«Bizi narahat edən odur ki, Azərbaycanda neft sektorunda şəffaflığın olmaması neftdən xalqa çatası gəlirləri ayrı-ayrı şəxslərin əldə etməsinə imkan yaradır»
Azərbaycanda gizli neft mafiyası barədə araşdırma aparıb, sonda “Anonim Azərbaycan” adlı hesabat hazırlayan “Global Witness” təşkilatı bu mövzuda daha bir bəyanat yayıb. Təşkilatın saytında yerləşdirilmiş bəyanat Azərbaycan Respublikası Dövlət Neft Şirkətinin, eləcə də araşdırmanın əsas qəhrəmanı olan sirli Anar Əliyevin bu hesabatla bağlı fikirlərinə cavab xarakteri daşıyır. Elə mətn də “Anonim Azərbaycan: ARDNŞ-ə cavab” başlığıyla yayılıb:
“ARDNŞ bəyan edib ki, ”Global Witness”in hazırladığı hesabatın məqsədi paxıllıqdan Azərbaycanın mənfi obrazını yaratmaq və ARDNŞ-a təzyiq göstərməkdir. Iddia olunur ki, hesabat qeyri-dəqiq mənbələrin verdiyi məlumatlara əsaslanır, oradakı informasiyaların əksəriyyəti ya həqiqətə uyğun deyil, ya da köhnədir.
“Global Witness” heç bir partiya bağlılığı olmayan qeyri-hökumət təşkilatıdır. Fəaliyyətinin məqsədi isə bütün dünyada hökumət və şirkətlərin fəaliyyətində şəffaflığın artırılmasıdır. “Global Witness”i “paxıllıqda” ittiham etmək bu təşkilatın fəaliyyəti və məqsədi barədə məlumatsızlıqdan irəli gəlir. “Global Witness” iyirmi ildən çoxdur ki, təbii ehtiyatlarla bağlı araşdırmalar aparır, 2003-cü ildə Nobel Sülh Mükafatına namizədliyi irəli sürülüb.
Bu təşkilatın bütün hesabatları, o cümlədən “Anonim Azərbaycan” da ciddi araşdırılıb, faktlara, mənbələrə əsaslanır. Bu hesabatdakı məlumat mənbələrinin əksəriyyəti ARDNŞ və ya onun törəmə şirkətlərinin illik hesabatları, bəyanatları və ya Dövlət Neft Şirkətinin saytı olub.
2013-cü ilin əvvəlindən başlayaraq, dekabra qədər “Global Witness” dəfələrlə ARDNŞ və onun törəmə şirkətləri, partnyorlarıyla əlaqə saxlamağa cəhd göstərib. Lakin ARDNŞ öz cavabında ünvanladığımız sualların böyük əksəriyyətinə aydınlıq gətirmədi. Hesabatımızda ARDNŞ-in cavabı da öz əksini tapıb.
“Global Witness” bu araşdırmaya başlamaqla göstərmək istədi ki, ARDNŞ (beləliklə, Azərbaycan hökuməti” Mədən Sənayesində Şəffaflıq Təşəbbüsünə qoşulmasına baxmayaraq, hələ də şəffaflığını artırmalıdır. “Global Witness”i narahat edən odur ki, neft sektorunda şəffaflığın olmaması neftdən Azərbaycan xalqına çatası gəlirləri ayrı-ayrı şəxslərin əldə etməsinə imkan yaradır.
Dünyada əsas neft istehsalçılarından, eləcə də Mədən Sənayesində Şəffaflıq Təşəbbüsünə ilk qoşulan ölkələrdən biri olan Azərbaycan üçün şəffaflığın artırılması istiqamətində addımlar atılması həyati əhəmiyyətli məsələdir.
“Global Witness” bütün bu məsələlərlə bağlı ARDNŞ-lə dialoqu davam etdirməyə hazırdır”.
Informasiya şöbəsi
