəndə qeydiyyatdan keçmişdi.
Cəbhəçi gənclərin konfransına AXCP sədri Əli Kərimli, Milli Şuranın sədri Cəmil Həsənli, müsavatçı, VHP-çi, AGT və NİDA-çı gənc liderlər də qatılmışıdı.
***
Tədbirdə iştirakçı olmasalar da bir sıra xarici ölkələrdən AXCP GK-ya təbrik məktubları yollayanlar da vardı. Məsələn, Fransadan Qənimət Zahid, Rusiyadan Surxay Əliyev, Norveçdən İsa Sadıqov, İstanbuldan doktor Cahangir Səfərli, Ukraynadan – “Udar” Partiyası Gənclər Komitəsidən Aleksandr Kravçuk, Ukraynadan gənc blogger Anastasiya Pluçenko, Türkiyədən Sakarya Özgürlük və İnkişaf Dərnəyidən Seher Taşköprü, AKP-li gənc Hasan Demirtaşlar, rumıniyalı pop-star Stefane, gürcüstanlı gənc fəal Pikria Çulkadze, xorvatiyalı ilahiyyatci jurnalist Dino Dulas cəbhəçi gənclərə təbrik məktubu yollamışdı.
***
Konfransın əsas işi Məclisə seçilən şəxslərin səlahiyyətinin təsdiqi oldu. Bu səsvermə ilə həll edildi. Bundan sonra AXCP Gənclər Komitəsinin Məclisi olacaq və bu qurum komitənin fəaliyyəti ilə bağlı qəraverici orqan kimi çıxış edəcək.
***
Sonra AXCP Gənclər Komitəsini sədri Əbülfəz Qurbanlını hesabat xarakterli çıxışı oldu: “Hörmətli qonaqlar, biz bu zaman ərzində gördük ki, Azərbaycan hakimiyyəti Azərbaycan gəncliyinə qarşı elə bir siyasət həyata keçirdi ki, ölkə gəncliyi bir parça çörək üçün Rusiyanın ucqarlarına getməyə məcbur oldu. Azərbaycan hakimiyyəti elə bir siyasət həyata keçirdi ki, Azərbaycan gəncliyi kirayələrdə yaşamağa məcbur oldu, həmyaşıdlarımız hərbi xidmətdə öz gülləmizin qurbanı oldu, tələbələr normal təhsil ala bilmədi. Bu illər ərzində Azərbaycan hakimiyyəti özünə yaxın olan bir ovuc gəncə hər cür şəraiti yaratdı. Elə bir şərait yaratdılar ki, biz öz mübarizəmizi apararkən bizi şərlədilər. Azərbaycan hakimiyyəti Azərbaycan gəncliyini lümpenləşdirmək, gözdən salmaq istəyir. İlham Əliyevin bu siyasətinə qarşı biz gənclərin də xüsusi siyasəti var. Bizim siyasətimiz ondan ibarətdir ki, Azərbaycanda köklü dəyişikliklər olacaq. Bu köklü dəyişikliklər Azərbaycanın tarixindən İlham Əliyev başda olmaqla Azərbaycan gəncliyinə zülm edən hər kəsi süpürüb atacaq. Bu illər ərzində əsas ali məqsədimiz Azərbaycanda köklü dəyişikliklərə nail olmaq olub. Təəssüf ki, hələ buna nail ola bilməmişik. Bunda hamımızın məsuliyyəti var. Amma biz onu bacarmışıq ki, susmamışıq, daima meydanlarda olmuşuq, Azərbaycanı qarış-qarış gəzib öz tərəfdaşlarımızı tapmışıq.
Xalq Cəbhəsinin Gənclər Komitəsi o təşkilatdır ki, bir əlimiz polisin yaxasında olanda, bir əlimiz klaviaturada olub, təbliğat aparmışıq. Biz o təşkilatıq ki, bir hissəmiz həbslərdə olanda bir hissəmiz meydanda olub. Amma bu təşkilat öz sıralarını genişləndirib. Biz Azərbaycanın hər bir bölgəsində Gənclər Komitələrini yaratmalıyıq. Mən AXCP Gənclər Komitəsinin üzvlərinə xüsusi olaraq təşəkkür etmək istəyirəm. Siz həqiqətən çox yaxşı komanda olmusunuz. Bunu şablon kimi yox, içimdən gələn kimi demək istəyirəm ki, dünyaya bir daha gəlsəydim, Əli bəy məni bir daha AXCP Gənclər Komitəsinə sədr təyin etsəydi, mən yenə Gənclər Komitəsinin sədri olardım”.
***
Əbülfəz Qurbanlıdan sonra çıxış etmək üçün AXCP sədri Əli Kərimliyə söz verildi.
Əli Kərimli çıxışında ölkədəki ictimai-siyasi prosesləri təhlil etdi. Eyni zamanda iki önəmli sərəcamını açıqladı. Onların biri yeni komitə sədrliyi ilə bağlı idi. Gənclər Komitəsinin yeni sədri İlham Hüseyn oldu. Keçmiş sədr Əbülfəz Qurbanlı isə partiya sədrinin müavini təyin olundu.
Əli Kərimlinin çıxışını ixtisarla təqdim edirik:
“Bütövlükdə Azərbaycanın tarixində bir ilkdir ki, bir gənclər təşkilatı bütün respublika boyu təşkilatlanıb. Bu gün artıq 43 rayonda gənclər komitələri formalaşıb, digər rayonlarda da təşkilat komitələri var, bu zalda 60 rayonu təmsil edən cəbhəçi gənclər var. Bu çox böyük bir işdir, son bir ildə gənclər komitəsi bu işi bacardı, sizin hamınızı bu münasibətlə təbrik edirəm.
AXCP fərqli bir partiyadır. Biz AXC olaraq qurulanda fərqli qurulmuşuq. Nədən ibarətdir bu fərq? Biz görmüşük ki, siyasi partiyalar bir nüfuzlu şəxsin çağırışı ilə ətrafında formalaşır. Ancaq Azərbaycan xalq Cəbhəsi vətənin, millətin darda olduğu zamanda ölkənin bütün coğrafiyasında bir-birini tanımayan adamların vahid amal naminə bir araya gəlməsindən formalaşıb, siyasi partiyaların məqsədi hakimiyyətə gəlmək olursa hər zaman, Xalq Cəbhəsi formalaşanda ilk növbədə məqsədi vətənin işğalda olan torpaqlarını azad etmək, vətənin istiqlaliyyətini bərpa etmək, vətəndə azadlıq və ədaləti bərqərar etmək olub. Ona görə də Xalq Cəbhəsinin genetik yaddaşında bu vətəni, bu milləti daha çox sevmək, ümumi maraqları hər zaman partiya maraqlarından öndə görmək yaddaşı var, qabiliyyəti var. Mən çox şadam ki, ötən illərdə minlərlə yeni gənc sıralarımıza qoşulub. Və onlar da Xalq Cəbhəsinə xas olan bu keyfiyyəti qorunub saxlayıb. Bu gün sizinlə qürür duyuram ki, siz yalnız Xalq Cəbhəsinin bayrağını uca tutmursunuz, həm də hər zaman dövlətimizin, millətimizin maraqlarını qrup və şəxsi maraqlardan üstün tutursunuz, sağ olun, sizinlə fəxr edirəm!
Azərbaycan Xalq Cəbhəsi hər zaman təzyiq görüb. O cümlədən gənclər çoxlu məhrumiyyətlər yaşayıblar. Sıralarımızdan yüzlərlə insan məhbus həyatı yaşayıb. Çoxlu sayda işsizlərimiz var. Başqa məhrumiyyətlər – fiziki, mənəvi, terrorla üz-üzə qalmalar var. Ancaq buna baxmayaraq Azərbaycan gəncliyi bu təşkilatı seçir. Məncə ilk növbədə Azərbaycan gəncliyi ona görə Xalq Cəbhəsini seçir ki, bizim amalımız ona doğmadır. Biz ölkənin sərvətlərini bir qrup tərəfindən mənimsənilməsini deyil, həmin sərvətləri müasir iqtisadiyyat, etibarlı sosial müdafiə müxanizmi, yüksək təhsil, səhiyyə sisteminin qurulmasına yönəltmək istəyirik. Biz istəyirik ki, bu ölkədə azadlıq, ədalət, hər kəsin özünü realizə etmək imkanları olsun. Valideynlərinin kimliyindən, maddi durumundan asılı olmayaraq hər bir azərbaycanlı gənc təhsil ala, özünü işlə təmin edə bilsin, hamımız bu vətəndə özünü xoşbəxt hiss etməlidir, bu amalı Azərbaycan gəncliyi bizimlə bölüşür. Ona görə də bütün məhrumiyyətlərə baxmayaraq Xalq Cəbhəsini seçir.
Azərbaycan Xalq Cəbhəsi elan etdiklərilə əməlləri üst-üstə düşən bir təşkilatdır. Xalq Cəbhəsi bu ölkədə gerçək dəyişikliklərin baş verməsi, demokratik qüvvələrin böyük birliyinin yaranması üçün əlindən gələni etməyi bacaran təşkilatdır. Ən nəhayət, Azərbaycan Xalq Cəbhəsi öz sıralarında böyük bir ailə mühiti formalaşdırıb. Təsadüfü deyil ki, siz Xalq Cəbhəsinin sıralarına qoşulanda biz deyirik ki, böyük cəbhəçi ailəsinə xoş gəldiniz. Biz bir-birimizlə eyni əqidəni bölüşmürük, həm də eyni taleyi bölüşürük, hər birimizin uğuru hamımızın uğurudur, birimizin problemi hamımızın problemidir. Bizim təşkilatın sıralarında bir-birinin ayağından çəkmək, bir-birinə mane olmaq, paxıllıq etmək, qruplaşamlar yaratmaq, intiriqa mühiti yoxdur. Ona görə də düz seçim etmisiniz, Cəbhəçi ailəsinə xoş gəlmisiniz!
Sizin qarşınızda öz şəxsi hesabatımı da vermək istəyirəm. Düz bir il öncə bizim gənclərlə böyük görüşümüz oldu. O zaman 2013-cü illə, gözlənilən prezident seçkiləriylə bağlı cəmiyyətə ciddi mesajlar verdim. O zaman bəyan elədim ki, qarşıdan mühüm bir mərhələ gəlir. Azərbaycanda demokratik qüvvələrin böyük birliyini yaratmağa ehtiyac var. Böyük birliyi yaradıb vahid namizədlə seçkiyə getmək lazımdır. O zaman müraciət elədim ki, Azərbaycan xalqı özü də monitirinq aparsın. Kimlər müxalifətin birləşməsinə mane ola bilər, kimlər öz şəxsi, qrup maraqlarını ümumi maraqların fövqündə qoya bilər, sizin qarşınızda vəd elədim ki, şəxsən mən bunu etməyəcəm. “Birləşsin” şüarını irəli sürənlərin əksəriyyəti düşünürdü ki, bu birlik mənim ətrafımda olsun, mən olum namizəd. Biz birlik dedik və ilk güzəştə gedən də özümüz olacağıq. Bu birliyi şəxsən özüm üçün istəmirəm. Hər zaman dedim ki, Azərbaycanın, demokratik düşərgənin maraqları heç bir halda şəxsən mənim, partiyamızın marağından aşağıda dura bilməz.
Biz davam etdik. Bu hələ o zaman idi ki, Demokratik Qüvvələrin öz tərkibində belə hamının birləşəcəyinə ümid yox idi, vahid namizəd ideyasına yabançı yanaşılırdı, qeyri-real hesab olunurdu, ancaq biz bunu usanmadan təbliğ etdik və günün birində əksəriyyət bu ideyanı bölüşdü. Ona nail olduq ki, 2013-cü ildə Azərbaycan müxalifəti Milli Şurada böyük bir birliyə imza atdı. Ölkənin real müxalifət partiyaları, ziyalıları, vətəndaş cəmiyyəti, fəal gənclər Milli Şurada bir araya gəldi. Biz şəxsən Milli Şuranın yaranmasında, onun ilk dəfə Rüstəm İbrahimbəyovu namizəd irəli sürməsində, Bakıya gəlişinə imkan verilmədikdə Cəmil Həsənlinin namizəd kimi seçilməsində, onun eçki kampaniyasında, seçkidən sonra hüquqlarının müdafiəsində hər zaman öndə olduq. Heç bir tərəddüd etmədik, bəhanə axtararaq proseslərə əngəl olmağa çalışmadıq, əksinə, tam səmimiyyətimizlə dediyimiz kimi olduq, birlik üçün çalışdıq, Azərbaycan müxalifəti 2013-cü ildə Cəmil Həsənlinin namizədliyi ilə Azərbaycandakı bu qəddar rejimin üzərində mənəvi və siyasi qələbə qazandı.
Sizin üçün maraqlı olan bir məqamın üzərində dayanmaq istəyirəm. Siz bilirsiniz ki, Gənclər Komitəsi Xalq Cəbhəsinin tərkib hissəsidir. Bu gün Ümumrespublika konfransında Gənclər Komitəsinin Məclisinin tərkibini təsdiq edəcəksiniz. Formalaşmış 43 rayon təşkilatını təsdiq edəcəksiniz. Məclis Rəyasət Heyətini seçəcək və artıq Gənclər Komitəsi özü ayrıca bir güclü struktur kimi fəaliyyət göstərəcək. Hələ ki, nizamnaməyə görə sizin sədrinzii təyin etmək mənim səlahiyyətimdədir. İstəsəniz bir müddətdən sonra onu dəyişərik. Ancaq mən çalışacam ki, elə bir sədr təklif edim ki, sizin başınızı uca etsin, hər zaman fikirləşəsiniz ki, bizim sdərimiz yenə də meydanlarda, mübarizənin ən çətin məqamlarında öz cəsarətiylə sizdən bir addım öndə olacaq, sizə nümunə olacaq. Sizin elə sədriniz olacaq ki, o intellektual göstəriciləriylə hər zaman üzünüzü ağardacaq, hər zaman qürur duyacaqsınız. Sizin elə sədriniz olacaq ki, Əbülfəz Qurbanlının son dörd ildə qurub-yaratdıqlarını qoruyub saxlaya biləcək. Çox sağ olun ki, sıralarımızda belə gənclər çox yetişdirmisiz, artıq Gənclər Komitəsində belə bəylər, belə xanımlar çoxdur. Mən sizə yeni sədr kimi İlham Hüseyni təklif edirəm.
Bu gün konfransın bir sürpriz məlumatı da var. Əbülfəz bəy bu 4 ildə böyük işlər görüb. Hiss edirəm ki, ondan ayrılmağın xiffətini çəkirsiniz, mən Əbülfəz Qurbanlının Gənclər Komitəsindəki, partiyadakı, demokratik düşərgədəki xidmətlərini çox yüksək qiymətləndirirəm. Bizim təşkilatımız həm də onunla öncüldür ki, bu təşkilatda ədalət var, hər kəsin haqqının özünə verilməsi var. Bu gün böyük məmuniyyət hissi ilə deyirəm ki, narahat olmayın, Əbülfəz Qurbanlı uzağa getmir, onun qabiliyyəti, fəaliyyəti bütövlükdə partiyaya xidmət edəcək, Xalq Cəbhəsi Partiyasının sədr müavini olaraq”.
***
AXCP sədrinin çıxışından sonra söz Milli Şuranın sədri Cəmil Həsənliyə verildi: “Bu gün çağdaş Azərbaycan tarixinin maraqlı səhifələri yazılır. Bir vaxtlar gənclərin kiminsə arxasında getməsi uğrunda mübarizə gedirdi. İndi isə gənclərin arxasında getmək uğrunda mübarizə gedir. Bu haqqı gənclik öz mübarizəsi, intellekti və vətən sevgisi ilə əldə edib. Eşq olsun Azərbaycan gəncliyinə. Bu gün ümid də gəncliyədir, hədəf də gənclikdir. Bugün Azərbaycanın məhbus həyatında bir gəncləşmə gedir. Bir zamanlar daha çox yaşlı insanlar, daha çox öz fiziki gücü ilə seçilənlər həbslərə məruz qalırdılar. Bu gün isə həbsxanalar intellektual mübariz gənclərlə doludur. Hakimiyyət bilir ki, ağzı, gözü, beyni bağlı insanları idarə etmək asandır. Ancaq bu gün gözü, dili, beyni açıq gənclik yetişir. Bu gün həbsxanalarda olan mübariz gənclik, Azərbaycan gəncliyinin əsl simasını müəyyənləşdirir və öz fəaliyyəti ilə Əliyev istibdadından yuxarıda durduqlarını göstərir. Biz Cənubi Koreyanın qanunlarını qəbul edib, Şimali Koreya üsulları ilə idarə edilən ölkəyə çevrilmişik. Biz ölkəmizi sivil qaydalarla, demokratik dəyərlərlə idarə olunan bir ölkəyə çevirməliyik. Bunun yolu gəncliyin ortada olmasından keçir. Bu ölkəni gənclik qurtaracaq. Dünyanın yolu demokratiya yoludur və başqa yol yoxdur. Biz ömürlük hakimiyyətlərin aqibətini gördük. Müstəbid rejimlər getməlidir və bu prosesi gənclər həyata keçirməlidir. Azərbaycan dövlətçiliyinin banisi Məhəmməd Əmin Rəsulzadənin dahiyənə sözləri var idi. Deyirdi ki, avropalılar ölürlər dirilmək üçün. Biz isə dirilirik ölmək üçün. Bu gün on minlərlə gənc var ki, yenidən doğulmaq üçün ölməyə hazırdırlar. Ustadmız Əbüləz bəy gəncliyə xüsusi önəm verirdi. Nə gözəl ki, bizim gəncliyimiz həmin dövrə düşürdü. Bu gün biz cumhuriyyət quruluşunun millətə verdiyi böyük üstünlükləri şəxsi həyatımızda yaşaya bilmirik. Ölkənin ərazi bütövlüyü yoxdur. Amma Ali Baş Komandan hər gün deyir ki, Azərbaycan güclü dövlətdir, onun güclü ordusu var. Güclü dövlətin də məzlum vətəndaşı olar? Dövlət o zaman güclü olur ki, onun vətəndaşı güclü olur. Sevgili gənclər, dövlət orqanları işləmir və ölkə başçısı “Asan Xidmət” yaratmağı ilə öyünür. Niyə dövlət idarələri, məmurlar öz vəzifələrini yerinə yetirmirlər ki, başqa bir orqana ehtiyac duyulur? Bu ölkəni idarə edə bilməmək deməkdir. Görəcəyimiz işlər çoxdur, gedəcəyim yol çətindir. Bu yolu asanlaşdıran yalnız Azərbaycan gəncliyidir. Eşq olsun Azərbaycan gəncliyinə!”
***
Daha sonra konnfransa gələn qonaqlar Müsavat Divanın üzvü Tural Abbaslı, NİDA Vətəndaş Hərakatının İdarə heyəti üzvü Nicat Məmmədbəyov, VHP nümayəndəsi Pünhan İmanlı, AGT İdarə Heyətinin üzvü Orxan Rüstəmzadə çıxış edərək, cəbhəçi gəclərə uğurlar dilədilər. Çıxışlarda AXCP GK-nın fəaliyyəti təqdir oludu, AXCP sədrinin yeni və köhnə sədrlə bağlı verdiyi sərəncamlar təqdir olundu.
***
AXCP GK üzvləri keçmiş vicdan məhbsuları Elnur Məcidli, Cabbar Savalanlı, Dadaş Sadıqlı, Comərd Qaya, Aqil Məhərrəmli, Emil Səlimov, Gülnar Cahandar, Ceyhun İbrahimov çıxış edərək növbəti il üçün hədəflərindən danışdılar. Gənclər ölkədə avtoritar idarəetməyə son qoymaq qətiyyəti nümayiş etdirdilər. Çıxışlarda vurğulandı ki, gələn il cəbhəçi gənclər öz illərini elan etmək niyyətindədirlər və 2014-cü ildə kəmiyyət və keyfiyyətcə indikidən 5 dəfə güclü olacaqlar.
***
Konfrans yeni sədr İlham Hüseynin çıxışı ilə tamamlandı. O dedi ki, partiya sıralarına hansısa vədlər, məcburiyyət qarşılığında deyil, vicdanın səsinə qulaq asaraq qatılıblar: “Bu illər ərzində təqiblərə, təzyiqlərə, fiziki zorakılıqlara məruz qaldıq. Ancaq rejimin təzyiqlərinə deyil vicdanımızın təzyiqinə təslim olduq. Biz razı ola bilmərik ki, bir qrup yarımçıq adam bütöv bir xalqı köləyə çevirsin. Biz istəyirik ki, Azərbaycan gənci həm intellektual mübarizədə, həm meydanlarda qürurla çıxış etsin. Biz Azərbaycan gəncliyinə səslənib deyirik ki, əgər siz bu gün bizimlə çiyin-çiyinə deyilsinizsə, deməli, mübarizədəki məğlubiyyətinizlə barışmısınız. Bu “göygöz kosaların” tilsimindən xilas olmaq üçün ləyaqət, cəsarət, vicdan duası oxuyun və azad olun. Biz bu mübarizəyə həm də ona görə qoşulduq ki, sevdiyimiz insanların, xalqımızın, dövlətimizin və Allahımızın qarşısında başı dik dayanaq. Bizim mübarizəmizin məğlub olmaq ehtimalı yoxdur. Çünki biz ümumbəşəri dəyərlər uğrunda mübarizə aparırıq və bu yolda istənilən məhrumiyyətə sinə gərməyə hazırıq. Yaşasın Azərbaycanın ləyaqətli insanları, yaşasın Azərbaycan gəncliyi! Yaşasın Azərbaycan!”.
Natiq Güləhmədoğlu
