Əvəz Temirxan: «Məmurlar harın həyat tərzindən əl çəkməyib. Deməli, onlar dövlət başçısı ilə hesablaşmırlar»
Gözəl Bayramlı: «Dövlət başçısı ictimai rəyi azdırır, xalqı aldadır»
Regionlara səfəri çərçivəsində Bərdədə məcburi köçkünlərlə görüşən dövlət başçısı Ilham Əliyev məmurların xoşagəlməz davranışından danışıb. Dövlət başçısı məmurların təmtəraqlı yubileylər keçirdiyini, xarici müğənnilər dəvət etdiyini, dəbdəbəli həyat sürdüyünü, bunun isə yolverilməz olduğunu deyib. Əliyev hətta özünü də nümunə göstərməkdən çəkinməyib.
Bu, dövlət başçısının ilk belə açıqlaması deyil. Əliyev buna qədər bir neçə dəfə müşavirələrdə də məmurların davranışını tənqid edib. Ancaq bu, sözdən o yana keçməyib və heç kim cəzalandırılmayıb. Müxtəlif beynəlxalq hesabatlarda və xarici mətbuatda Əliyevin ailə üzvlərinin sərvətləri ilə bağlı dəfələrlə məlumatlar açıqlanıb. Belə olan halda dövlət başçısı necə başqalarına nümunə olar bilər və onun məmurların dəbdəbəli həyata görə tənqid etməsi nə dərəcədə səmimidir?
ALP sədri Əvəz Temirxan hesab edir ki, prezidentin stola vurulan bir yumruğu məmurların özlərini yığışdırması üçün kifayət edər. Azərbaycanda avtoritar dövlət idarə üsulunun olduğunu nəzərə alsaq, bu üsul təsirli olmalıdır. Amma indi görünən odur ki, Azərbaycan məmurları hələlik dövlət başçısı ilə hesablaşmırlar: “Əliyev bir neçə dəfə bu mövqeyi ortaya qoyub və məmurlar harın həyat tərzindən əl çəkməyib. Deməli, onlar dövlət başçısı ilə hesablaşmırlar. Saakaşvili Gürcüstanda məmurların harınlığına öz nümunəsi ilə son qoydu. Azərbaycan dövlət başçısı da o cür davranmalıdır”.
AXCP sədrinin müavini Gözəl Bayramlının fikrincə, dəbdəbəli həyatı yaşayan, öz övladları üçün milyonlarla manat dəyərində villalar alan dövlət başçısının öz məmurlarını dəbdəbəli həyata görə ittiham etməsi cəmiyyətdə səmimi qəbul oluna bilməz. Çünki bu, birbaşa prezidentdən, onun ailəsindən qaynaqlanan məsələdir. Dəbdəbəli həyat şəraitinə öyrənən prezidentin məmurları da dəbdəbəli həyat şərati yaşayacaq.
G.Bayramlının sözlərinə görə, bu ölkədə bir anormallıq da ondan ibarətdir ki, harınlığı ilə tanınan adamlar birbaşa dövlət səviyyəsində himayə olunur. Bütün bunların başında isə prezident dayanır. Ona görə də səmiyyətdən söhbət gedə bilməz: “Bu, seçkiqabağı seçiciləri, ictimai rəyi aldatmaq məqsədi güdür. Heç bir tədbir görülməyəcək. Çünki uzun illərdir bu proses gedir. Rayonlarda məmurlar özlərini kiçik padşah hesab edir. Hər yer məmurların, oliqarxların arasında bölünür. Dövlət başçısı bunu görür. Ancaq ictimai rəyi azdırır, xalqı aldadır”.
Fizzə