Vəfa Quluzadə: «PKK kart kimi Türkiyəni nəyəsə vadar etmək üçün istifadə olunur»
Xəbər verildiyi kimi, PKK-çıların Türkiyə ərazisindən çıxarılması prosesi dayandırılıb. Belə ki, PKK “Fırat” xəbər agentliyi vasitəsilə açıqlama yayaraq çəkilmə prosesini dayandırdığını bildirsə də, mart ayında əldə olunan atəşkəsin qorunub saxlanacağını bəyan edib. Döyüşçülərin Türkiyədən çıxarılması prosesinə başlamaq barədə may ayında razılıq verən təşkilat onları Iraq ərazisinə köçürüb. Əvəzində isə Türkiyə hökumətindən ölkədə yaşayan kürdlərin hüquqlarının müdafiəsi sahəsində vəziyyətin yaxşılaşdırılması, islahatlarının keçirilməsi bildirilib.
Türkiyəli politoloqlar isə bildirir ki, PKK-nın Türkiyə torpaqlarından çıxacağı iddialarına çoxları inanmır. Onlar bunu PKK-nı idarə edənlərin çoxluğuyla əlaqələndirib. Həmin ölkələr Suriya məsələsində bir-biri ilə çəkişir və Türkiyənin Suriya siyasətindən narazı qalan dövlətlər PKK-dan bir alət olaraq yararlanır. Onlar Ankaranın Suriyaya qarşı mövqeyini dəyişmək məqsədilə PKK vasitəsilə bu ölkəni vurmağa səy göstərir. Ona görə də yaraqlıların Türkiyədən çıxma prosesini dayandırıb.
Məsələni şərh edən politoloq Vəfa Quluzadə Ankaranın Suriya məsələsində aktiv iştirak etdiyini, həmçinin, Türkiyənin reallıqlarının nəzərə alınmasını vacib sayır. Politoloqa görə, Türkiyə əhalisinin məsələyə yanaşması çox vacibdir: “Suriya vaxtilə Osmanlı imperiyasının bir hissəsi idi. Türklər suriyalılara qan qardaşı kimi baxıb. Bu baxımdan onlar Suriyada döyüşə bilərmi? Doğrudur, Türkiyə son vaxtlar Suriya barəsində xeyli aktivləşib. O öz hərbi qüvvələrini, raket qüvvələrini sərhədə çəkib. Lakin Amerikaya kiminsə ora gedib döyüşməsi lazımdır. Amerika Suriyada Rusiya ilə üzləşir və açıq surətdə deyir ki, Rusiya Bəşər Əsədin ən güclü və əsas müttəfiqidir. Amerika özü Rusiya ilə birbaşa toqquşmaq istəmir. Ona görə də Amerika arzu edir ki, onun müttəfiqlərindən biri bunu etsin. Avropalılar bunu etmir və edə də bilməz”.
V.Quluzadə təəssüf edir ki, böyük dövlətlərin oyunu həmişə balaca xalqların başında çatlayır. Onların oyununun mənfi nəticəsini həmişə xalqlar çəkir. Bu baxımdan Suriya indi Qərblə Rusiya və Iranın qarşıdurması meydanına çevrilib: “Bunun axırı çox pis ola bilər. Amerika hələlik təmkin nümayiş etdirərək səsverməni Konqresdə başqa vaxta keçirib. Amma bir gün hamısı bir araya gəlib Suriyaya zərbə endirə bilər. Yəni hər məqamda gözlənilən zərbənin qüvvəsi böyük ola bilər”.
Politoloq Ankaranın bu məsələdə geri çəkilməsi üçün PKK kartından istifadə oluna bilinəcəyini də istisna etmir. V.Quluzadənin qənaətincə, PKK məsələsində Qərb Ankaraya xeyli güzəştə gedib: “Öcalanın tutulması, məlumdur ki, Qərb kəşfiyyatının Türkiyə kəşfiyyatıyla əməkdaşlığı nəticəsində həyata keçdi. O da bəllidir ki, PKK özbaşına yaşaya bilməz və bu qüvvələrin kim olduğunu Türkiyə yaxşı bilir. Ona görə də PKK kart kimi Türkiyəni nəyəsə vadar etmək üçün istifadə olunur və hələ istifadə olunacaq”.
Nigar