Özünü separatçı “Talış-Muğan Respublikası”nın “prezidenti” elan etmiş Əlikram Hümbətov Yerevanda səfərdədir. Əlikram Hümbətov Yerevan Dövlət Universitetinin İranşünaslıq Kafedrasında talışşünaslıq üzrə magistr proqramının açılışında iştirak edib.
Kafedra müdiri Qarnik Asatryan qonağı Talış-Muğan Respublikasının prezidenti kimi təqdim etdi.
BBC Azərbaycanca müxbiri Yerevandan xəbər verir ki, divara naməlum bayraq vurulub, talış dilində oxunan himn çalınarkən hamı ayağa qalxıb və Əlikram Hümbətovu əl çalaraq qarşılayıb. Daha sonra Qarnik Asatryan səslənən musiqinin “Lənkəran himni” olduğunu deyib.
Cənab Hümbətov müxbirimizin azərbaycanca sual vermək cəhdini rədd edib.
Professor Asatryan Yerevan Dövlət Universitetinin İranşünaslıq Kafedrasında öz dövlətçiliyi olmayan Şərq xalqlarının tarixi, mədəni irsinin öyrənilməsi üzrə tədqiqatlar aparıldığı haqqında məlumat verib.
O, son illər xüsusilə “talışşünaslıq” üzrə xeyli iş görüldüyünü qeyd edib.
Yerevan Dövlət Universiteti İranşünaslıq Kafedrasında professor Qarnik Asatryanın rəhbərliyi altında “Talış xalqının tarixi və mədəniyyəti müqəddiməsi” kitabı, rus dilində “Talış xalq nağılları” çap olunub, talış əlifbası dərsliyi tərtib olunub və İslam Təhqiqatlar Mərkəzi və İmam Əli Tehran Humanitar Təhqiqatlar Mərkəzi ilə birlikdə Müqəddəs Qurandan seçilmiş ayələr talış dilinə tərcümə olunmaqdadır, müxbirimiz xəbər verir.
Əlikram Hümbətov talış xalqının irsinə diqqətə görə təşəkkürünü bildirib.
“Lragir.am” informasiya saytının məlumatına görə, Ermənistana səfəri çərçivəsində Əlikram Hümbətovun Ermənistan ictimai, siyasi və elmi dairələrinin nümayəndələri ilə görüşləri nəzərdə tutulur.
Bundan başqa, o, iki gün Dağlıq Qarabağda olacağı, Stepanakert Universitetində çıxış edəcəyi planlaşdırılıb.
Əlikram Hümbətov Azərbaycan vətəndaşlığından çıxarılıb və hazırda Hollandiyada yaşayır.
